އެންޓި ކޮރަޕްޝަން ކޮމިޝަން (އޭސީސީ) ގައި މިހާރު ތިއްބެވި ތިން މެމްބަރުން ވެސް ވަކިކުރަން ރައްޔިތުންގެ މަޖިލީހުގެ ތަޅުމަށް ހުށަހަޅަން، މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ފާސްކޮށްފި އެވެ.
އޭސީސީގެ ތިން މެމްބަރުން ވަކިކުރަން ތަޅުމަށް ހުށަހަޅަން ފާސްކުރީ ކޮމިޓީގެ އަދި މަޖިލީހުގެ ވެސް މެޖޯރިޓީ އޮންނަ އެމްޑީޕީގެ ފަސް މެމްބަރުންގެ ވޯޓުންނެވެ. ވިލިމާލެ ދާއިރާގެ އެމްއެންޕީ މެމްބަރު އަހުމަދު އުޝާމާއި އިސްދޫ ދާއިރާގެ ޖޭޕީ މެމްބަރު އަލީ ހަމީދު އެކަމަށް ތާއީދެއް ނުކުރައްވަ އެވެ.
އޭސީސީގެ މެމްބަރުން ވަކިކުރަން ތަޅުމަށް ފޮނުވަން ފާސްކުރަން ހުށަހެޅުއްވީ އިނގުރައިދޫ ދާއިރާގެ މެމްބަރު ހަސަން އަހުމަދު (ހަސަންޓޭ) އެވެ. އެ ހުށަހެޅުމަށް ތާއީދުކުރެއްވީ ބިލެއްދޫ ދާއިރާގެ މެމްބަރު ދޮންބިލެތް އަހުމަދު ހަލީމް އެވެ.
އޭސީސީގެ މެމްބަރުން ވަކިކުރަން ތަޅުމަށް ފޮނުވަން ތާއީދުކުރެއްވި މެމްބަރުން ވިދާޅުވީ ކޮމިޓީއަށް ޖަވާބުދާރީ ވާން އޭސީސީގެ މެމްބަރުންނަށް ދިން ފުރުސަތުގައި ދައްކަވާފައި ހުރީ އެކޮމިޓީގައި މީގެ ކުރިން ވެސް ތަކުރާރުކޮށް ދައްކަވާފައިވާ ވާހަކަތައް ކަމަށެވެ.
އިނގުރައިދޫ ދާއިރާގެ މެމްބަރު ހަސަން އަހުމަދު ވިދާޅުވީ އޭސީސީއަށް 2019 ވަނަ އަހަރު މެމްބަރުން އައްޔަންކުރީ ވަރަށް ފޮނި އުއްމީދެއްގައި ކަމަށެވެ. އޭގެ ފަހުން ދެއަހަރާ ތިންމަހަށް ވުރެ ގިނަ ދުވަސް ވީއިރު، އެތައް ފަހަރަކު ކަންތައްތައް ސާފުކުރަން ކޮމިޓީއަށް ގެނައި ކަމަށާއި އެގޮތަށް ގެނައި އިރު، އެކިފަހަރު އެކި ވާހަކަ ދައްކަވާ ކަމަށާއި ދައުލަތަށް ގެއްލފައިވާ ފައިސާ ތަކުގެ މައްސަލަ ނުހިނގާ ކަމަށް ވެސް އޭނާ ވިދާޅުވި އެވެ.
ކޮމިޝަނުން މަސައްކަތްކުރި ގޮތް ޕާފޯމެންސް އޮޑިޓުން ވަރަށް ސާފުކޮށް އެނގޭ ކަމަށާއި އެ ރިޕޯޓުގެ ހޯދުންތަކަށް ބިނާކޮށް، މެމްބަރުން ވަކިކުރަން ފާސްކުރަން ހުށަހަޅުއްވާ ކަަމަށް އޭނާ ވިދާޅުވި އެވެ.
ހަސަންޓޭގެ އެ ހުށަހެޅުމަށް ތާއީދު ނުކުރައްވައި އުޝާމާއި އަލީ ހަމީދު ވިދާޅުވީ އޭސީސީގެ މެމްބަރުން ޖަވާބުދާރީވާން ދިން ފުރުސަތުގައި ދެއްވި ޖަވާބުތަކާއި އޮޑިޓް ރިޕޯޓް ވެސް ދިރާސާކުރަން އެކަށީގެންވާ ވަގުތު ދޭން ޖެހޭ ކަމަށެވެ.
"ބަަލަންވާ މިންވަރަށް ބަލައި މިކަމާ ބެހޭ ގޮތުން އެއްޗެއް ދެންނެވުމަށް ޓަކައި މި ލިޔެކިއުންތައް ދިރާސާކުރާނެ އެކަށީގެންވާ ވަގުތު ބޭނުންވާކަން، މި ކޮމިޓީގެ ސަމާލުކަމަށް ޓަކައި މުގައްރިރުގެ ސަމާލުކަމަށް ޓަކައި ހަމަ ދަންނަވައިލަން،" ހަމީދު ވިދާޅުވި އެވެ.
އޭސީސީގެ މެމްބަރުން ވަކިކުރަން މަޖިލީހުގެ ތަޅުމަށް ހުށަހަޅަން ތާއީދުކުރައްވައި ބިލެއްދޫ ދާއިރާގެ މެމްބަރު އަހުމަދު ހަލީމް ވިދާޅުވީ އޭސީސީއަށް ކުރިމަތިވި ދަތިތަކަށް ކޮމިޓީން ރިއާޔަތްކޮށްފައިވާ ކަމަށާއި އެކަމަށް ވަގުތު ވެސް ދީފައިވާ ކަމަށެވެ.
"އެހެން ނޫން ނަމަ އަޅުގަނޑުމެންގެ މި މި މެޖޯރިޓީއާ އެކީ އަޅުގަނޑުމެން މާކުރިން އެބޭފުޅުން ވަކިކުރީސް،" އޭނާ ވިދާޅުވި އެވެ.
މެމްބަރުން ވަކިކުރަން ޖެހޭ ކަމަށް ގަބޫލުކުރައްވަނީ ހަމަ އެކަނި ޕާފޯމެންސް އޮޑިޓަށް ބައްލަވައިގެން ނޫން ކަމަށް ވެސް އޭނާ ވިދާޅުވި އެވެ.
އެކޮމިޝަނުގައި މިހާރު ތިއްބެވީ ކޮމިޝަނުގެ ރައީސް މަރިޔަމް ޝިއުނާ އާއި ނައިބު ރައީސް ފާތިމަތު އަނޫލާ އަދި މެމްބަރު އައިޝަތު އަބްދުﷲ އެވެ.
