ސެންޓްރަލް ޒޯން ވޮލީބޯޅަ މުބާރާތުގައި ގައުމީ އަންހެން ޓީމު ކުޅުނު ހަތަރު ވަނަ މެޗުން މިއަދު ކިރްގިސްތާން އަތުން ބަލިވެއްޖެ އެވެ.
މި ފަހަރުގެ މުބާރާތުގައި ނިސްބަތުން ޒުވާން ކުޅުންތެރިން ގިނަ ސްކޮޑަކާ އެކު ރާއްޖޭގެ އަންހެން ވޮލީ ޓީމުން ކުޅޭއިރު، ފުރަތަމަ ތިން މެޗުން ވަނީ އުޒްބެކިސްތާނާއި ނޭޕާލް އަދި ސްރީލަންކާ އަތުން ބަލިވެފަ އެވެ. މި މެޗުތަކުގައި ޖުމްލަ ކުޅުމަށް ބަލާއިރު، ދެ އަހަރު ދުވަހުގެ މެދުކެނޑުމަކަށް ފަހު އެނބުރި އައިސް ޒުވާން ކުޅުންތެރިންތަކަކާ އަޅާކިޔާއިރު، ކުރިއެރުންތަކެއް ފެނެ އެވެ.
މިއަދު ހެނދުނު ކިރްގިސްތާނާ ދެކޮޅަށް ކުޅުނު މެޗަށް ތައްޔާރުވާން ވޯމްއަޕް ކުރަމުން ދަނިކޮށް ޓީމަށް ރާއްޖޭގެ ޓީމަށް މި ފަހަރުގެ މުބާރާތުގައި މޮޅު ކުޅުމެއް ދައްކަމުން އަންނަ އައިމިނަތު އަފާފް ނިޒާމް ފަޔަށް އަނިޔާވެ، އޭނާ އަށް ނުކުޅެވުނެވެ. އަފާފްގެ އަނިޔާގެ ސަބަބުން ޓީމުގެ ކުޅުންތެރިންނަށް މޯރަލީ އަސަރުކުރި ކަމަށް ޓީމުގެ ކޯޗު މުމްތާޒް އަލީ (މުންތޭ) ވަނީ ބުނެފަ އެވެ.
ކިރްގިސްތާނުން މިއަދު ރާއްޖެއާ ދެކޮޅަށް ކުޅުނު މެޗުގެ ސެޓުތައް ގެންދިޔައީ 25-17، 25-11 އަދި 20-25 އިންނެވެ.
މިއަދުގެ މެޗުގެ ކުރިން ގައުމީ އަންހެން ޓީމު ނަގާފައިވާ ފޮޓޯއެއް.--
ފުރަތަމަ ސެޓުގައި ކިރްގިސްތާނުން ބޮޑު ލީޑެއް ނަގާފައިވަނިކޮށް، ރާއްޖޭން ވަނީ 10-09 އިން ޕޮއިންޓުގެ ފަރަގު ކުޑަކޮށްފަ އެެވެ. އެކަމަކު، ރާއްޖޭގެ ކުޅުންތެރިންނަށް ރިސީވާއި ބްލޮކް ނުކުރެވި، އަނެއްކާ ވެސް ކިރްގިސްތާނުން 13-09 އިން ލީޑު ބޮޑުކުރި އެވެ. ސެޓުގެ މެދަކާ ހަމައިން ކިރްގިސްތާނުގެ އެޓޭކްތައް ވަރުގަދަކޮށް ފެނުނުއިރު، ރާއްޖެ ޓީމުގައި ހިމެނޭ ތަޖުރިބާކާރު ކުޅުންތެރިޔާ އައިމިނަތު އަރީޝާގެ އެޓޭކްތަކާ އެކު މުހިއްމު ޕޮއިންޓްތަކެއް އެއްކުރި އެވެ. އެކަމަކު، ސެޓު ގެންދިއުމުގައި ކާމިޔާބު ހޯދީ ކިރްގިސްތާނުންނެެވެ. އެ ޓީމުން ފުރަތަމަ ސެޓު ގެންދިޔައީ 25-17 އިންނެވެ.
ދެ ވަނަ ސެޓު ފަށައިގެން ފުރަތަމަ ޕޮއިންޓް ރާއްޖޭން ނެގި ނަމަވެސް ދެން ފެނުނީ މުޅި ސެޓު ކަހަލަ ގޮތަކަށް އެއްވެސް ޕްރެޝަރެއް ނެތި ކިރްގިސްތާނުން ކުޅެލިތަނެވެ. ރާއްޖޭގެ ކުޅުންތެރިންގެ ފަރާތުން ޑިފެންސް ކުރުމުގައި ބޮޑު ގޯސްތަކެއް ފެނިގެންދިޔަ މި ސެޓު ކިރްގިސްތާނުން ގެންދިޔައީ 25-11 އިންނެވެ.
ކިރްގިސްތާނަށް ފުރަތަމަ ދެ ސެޓު ލިބުމާ އެކު ތިން ވަނަ ސެޓަށް އެ ޓީމުން ނުކުތީ ވަރަށް ކޮންފިޑެންސް ވަރުގަދަ ކޮށެވެ. ކިރްގިސްތާނުން ސެޓުގެ ފަށައިގެން ރާއްޖެ އަށް ޕޮއިންޓެއް ނުދީ ވަރަށް ބޮޑަށް ލީޑުފުޅާކުރި އެވެ. ރާއްޖޭން ވަނީ މި ސެޓުގައި ޓީމުގެ ކެޕްޓަން އަދި ސެޓަރު އައިމިނަތު އިމްތިނާން (ނާން)ގެ ބަދަލުގައި ހައިފާ އިމާދު ކުޅެން އަރުވައިފަ އެވެ.
ބަދަލަކަށް އަރައި ހައިފާގެ އިތުރުން ފާތިމަތު ސަމްހާ ވެސް ރަނގަޅަށް ކުޅުނު މި ސެޓުގައި އަރީޝާގެ އެޓޭކްތައް ވެސް ޖުމްލަ ގޮތެއްގައި ރަނގަޅެވެ. މި ސެޓު ރާއްޖޭން ނިންމާލީ މި ފަހަރުގެ މުބާރާތުގައި އެ ޓީމުގެ އެންމެ ސްކޯރިން ރަނގަޅު ސެޓުގެ ގޮތުގަ އެވެ. ކިރްގިސްތާނުން ސެޓު ގެންދިޔައީ 25-20 އިންނެވެ.
ރާއްޖޭން މުބާރާތުގައި ކުޅޭ ފަހު ސެޓުގައި މާދަމާ ނުކުންނާނީ ބަންގްލަދޭޝާ ދެކޮޅަށެވެ. ބަންގްލަދޭޝާއި ރާއްޖެ އަށް އަދި މި ފަހަރުގެ މުބާރާތުގައި މޮޅެއް ނުލިބެ އެވެ. ރާއްޖޭގެ އަންހެން ޓީމުން 2019 ވަނަ އަހަރު ރިހި މެޑަލް ހޯދިއިރު، ވަނީ ބަންގްލަދޭޝް އަތުން މޮޅުވެފަ އެވެ.
