ޔުނައިޓެޑް އަރަބް އެމިރޭޓްސް (ޔޫއޭއީ)ގެ ވެރިރަށް އަބޫދާބީގައި އަންނަ މޭމަހު ބާއްވާ ބޮޑު ކަލިނަރީ ހަރަކާތެއް ކަމަށްވާ "ވޯލްޑް ޝެފްސް ކޮންގްރެސް އެންޑް އެކްސްޕޯ 2022" ގައި ހަ ޝެފަކު ބައިވެރިކުރަން، ބެސްޓްބައި މޯލްޑިވްސް (ބީބީއެމް) އިން ސްޕޮންސާ ދީފި އެވެ.
ބީބީއެމް އިން ނެރުނު ބަޔާނެއްގައި ބުނީ އަބޫދާބީ ގައި ބާއްވާ އެ އެކްސްޕޯގައި ބައިވެރިވާން އެ ކުންފުނިން ސްޕޮންސާ ދިނީ ފެކަލްޓީ އޮފް ހޮސްޕިޓަލިޓީ އެންޑް ޓޫރިޒަމް ސްޓަޑީސްގައި ކިޔަވާ ހަ ދަރިވަރަކަށް ކަމަށެވެ.
ވޯލްޑް ޝެފްސް ކޮންކްރެސް އަކީ ދުނިޔޭގެ ހުރިހާ ހިސާބަކުން ޝެފުން އެއްތަނަކަށް އެއްވެ، މަސައްކަތުގެ ދާއިރާއިން ގުޅުން ބަދަހިކޮށް، ތަޖުރިބާ ހިއްސާކުރާ ބޮޑު މަހާސިންތާ އެކެވެ. ކަލިނަރީ އިންޑަސްޓްރީގެ އެންމެ ނަގާކިޔާ ޝެފުން އެ މަހާސިންތާގައި ވޯކްޝޮޕްތައް ހިންގައި ހުށަހެޅުންތައް ހުށަހަަޅާނެ އެވެ. އެ ދާއިރާއިން ތަމްރީނުވާ ދަރިވަރުންނަށް ތައުލީމީ ގޮތުން ވަރަށް ބޮޑު ފައިދާއެއް ކުރާ ގޮތަށް ކުރިއަށް ގެންދާ ވޯލްޑް ޝެފްސް އެޑިއުކޭޓާސް ފޯރަމް އަކީ ވެސް އެ މަހާސިންތާގެ ބައެކެެވެ.
ޝެފުންގެ އާ ޖީލަށް ބޮޑު ކުރިއެރުމެއް ގެނެސްދޭ "ބިލް ގަލަގާ ޔަންގް ޝެފްސް ފޯރަމް އަދި ގްލޯބަލް ޝެފްސް ޗެލެންޖް ކަލިނަރީ ކޮމްޕެޓިޝަން ފަދަ ބައިނަލް އަގުވާމީ ބޮޑެތި އެގްޒިބިޝަންތައް ވެސް އެހަރަކާތުގައި ހިމެނޭނެ އެވެ.
މީގެ 92 އަހަރު ކުރިން ފެށިގެން ބާއްވަމުން އަންނަ އެހަރަކާތް މިހައިތަނަށް 38 ގައުމެއްގައި ބާއްވާފައި ވާއިރު، އެއީ ކަލިނަރީ އިންޑަސްޓްރީގެ އެހާރާއި މިހާރުގެ ތަޖުރިބާ ހޯދަން ބޭނުންވާ ޝެފުންނަށް ރަނުގެ ފުރުސަތެކެވެ.
ރާއްޖެއަށް ފުޅާ ދާއިރާއެއްގައި ކާބޯތަކެތި ސަޕްލައިކުރާ ބީބީއެމްއިން އަންނަނީ މޮޅެތި ޝެފުން އުފެއްދުމަށް ޓަކައި ބައިނަލް އަގުވާމީ ތަފާތު ގިނަ ހަރަކާތްތަކުގައި ރާއްޖޭގެ ޝެފުން ބައިވެރިވުމުގެ ފުރުސަތު ހޯދައިދެމުންނެވެ. ބައިނަލް އަގުވާމީ ކޮންފަރެންސްތަކާއި އެކްސްޕޯތަކާއި ތަމްރީނުތައް އޭގެ ތެރޭގައި ހިމެނެ އެވެ. އެ ކުންފުނީގެ އެހީގައި ދިޔަ ޝެފުން ވަނީ އެ ދާއިރާއިން އެތައް ފަހަރަކު ރާއްޖެ ފަޚުރުވެރިކޮށްދީފަ އެވެ.
ޔުނިލިވާ، އައިއާރްއީކޭއެސް، ލޭމްބް ވެސްޓަން، ޓީ ޑަބްލިއުޖީ ޓީ، ސެން ބެނެޑެޓޯ، ރާވީ ފްރުޓް ފަދަ ބްރޭންޑްތައް ރާއްޖެއަށް އެތެރެކުރަނީ އެކުންފުނިންނެވެ.
