ގްރީސްގެ ކޯޗު ކޮންސްޓަންޓީނޯސް ކޮސްޓޮޕޮލޮސް (ކޮސްޓޯ) އަލުން ގައުމީ ޓީޓީ ޓީމުގެ ކޯޗުކަމާ ހަވާލުވެއްޖެ އެވެ.
ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް)ގެ ރައީސް އަލީ ރަޝީދު (އައްޔަ)، "އަދަދު" އަށް ވިދާޅުވީ ކޯޗު ކޮސްޓޯ، މިއަދު ރާއްޖެ އަތުވެފައިވާ ކަމަށާއި މާދަމާ އިން ފެށިގެން ޓީޓީ ޓީމުގެ ޕްރެކްޓިސްތައް ފަށަން ނިންމާފައިވާ ކަމަށެވެ.
"ކޯޗަށް އޮތް ޓާގެޓަކީ މި އަހަރު އޮތް ސައުތު އޭޝިއަން ޖޫނިއާ މުބާރާތާއި ކެޑޭޓް ޗެމްޕިއަންޝިޕްގެ އިތުރުން ރާއްޖޭން ވާދަކުރާ ބައިނަލްއަގުވާމީ މުބާރާތްތަކަށް ގައުމީ ޓީމު ރަނގަޅަށް ތައްޔާރުކުރުން. މިއަދު އައިސް މާދަމާ އިން ފެށިގެން ކޯޗުގެ ޓްރެއިނިންތައް ފަށާ ގޮތަށް ރޭވިފައި އޮތީ،" އައްޔަ ވިދާޅުވި އެވެ.
ކޯޗު ކޮސްޓޯ، ގައުމީ ޓީޓީ ޓީމުގެ މަސައްކަތް އެންމެ ފުރަތަމަ ފެށީ މިދިޔަ އަހަރުގެ މާޗް މަހުގަ އެވެ. އެކަމަކު، އޭނާ ވަކި މުއްދަތަކަށް މަސައްކަތް ކުރުމަށް ފަހު ދާން ޖެހުނީ އެވެ. އަލުން، ކޮސްޓޯ ގެނައިކަން އިއުލާނުކުރުމަށް ފަހު ޓީޓީ އެސޯސިއޭޝަނުން ވަނީ އަލުން ކޯޗު ގެންނަން ކުޅިވަރާ ބެހޭ ވަޒީރު އަހުމަދު މަހުލޫފް ކޮށްދެއްވި މަސައްކަތް ފާހަގަކުރައްވައި ޝުކުރު އަދާކޮށްފަ އެވެ.
ޓީޓީއޭއެމް އާއި ކޯޗު ކޮސްޓޯ ގުޅިގެން ވަނީ ގްރީސްގެ ޓޭބަލް ޓެނިސް ތަރި ޕެނަޖިއޯޓިސް ޖިއޯނިސްގެ ސެޝަނެއް ރާއްޖޭގެ ކުޅުންތެރިންނަށް ކުރިއަށް ގެންގޮސްފަ އެވެ. ޓޯކިޔޯ އޮލިމްޕިކްސް ނިންމާލުމަށް ފަހު ޖިއޯނިސް ރާއްޖެ އަށް ކުރި ދަތުރުގައި ރާއްޖޭގެ ޓީޓީ ކުޅުންތެރިންނާ އެކު ސެޝަނެއް ގެންދިޔައީ ހުޅުމާލޭ ޓީޓީ ހޯލުގަ އެވެ.
ކޯޗު ކޮސްޓޯ ހުރެގެން، މި އަހަރަކީ ރާއްޖޭގެ ޓީޓީ އަށް އިތުރު ކާމިޔާބީތަކެއް ހޯދިދާނެ އަހަރެކެވެ.
މި އަހަރު ބާއްވަން ތާވަލުކޮށްފައި އޮތް ދެކުނު އޭޝިއާގެ ޖޫނިއާ ޓޭބަލް ޓެނިސް ޗެމްޕިއަންޝިޕް ހޯސްޓްކުރާ ގޮތަށް ކުރިން ހަމަޖެހިފައި އޮތީ ސްރީ ލަންކާގަ އެވެ. އެކަމަކު، ލަންކާ އިން މިހާރު ނިންމާފައިވަނީ އެ މުބާރާތް ހޯސްޓްކުރުމުގެ ފުރުސަތު ރާއްޖެ އަށް ދިނުމަށެވެ.
މިހާރު އޮތްގޮތުން ދެކުނު އޭޝިއާގެ ޖޫނިއާ ޓީޓީ މުބާރާތް ރާއްޖޭގައި ހޯސްޓްކުރާނެ ތާރީހަކަށް ކަނޑައަޅާފައިވަނީ މާޗް މަހުގެ 20 އިން ފެށިގެން ދެ ދުވަހުގެ މުއްދަތަށެވެ.
މިއީ ރާއްޖޭގެ ޓޫރިޒަމަށް 50 އަހަރު ފުރޭ އަހަރު ކަމަށްވާތީ އެކަމާ ގުޅުވައިގެން ބާއްވާ ހަރަކާތްތަކުގެ ތެރެެއިން ބައިނަލްއަގުވާމީ ޓީޓީ މުބާރާތެއް ބޭއްވުމުގެ ވާހަކަ ވެސް އަންނަނީ ދެކެވެމުންނެވެ. ބޭރު ގައުމުތަކުގެ ކުޅުންތެރިންނަށް ދައުވަތުދީގެން ބާއްވާ އެ މުބާރާތް ބޭއްވޭތޯ މަސައްކަތް ކުރަނީ ސެޕްޓެމްބަރު މަހުގަ އެވެ. މީގެ އިތުރުން ވެސް ގައުމީ ޓީޓީ ޓީމުން ބައިނަލްއަގުވާމީ ގިނަ މުބާރާތްތަކުގައި މި އަހަރު ވާދަކުރާނެ އެވެ.
