މީހަކަށް އެޕާޓްމަންޓެއް ދޭނެ ކަމަށް ބުނެ އޮޅުވާލައިގެން ފައިސާ ނެގި ދެ މީހަކު އުޅޭ ވަކިތަނެއް ނޭނގޭތީ އެ ދެމީހުން ހޯދަން ފުލުހުން އިއުލާނުކޮށް، ފޮޓޯ އާއްމުކޮށްފި އެވެ.
އުޅޭ ވަކިތަނެއް ނޭނގޭތީ، ފުލުހުންގެ އިދާރާއަށް ހާޒިރުވާން އާއްމު އިއުލާނަކުން އެންގީ މާމިގިލި، ނޭޕާލް، އާއިޝަތު މާޝާ ޝާހީން، 26، އާއި ހއ. ހޯރަފުށި، އަޝްރަފީގެ، ނައުފަލް އަހުމަދު، 27، އަށެވެ. އެ ދެ މީހުން އެޕާޓްމަންޓެއް ކުއްޔަށް ދޭނެ ކަމަށް ބުނެ އޮޅުވާލައިގެން ފައިސާ ހޯދި ކަމަށް ތުހުމަތުކޮށް، މީހަކު މައްސަލަ ހުށަހެޅީ، ގަލޮޅު ޕޮލިސްއަށެވެ.
ފުލުހުން މިއަދު ކުރި އިއުލާނުގައި ބުނީ ޖެނުއަރީ 13 ވަނަ ދުވަހުގެ ހެނދުނު 10:00 އަށް އެ ދެ މީހުން ފުލުހުންގެ މައި އިދާރާ، ޝަހީދު ހުސައިން އާދަމް ބިލްޑިންގް އަށް ހާޒިރުވާން އަންގާ ކަމަށެވެ.
އެޕާޓްމަންޓް ކުއްޔަށް ދޭނެ ކަމަށް ބުނެ އޮޅުވާލައިގެން މީހުން އަތުން ފައިސާ ނެގުމުގެ ގިނަ މައްސަލަތަކެއް ފަހަކަށް އަައިސް ފުލުހުންގެ އިދާރާއަށް ހުށަހަޅާފައި ވާއިރު، އޭގެ ބައެއް މައްސަލަތައް ތަހުގީގުކޮށް، ދައުވާކުރަން ވެސް ވަނީ ފޮނުވައިފަ އެވެ. އެފަދަ ބައެއް މައްސަލަތައް ކޯޓްތަކުގައި ވެސް ކުރިއަށް އެބަ ދެ އެވެ. އެފަދަ އޮޅުވައިލުންތަކުގައި އެެތައް މިލިޔަން ރުފިޔާއެއް ހޯދާފައިވާ ކަމަށް ތުހުމަތު ކުރެވެ އެވެ.
