ބެއިޖިން، ޗައިނާ (ޖެނުއަރީ 4) - ނިޔުކްލިއާ ހަތިޔާރު ފެތުރުން ހުއްޓުވަން އެއްބަސްވެ ގައުމުތަކުން ބަޔާނެއް ނެރުމާ އެކު، އެމެރިކާ އާއި ރަޝިއާގެ ހަތިޔާރުތައް މަދު ކުރަން ޗައިނާ އިން ގޮވާލައިފި އެވެ.
އެމެރިކާ، ޗައިނާ، ރަޝިއާ، އިނގިރޭސިވިލާތް އަދި ފްރާންސް ގުޅިގެން ނެރުނު ބަޔާނެއްގައި ބުނީ އެޓޮމިކް ހަތިޔާރު ނެތް ދުނިޔެއެއް ބިނާކޮށް، ނިޔުކްލިއާ ހަމަނުޖެހުމަކާ ދުރަށް ދާން މަސައްކަތް ކުރާނެ ކަމަށެވެ.
އެޓޮމިކް ހަތިޔާރުތައް އެއްކޮށް ނައްތާލުމުގެ މަސައްކަތް މުސްތަގްބަލުގައި ކުރަން ވައުދުވާ ކަމަށް ވެސް ފަސް ގައުމުން ބުންޏެވެ. ދުނިޔޭގައި މިހާތަނަށް އެޓޮމިކް ހަތިޔާރު ބޭނުން ކުރީ އެންމެ ފަހަރަކު އެވެ. އެއީ ދެ ވަނަ ބޮޑު ހަނގުރާމައިގެ ފަހުކޮޅު އެމެރިކާ އިން ޖަޕާނަށް ބޮން އެޅުމަށެވެ.
ނިޔުކްލިއާ ހަތިޔާރާ ދުރަށް ދާން ގައުމުތަކުން ވައުދުވި ނަމަވެސް އެކަން އަމަލުން ދެއްކުމަކީ އުނދަގޫ ކަމެއް ކަމަށް އެނެލިސްޓުން ބުނެ އެވެ. އެގޮތުން ޗައިނާ އިން ނިޔުކްލިއާ ހަތިޔާރު ފުޅާ ކުރާ ކަމަށް އެމެރިކާ އިން ތުހުމަތު ކުރެ އެވެ.
ނިޔުކްލިއާ ހަތިޔާރު ފުޅާ ކުރުމުގެ ސިޔާސަތު ދިފާއުކޮށް ޗައިނާ އިން އަންގާރަ ދުވަހު ބުނީ އެންމެ ފުރަތަމަ އަމަލުން މިސާލު ދައްކަން ޖެހޭނީ އެމެރިކާ އާއި ރަޝިއާ ކަމަށެވެ. މި ވަގުތު އެންމެ ގިނަ ނިޔުކްލިއާ ހަތިޔާރު ހުރީ އެ ދެ ގައުމުގަ އެވެ.
"ދުނިޔޭގައި މި ވަގުތު ހުރި ނިޔުކްލިއާ ހަތިޔާރުގެ 90 ޕަސެންޓު ނިސްބަތް ވަނީ އެމެރިކާ އާއި ރަޝިއާ އަށް،" ޗައިނާ ފޮރިން މިނިސްޓްރީގެ އޮފިޝަލަކު ބުންޏެވެ.
އޭނާ ވިދާޅުވީ ޗައިނާ އިން ނިޔުކްލިއާ ހަތިޔާރު ގެންގުޅެނީ އެ ގައުމުގެ ސަލާމަތަށް ބޭނުންވާ މިންވަރަށް އެކަނި ކަމަށާއި، ނިޔުކްލިއާ ހަތިޔާރު ބޭނުން ނުކުރުމުގެ ސިޔާސަތެއް އޮންނަ ކަމަށެވެ. ނަމަވެސް ޗައިނާ އިން ދާނީ ނިޔުކްލިއާ ހަތިޔާރު ޒަމާނީ ކުރުމުގެ މަސައްކަތް ކުރަމުން ކަމަށް އޮފިޝަލް ބުންޏެވެ.
