މިއަހަރުގެ ތެރޭގައި މުދަލު ޒަކާތުގެ ގޮތުގައި ރާއްޖޭގެ ހުރިހާ ރަށަކުން ޖުމްލަ 85 މިލިއަން ރުފިޔާ ލިބިފައިވާ ކަމަށާއި، މިއީ ރާއްޖޭގެ ރިކޯޑް އަދަދެއް ކަމަށް އިސްލާމިކް މިނިސްޓަރު، ޑރ. އަހްމަދު ޒާހިރު އަލީ ވިދާޅުވެއްޖެ އެވެ.
މުދަލު ޒަކާތް ކުރިން ދައްކަނީ އިސްލާމިކް މިނިސްޓްރީއަށެވެ. ނަމަވެސް 2016 ވަނަ އަހަރުން ފެށިގެން މުދަލު ޒަކާތް ބަލައިގަތުން ވަނީ މީރާއަށް ބަދަލު ކޮށްފަ އެވެ.
ގިނަ ބަޔަކު މިއަހަރު މުދަލު ޒަކާތް ދައްކާފައިވާތީ މިނިސްޓަރު ޒާހިރު ވަނީ އެކަމާ އުފާކުރައްވާފަ އެވެ.
ރާއްޖޭގައި މުދަލު ޒަކާތުގެ ނިސޯބަކީ 6878.20 ރުފިޔާ އެވެ. މުދަލުގެ ޒަކާތަކީ އެމީހެއްގެ މުދަލުގައި ނިސާބު ހަމަވާތާ އަހަރެއް ފުރިފައިވާ ކޮންމެ މީހެއްގެ މައްޗަށް އޮތް ދީނީ ވާޖިބެކެވެ. އެގޮތުން އަހަރުގެ ކޮންމެ ދުވަސްވަރެއްގައި ވެސް މުދަލުގެ ޒަކާތް ދެއްކޭނެ އެވެ.
ޒަކާތަކީ އިސްލާމްދީނުގެ ތިންވަނަ ރުކުނެވެ.
މުދަލު ޒަކާތުގެ ބެހެނިވެރިންގެ ގޮތުގައި އަށް ބައެއް ކީރިތި ގުރުއާނުގައި ﷲ ކަނޑައަޅުއްވާފައި ވެއެވެ. އެއީ
- ފަގީރުން
- މިސްކީނުން
- އާމިލުން (ޒަކާތް ނެގުމާއި ބެހުމުގެ މަސައްކަތުގައި އުޅޭ މީހުން)
- އަލަށް އިސްލާމްވާ މީހުން
- އަޅުން މިނިވަންކުރުން
- ދަރަނިވެރީން
- ﷲ ގެ މަގުގައި (ޖިހާދުކުރުމަށް)
- ދަތުރު މަތީގައި ހާލުގައި ޖެހޭ މީހުން
