އެންޓި ކޮރަޕްޝަން ކޮމިޝަނުގައި މިހާރު ތިއްބެވި ތިން މެމްބަރުން ވަކިކުރަން ރައްޔިތުންގެ މަޖިލީހުން މިހާރު ކުރިޔަށް ގެންދާ މަރުހަލާއަކީ، "ތެދުވެރިކަން ދޭހަކޮށްދޭ" ކަމެއް ކަމަށް އެ މެމްބަރުން ސިފަކުރައްވައިފި އެވެ.
އެކޮމިޝަނުގައި މިހާރު ތިއްބެވީ ކޮމިޝަނުގެ ރައީސް މަރިޔަމް ޝިއުނާއާއި ނައިބު ރައީސް ފާތިމަތު އަނޫލާއާއި މެމްބަރު އައިޝަތު އަބްދުﷲ އެވެ.
އެ މެމްބަރުންގެ އަމިއްލަ ދިފާއުގައި ތައްޔާރުކޮށް، އޭސީސީގެ ރަސްމީ ވެބްސައިޓްގައި މިއަދު ޖެހި ދިގު ބަޔާނެއްގައި ބުނީ ކޮރަޕްޝަނާ ދެކޮޅަށް ކުރާ މަސައްކަތުގައި، އެ މަސައްކަތުގެ ތެދުވެރިކަން މިންކުރަން ބޭނުންކުރާ އެއް މިންގަނޑަކީ، އެ މަސައްކަތްކުރާ މީހުންނަށް ނަފުރަތުކޮށް މަސައްކަތް ނާކާމިޔާބު ކުރުވައި، އެ މަސައްކަތްކުރާ މީހުން ބަލިކަށިކޮށްލަން މަސައްކަތްކުރާ މީހުން ގިނަވުން ކަމަށެވެ.
"މި މިންގަނޑުން ބަލާއިރު، ކޮމިޝަނުން މަސްއޫލިއްޔަތު އަދާކުރަމުން މިހާތަނަށް އައިސްފައި މިވަނީ ރަނގަޅަށް ކަމަށް ކޮމިޝަނުން ޤަބޫލުކުރަމެވެ،" އޭސީސީގެ ބަޔާނުގައި ބުންޏެވެ.
އޭސީސީގެ މެމްބަރުން މިހެން ވިދާޅުވި އިރު، އެ މެމްބަރުން ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ފުރަތަމަ ވެސް ނިންމީ އޮޑިޓާ ޖެނެރަލްގެ އޮފީހުން ކުރި ޕާފޯމެންސް އޮޑިޓެއްގެ ހޯދުންތަކަށް ބިނާކޮށްގެންނެވެ. އެ އޮޑިޓް ހަދަން މަޖިލީހުން އޮޑިޓާ ޖެނެރަލްގެ އޮފީހާ ހަވާލުކުރީ އެކި މިދިޔަ ދެ އަހަރު ތެރޭގައި އޭސީސީއާ އެކު ގިނަ ބައްދަލުވުންތަކެއް ބާއްވައި، އެކި އެކި މައްސަލަތައް ނިންމަން އޭސީސީން ކޮމިޓީއަށް ދިން މުހުލަތުތައް ފަހަނަ އަޅައި ދިޔަ ފަހުންނެވެ.
އޮޑިޓް ރިޕޯޓްގައިވާ ގިނަ ހޯދުންތަކަށް ވަކިވަކިން ރައްދު ދިނުމަށް އޭސީސީގެ ބަޔާނުގައި ޖުމްލަ 23 ނުކުތާއެއް ހިމަނާފައި ވެ އެވެ. އޭގެ އެންމެ ފަހު ނުކުތާގައި ބުނީ ކޮމިޝަނުގެ މަސައްކަތްތައް އިސްލާހުކުރަން ލަފާދީފައިވާ ގިނަ ކަންތައްތަކަކީ މިހާރު ވެސް އެކި މަރުހަލާގައި ހިންގަމުން އަންނަ މަސައްކަތްތައް ނުވަތަ ނިމިފައިވާ މަސައްކަތްތައް ކަމަށެވެ.
"...ކޮމިޝަނުން ކުރަމުންދާ ނުވަތަ އިސްލާހުކޮށްފައިވާ މަސައްކަތްތަކެއް އަލުން އިސްލާހުކުރަން ލަފާ ދީފައިވަނީ ކޮން އަސާސެއްގެ މައްޗަށް ބިނާކޮށްފައިކަން، ރިޕޯޓުގައި ސާފެއް ނުވެ އެވެ،" އޭސީސީގެ ބަޔާނުގައި ބުންޏެވެ.
އޭސީސީގެ މެމްބަރުން ވަކިކުރަން މަޖިލީހަށް ހުށަހަޅީ އެކޮމިޝަން ވެސް ހިމެނޭ ގޮތުން މިނިވަން މުއައްސަސާތަކުގެ ކަންތައްތައް ބަލަން މަޖިލީހުގައި އޮންނަ ކޮމިޓީން ކަމަށް ވިޔަސް، ބަޔާނުގައި ތުހުމަތުކޮށްފައިވާ ގޮތުގައި ކޮމިޝަނަށް ފާޑުކިޔަނީ އެތަނުން ބަލާ މައްސަލަތަކުގައި މަސްލަހަތު އޮތް ފަރާތްތަކަކުންނެވެ.
"...އެފަދަ މީހުންގެ ސިޔާސީ މަސައްކަތްތައް ވަކި ޓާގެޓްތަކެއް ކަނޑައަޅައި ކޮމިޝަނާ ދެކޮޅަށް އަމާޒުކުރެ އެވެ. އަދި ނިޒާމުގެ އެތެރެއިންނާއި ބޭރުން އެކި ސިފަސިފައިގައި ކޮމިޝަނުގެ މަސައްކަތްތައް ފެއިލްކޮށްލުމަށް މަސައްކަތްކުރިތަން ފެނިގެންދިޔަ އެވެ. ނަތީޖާއަކަށް ވެގެންދިޔައީ މި ކޮމިޝަނުގެ ދައުރުގައި ވޭތުވެމިދިޔަ ދެ އަހަރު ތެރޭގައި ކޮމިޝަނުގެ މެމްބަރުންގެ އިތުބާރު ނެތްކަމުގެ ވޯޓު ނެގުމަށް ތަކުރާރުކޮށް މަސައްކަތް ކުރުމެވެ،" އޭސީސީގެ ބަޔާނުގައި ބުންޏެވެ.
އޭސީސީން މިފަދަ ބަޔާނެއް އާއްމުކުރީ މިނިވަން މުއައްސަސާތަކުގެ ކޮމިޓީއަށް ޖަވާބުދާރީ ވާން ދިން ފަސް ދުވަހުގެ މުހުލަތު ހަމަވުމުން، އެކޮމިޓީއަށް ލިއުމުން ޖަވާބު ދިނުމަށް ފަހުގަ އެވެ. އެ ޖަވާބުތަކަށް ފަހުގައި ވެސް ކޮމިޓީން މިއަދު ފާސްކުރީ އޭސީސީގައި މިހާރު ތިއްބެވި ތިން މެމްބަރުން ވަކިކުރަން މަޖިލީހުގެ ތަޅުމަށް ފޮނުވުމަށެވެ.
