އޭވިއޭޝަން ދާއިރާއަށް ދިވެހި ޒުވާނުން ބިނާކުރުމުގެ ބޭނުމުގައި މަންޓާ އެއާ އިން ފެށި "މަންޓާ ވިންގްސް" އެޕްރެންޓިސްޝިޕް ޕްރޮގްރާމް ފުރަތަމަ 10 ބައިވެރިންނާއެކު މިއަދު އިފްތިތާހުކޮށްފި އެވެ.
ނައިބު ރައީސް ފައިސަލް ނަސީމް ޝަރަފުވެރިކޮށްދެއްވި ހަފުލާއެއްގައި މި ޕްރޮގްރާމު އިފްތިތާހުކުރުމުގެ ގޮތުން މި އެޕްރެންޓިސްޝިޕް ޕްރޮގްރާމުގެ ބައިވެރިންނާ އެންރޯލްމަންޓް ސެޓިފިކެޓްތައް ވަނީ ހަވާލުކޮށްފަ އެވެ.
މަންޓާ އެއާ އިން ފެށި މި ޕްރޮގްރާމުގެ ބޭނުމަކީ އޭވިއޭޝަނުގެ އެކިއެކި ދާއިރާތަކަށް ބޭނުންވާ ޒުވާނުން ތަމްރީނުކުރުން ކަމަށް އެ އެއާލައިނުން ބުނެ އެވެ.
އެގޮތުން ހަ މަސް ދުވަހަށް ދެމިގެންދާ މި އެޕްރެންޓިސްޝިޕް ޕްރޮގްރާމުގެ ބައިވެރިންނަށް ފުރިހަމައަށް ހިދުމަތް ދޭން ބޭނުންވާ ފަންނުތައް ކިޔައިދީ، ދާއިރާއަށް އަހުލުވެރިކުރެވިގެން ދާނެ އެވެ. އަދި ކްލާސްރޫމް ޓްރެއިނިންތައް ހިމެނޭ ގޮތަށް ދާއިރާގެ އަމަލީ ތަޖުރިބާ ސީދާ މަސައްކަތުގެ މާހައުލުން ލިބިގެންދާނެ އެވެ.
ކްލާސްރޫމް ޓްރެއިންނިންތަކުގައި ހިމެނޭ ބައިތައް
- ލީޑާޝިޕް އިން އިންފޮމޭޝަން އޭޖް
- ސާވިސް ކަލްޗާ
- ޑިޖިޓަލް ޓޫލްސް ފޯ މޮޑާން ޑޭ ވާކްފޯސް
- އެކްސެލް އިން ޕްރެޒެންޓޭޝަން ސްކިލްސް
މަންޓާ ވިންގްސް އެޕްރެންޓިސްޝިޕް ޕްރޮގްރާމާ ގުޅިގެން މަންޓާ އެއާގެ ސީއީއޯ މުހައްމަދު ހަލީލް ވިދާޅުވީ، މިއީ މި ސިނާއަތަށް ބޭނުންވާ އިންސާނީ ވަސީލަތް ބިނާކުރަން އެ އެއާލައިނުން ފެށި ޕްރޮގްރާމެއް ކަމަށެވެ. އަދި، މި ޕްރޮގްރާމުގެ މައިގަނޑު މަގުސަދަކީ އޭވިއޭޝަން ސިނާއަތަށް ބޭނުންވާ ގާބިލު ދިވެހި ޒުވާނުން ނެރެން ފުރުސަތު ދިނުން ކަމަށް އޭނާ ވިދާޅުވި އެވެ.
"މިއަދު މި އިފްތިތާހުކުރާ މަންޓާ ވިންގްސް ޕްރޮގްރާމަކީ ޒުވާނުން މި ސިނާއަތަށް ނެރުމަށްޓަކައި ހުޅުވިގެންދާ އާ ދޮރެއް. މި ޕްރޮގްރާމުން އަޅުގަނޑުމެންގެ އެންމެ ބޮޑު މަގުސަދަކީ އިހުލާސްތެރި ހީވާގި މަސައްކަތްތެރި ކެރޭ ޒުވާނުންތަކެއް އުފައްދާ، ޒުވާނުން ހަރުދަނާ ބަޔަކަށް ހެދުން،" އޭނާ ވިދާޅުވި އެވެ.
މި ޕްރޮގްރާމުގެ ބައިވެރިންނަށް މި ފުރުސަތުގެ ބޭނުން ރަނގަޅު ގޮތުގައި ހިފަން އިލްތިމާސްކުރަމުން ހަލީލު ވިދާޅުވީ މި ދާއިރާއިން ތަމްރީނު ހޯދާ، މި ދާއިރާއިން ކުރިޔަށްދާން މުސްތަގުބަލު ރާވާ ބިނާކުރަން ނަސޭހަތްތެރިވާ ކަމަށެވެ. އަދި މިއީ ރާއްޖެ އާއި ރާއްޖޭން ބޭރުން ވެސް ފުރުސަތު ހުރި، ރަނގަޅު އާމްދަނީއެއް ލިބޭ ވަޒީފާތަކެއް ހިމެނޭ ދާއިރާތަކެއްކަން އޭނާ ފާހަގަކުރެއްވި އެވެ.
އޭގެ އިތުރުން އޭވިއޭޝަނަކީ ހަމައެކަނި ޕައިލެޓުންނާއި ކެބިން ކްރޫއިން ނޫން ކަމަށާއި، އިންޖިނިއަރުންނާއި ގްރައުންޑް ހޭންޑްލިން އާއި ސޭފްޓީ އެންޑް ސެކިއުރިޓީގެ އިތުރުން ކަސްޓަމާ ސާވިސަސް ދާއިރާއިން ވެސް އޭވިއޭޝަނުގައި ފުރުސަތުތައް ހުރިކަމަށް ހަލީލު ވިދާޅުވި އެވެ.
މަންޓާ ވިންގްސް އެޕްރެންޓިސްޝިޕް ޕްރޮގްރާމުގެ ފުރަތަމަ ބެޗު ފެށީ ދެ ފިރިހެން ކުދިންނާއި، އަށް އަންހެން ކުދިން ހިމެނޭ ގޮތަށެވެ. މި ޕްރޮގްރާމު ކާމިޔާބުކަމާއެކީ ނިންމާ ކުދިންނަށް މަންޓާއެއާއާއެކީ އޭވިއޭޝަން ކެރިއަރެއް ފަށަން ފުރުސަތު ލިބޭނެ އެވެ.
ރާއްޖޭގެ އެންމެ ހަގު އެއާލައިން ކަމުގައިވާ މަންޓާ އެއާ އިން މި ދާއިރާއިން ދިވެހިން ބިނާކުރުމަށާއި، ދިވެހިންނަށް ފުރުސަތު ދޭން ހާއްސަ މަސައްކަތްތަކެއް ދަނީ ކުރަމުންނެވެ. މިހާރު ވެސް އެ ކުންފުނީގައި ވަޒީފާ އަދާކުރާ 400 އެއްހާ މުވައްޒަފުންގެ ތެރެއިން 75 ޕަސެންޓަކީ ދިވެހިންނެވެ.
