ބެލްގްރޭޑް، ސާބިއާ (ޖެނުއަރީ 5) - ހާއްސަ މެޑިކަލް ހުއްދައަކާ އެކު ދުނިޔޭގެ އެއް ވަނަ ފިރިހެން ޓެނިސް ކުޅުންތެރިޔާ ނޮވަކް ޖޮކޮވިޗަށް މި މަހު ފަހު ކޮޅު ބާއްވާ އޮސްޓްރޭލިއަން އޯޕަން ޓެނިސް މުބާރާތުގައި ވާދަކުރުމުގެ ފުރުސަތު ދީފި އެވެ.
އޮސްޓްރޭލިއަން އޯޕަންގެ ސިއްހީ ގައިޑްލައިންތަކުގައި އޮތް ގޮތުން މުބާރާތުގައި އުޅޭ ހުރިހާ ކުޅުންތެރިންނާއި އޮފިޝަލުން ކޮވިޑް ވެކްސިން ފުރިހަމަ ކޮށްފައިވާކަން މުބާރާތް އިންތިޒާމްކުރާ ފަރާތަށް ކަށަވަރުކޮށްދޭން ޖެހޭނެ އެވެ. އަދި ކޮވިޑް ވެކްސިން ނުޖަހާނަމަ މުބާރާތުގައި ބައިވެރިވެވޭނީ ވެކްސިން ނުޖަހަނީ ބަލި ހާލަތެއްގެ ސަަބަބުން ސިއްހީ މާހިރެއްގެ ލަފާގެ މަތިން ކަމަށް ސާބިތުކޮށްދޭ "މެޑިކަލް އެގްޒެމްޕްޝަން" ލިޔެކިޔުން ހުށަަހަޅަން ޖެހޭނެ އެވެ. ޖޮކޮވިޗް، އޮސްޓްރޭލިއަން އޯޕަންގައި ބައިވެރިވީ މެޑިކަލް އެގްޒެމްޕްޝަން ކޯޓާގެ ތެރެއިންނެވެ.
އެ އުސޫލުގެ ތެރެއިން އޮސްޓްރޭލިއަން އޯޕަންގައި ބައިވެރިވާން 26 ކުޅުންތެރިއަކު ލިޔެކިޔުން ހުށަހަޅާފައިވާއިރު، މިހާތަނަށް އެ ފުރުސަތު ދިނީ ޖޮކޮވިޗް ހިމެނޭ ގޮތަށް މަދު ކުޅުންތެރިއަކަށެވެ.
އޮސްޓްރޭލިއަން އޯޕަންގެ ޗީފް، ކްރެއިގް ޓައިލީ ވިދާޅުވީ ޖޮކޮވިޗް ބައިވެރިކުރަން ވަކިން ހާއްސަކަމެއް ނުކުރާ ކަމަށާއި ހުރިހާ ކަމެއް ދަނީ އުސޫލުގެ ތެރެއިންކަން ކަށަވަރު ކުރާނެ ކަަމަށެވެ.
"ޖޮކޮވިޗް ވެގެން ވަކި ހާއްސަ ގޮތަކަށް އަހަރެމެން ކަންތައް ކޮށްދީފައެއް ނޯންނާނެ. އެއް އުސޫލެއް ކޮންމެ ޓެނިސް ކުޅުންތެރިއަކަށް ވެސް އޮންނާނީ. އޭގެ ބޭރުން އެއްވެސް ކަމެއް ނުކުރާނަން،" ޓައިލީ ވިދާޅުވި އެވެ.
ޓައިލީ ވިދާޅުވީ ވެކްސިން ދެ ޑޯޒް ފުރިހަމަނުކުރާ ކުޅުންތެރިން ވެސް އޮސްޓްރޭލިއަން އޯޕަންގައި ކުޅޭނެ ކަމަށެވެ. އެކަމަކު، އޭގެ ތެރޭގައި ޖޮކޮވިޗް ހިމެނޭތޯ ސުވާލުކުރުމުން ޓައިލީ ބުނީ ވަކިވަކި ކުޅުންތެރިންގެ ޒާތީ މައުލޫމާތު އާންމު ކުރުމަކީ އުސޫލުގެ ތެރެއިން ނުކުރެވޭނެ ކަމެއް ކަމަށެވެ.
ދާދި ފަހުން ކޮވިޑަށް ވެސް ޕޮޒިޓިވްވި އުމުރުން 34 އަހަރުގެ ޖޮކޮވިޗަށް މި ފަހަރުގެ އޮސްޓްރޭލިއަން އޯޕަން ހާއްސަ މުބާރާތަކަށް ހެދިދާނެ އެވެ. އޮސްޓްރޭލިއަން އޯޕަން ތަށި ހޯދައިފިނަމަ ޖޮކޮވިޗަށް ގްރޭންޑް ސްލޭމް މުބާރާތްތައް ކާމިޔާބު ކުރުުމުގެ ރެކޯޑެއް ގާއިމްކުރެވޭނެ އެވެ.
މެލްބަން ޕާކުގައި ކުރިއަށްދާ އޮސްޓްރޭލިއަން އޯޕަން އޮތީ މި މަހު 17-30 އަށެވެ.
