ބޭރު ފައިސާ ގަނެ ވިއްކުމުގެ ހުއްދަ ލިބިފައިވާ ވިޔަފާރިތަކަށް އަމަލުކުރުން ލާޒިމުކުރާ ގަވާއިދުތަކާ ހިލާފުވެގެން ހަތް ރިސޯޓެއް ހިމެނޭ ގޮތަށް 16 ވިޔަފާރިއަކަށް ދޫކޮށްފައިވާ މަނީ ޗޭންޖާ ހުއްދަ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބާތިލުކޮށްފި އެވެ.
މަނީ ޗޭންޖާ ހުއްދަ ބާތިލުކުރި ރިސޯޓުތަކުގެ ތެރޭގައި މަތީފަންތީގެ ސޮނޭވާ ބްރޭންޑުގެ "ސޮނޭވާ ފުށި" އަދި "ޖާނީ" އާއި ފިޔަވަޅު އަދި ރެޑިސަން ބްލޫ ރިސޯޓު ހިމެނެ އެވެ. ހުއްދަ ބާތިލުކުރި އެހެނިހެން ވިޔަފާރިތަކުގެ ތެރޭގައި ހިމެނެީ ފިހާރައަކާއި ކެފޭއަކާއި ކުންފުނިތަކެކެވެ.
މި ހުއްދަތަށް ބާތިލުކުރި ސަބަބާ ގުޅިގެން ސުވާލުކުރުމުން އެމްއެމްއޭގެ ތަރުޖަމާނު މުހައްމަދު ނާސިހު ވިދާޅުވީ، އެ ހުރިހާ ތަނެއްގެ ހުއްދަ ބާތިލުކުރީ ގަވާއިދާ އެއްގޮތަށް އަމަލުނުކުރާތީ ކަމަށެވެ. އަދި، ވިދާޅުވީ އިސްލާހުކުރަން ޖެހޭ ކަންކަން އިސްލާހުކުރުމުން އަލުން ހުއްދަ ދޫކުރާނެ ކަމަށެވެ.
އެމްއެމްއޭގެ "މަނީ ޗޭންޖާ ލައިސެންސް ލިބިގެން ބޭރު ފައިސާ ގަނެ ވިއްކާ ފަރާތްތަކުން ކަންތައް ކުރަންވީ ގޮތުގެ ގަވާއިދު" ބުނާ ގޮތުން، އެ ހުއްދަ ބާތިލުކުރެވޭނެ އޮންނަނީ އެންމެ ހާލަތެކެވެ. އެއީ، އެ އުސޫލުގެ އަށް ވަނަ މާއްދާގައި ބުނާ ކޮންމެ މީލާދީ މަހެއްގެ ގަނެ ވިއްކި ފައިސާގެ ހިސާބުތައް ބަޔާންކުރާ ރިޕޯޓު ހުށަނާޅާ ނަމަ އެވެ.
މި ރިޕޯޓަކީ ކޮންމެ މީލާދީ މަހެއް ނިމުމުން، ޖެހިގެން އަންނަ މަހުގެ 10 ވަނަ ދުވަހުގެ ކުރިން އެމްއެމްއޭ އަށް ހުށަހަޅަން ޖެހޭ ރިޕޯޓެކެވެ. މި ރިޕޯޓު ހުށަނާޅާ ޖެހިޖެހިގެން ތިން މަސް ވެއްޖެ ފަރާތެއްގެ މަނީ ޗޭންޖާ ލައިސެންސް ބާތިލުކުރުމުގެ އިހުތިޔާރު އެ އިދާރާއަށް ލިބެ އެވެ.
މިތަންތަނުގެ ލައިސެންސް ހިފެހެއްޓުމުން މިހާރު ރާއްޖޭގައި ބޭރު ފައިސާ ގަނެ ވިއްކުމުގެ ހުއްދަ އޮންނަނީ 279 ފަރާތަކަށެވެ. އޭގެ ތެރެއިން 90 ޕަސެންޓާ ގާތްކުރާ އަދަދަކަށް ހުއްދަތައް ދީފައި ހުރީ ރިސޯޓުތަކަށާއި އެހެނިހެން ޓޫރިޒަމް ވިޔަފާރިތަކަށެވެ.
މިހާ ގިނަ އަދަދަކަށް މަނީ ޗޭންޖާ ހުއްދަތައް ދޫކޮށްފައި ހުރި ނަމަވެސް، އާންމުކޮށް ބާޒާރުގައި ބޭރު ފައިސާ ގަނެ ވިއްކަނީ މަދު ވިޔަފާރިތަކަކުންނެވެ.
މަނީ ޗޭންޖާ ހުއްދަތައް ދޫކޮށްފައިވާ ވިޔަފާރިތައް ގިނަ ކަމަށް ދެކިގެން، އެމްއެމްއޭ އިން ވެސް ވަނީ އޮކްޓޫބަރު 2020 އިން ފެށިގެން އިތުރު ފަރާތްތަކަށް މަނީ ޗޭންޖާ ހުއްދަ ދިނުން ހުއްޓާލާފަ އެވެ.
އޭގެ އިތުރުން އެމްއެމްއޭ އިން އަންނަނީ މަނީ ޗޭންޖާ ގަވާއިދު އިސްލާހުކުރުމުގެ މަސައްކަތް ވެސް ކުރަމުންނެވެ. މިހާރު އަމަލުކުރަމުންދާ މަނީ ޗޭންޖާ ގަވާއިދަކީ 1987 ވަނަ އަހަރު އެކުލަވާލާ އަމަލުކުރަން ފެށި ގަވާއިދެކެވެ.
