ބަންގްލަދޭޝްގައި ކުރިއަށްދާ ސެންޓްރަލް ޒޯން އަންހެން ވޮލީބޯޅަ މުބާރާތުގައި މިއަދު ރާއްޖޭގެ ގައުމީ އަންހެން ވޮލީ ޓީމުން ކުޅުނު މެޗުން ނޭޕާލް އަތުން ތިން ސެޓުން ބަލިވެއްޖެ އެވެ.
ނޭޕާލާއި ރާއްޖެ ޓީމަކީ އެންމެ ފަހުން 2019 ވަނަ އަހަރު ބަންގްލަދޭޝްގައި ބޭއްވި ސެންޓްރަލް ޒޯން މުބާރާތުގެ ފައިނަލުގައި ކުޅުނު ދެ ޓީމެވެ. އެ ފަހަރު އޮތް ޓީމާއި މި ފަހަރުގެ މުބާރާތުގައި ވާދަކުރާ ދެ ޓީމަށް. ވެސް ވަނީ ބަދަލުތަކެއް އައިސްފަ އެވެ. ރާއްޖޭން އެ މުބާރާތުން ރިހި މެޑަލް ހޯދިއިރު، އެ ޓީމަށް ކުޅުނު ހަތަރު ކުޅުންތެރިން ފިޔަވައި މި ފަހަރު ގިނައީ ޒުވާން ކުޅުންތެރިންނެވެ.
މި ފަހަރުގެ މުބާރާތުގެ ފުރަތަމަ މެޗުގައި އިއްޔެ ރާއްޖެ ވަނީ އުޒްބެކިސްތާން އަތުން ވެސް ބަލިވެފަ އެވެ. އެ މެޗުގައި ރާއްޖޭން ފަހު ސެޓުގައި ދެެއްކި ރަނގަޅު ކުޅުން މިއަދު ނޭޕާލާ ދެކޮޅަށް ފުރަތަމަ ސެޓުގައި ވަނީ ތަކުރާރުކޮށްފަ އެވެ. އެކަމަކު، ފަހު ދެ ސެޓުގައި ނޭޕާލްގެ ކުޅުންތެރިންގެ މެޗު ތަޖުރިބާ ރަނގަޅުވުމާއި ކޮންފިޑެންސްގެ ތަފާތާ އެކު މެޗުން މޮޅުވީ އެވެ. ނޭޕާލުން ރާއްޖެ ކައިރިން ސެޓުތައް ގެންދިޔައީ 25-11، 25-09 އަދި 25-05 އިންނެވެ.
ފުރަތަމަ ސެޓުގައި ރާއްޖޭން ރަނގަޅަށް ފަށައި އާމިނަތު އަރީޝާ އާއި ޝަހާ ޝާމިންގެ އެޓޭކްތަކާ އެކު ނޭޕާލަށް ކޮންމެ ވެސް ވަރަކަށް ޕްރެޝަރު ކުރި އެވެ. ސާވިސް އާއި ޑިފެންސްގައި ވެސް ސެޓު ފަށައިގެން ރާއްޖޭގެ ޓީމުގެ ފަރާތުން ރަނގަޅު ކަންތައްތަކެއް ފެނުނެވެ. މެޗު ފެށިގެން 10-4 އިން ނޭޕާލުން ލީޑުނެގިތަނުން ރާއްޖޭގެ ޓީމުން ޓައިމްއައުޓެއް ނަގައިގެން ހަމަޔަކަށް އެޅުވޭތޯ ބެލި ނަމަވެސް ނޭޕާލްގެ އެޓޭކް ފެނުނީ ފަހަރަކަށް ވުރެ ފަަހަރެއް ވަރުގަދަކޮށެވެ. ނޭޕާލް ޓީމުގެ ތަޖުރިބާކާރު ކުޅުންތެރިންގެ ބޭނުންހިފައި އެ ޓީމުން ވަނީ ފުރަތަމަ ސެޓު 25-11 އިން ގެންގޮސްފަ އެވެ.
ނޭޕާލާ ދެކޮޅަށް މިއަދު ކުޅުނު މެޗުގެ ތެރެއިން ރާއްޖޭގެ ކުޅުންތެރިން.
ދެ ވަނަ ސެޓުގައި ވެސް ރާއްޖޭން ވަނީ ރަނގަޅަށް ފަށައިފަ އެވެ. އެކަަމަކު، ވަކި ހިސާބަކުން ނޭޕާލް ޓީމުން ގާތްގާތުގައި ގިނަ ޕޮއިންޓްތަކެއް އެއްކޮށް ބޮޑު ލީޑެއް ނެގީ އެވެ. ނޭޕާލުގެ ސާފިޔާ ޕުން އާއި ކެޕްޓަން އަރޫނާ ސާހީ އަދި ލިބަރޯ ޝާލިނާ ޝްރެސްތާގެ މޮޅު ކުޅުމާ އެކު އެ ޓީމުން މި ސެޓުތަކުގައި ތަފާތު ދެއްކި އެވެ.
ތިން ވަނަ ސެޓުގައި ނޭޕާލާއި ރާއްޖޭން ވެސް ކުޅުނީ ގިނަ ބަދަލުތަކެއް ގެނެސްގެންނެވެ. ނޭޕާލުން ސެޓު ފަށައި ވަރަށް ބޮޑު ލީޑެއް ނެގި އެވެ. މި ސެޓުގައި ނޭޕާލްގެ އެންމެ ހުނަރުވެރި ކުޅުންތެރިޔާ ޕްރަތީބާ މާލީ ވެސް ވަނީ ކުޅެން އަރުވައިފަ އެވެ. އަނިޔާއިން ރިކަވާވެގެން މި ފަހަރުގެ މުބާރާތުގައި ކުޅޭ ޕްރަތީބާގެ އެންމެ މޮޅު ކުޅުން އަދި ނުފެނެ އެވެ.
ސެންޓްރަލް ޒޯން މުބާރާތުގައި މި ފަހަރު ވާދަކުރާ ރާއްޖޭގެ އަންހެން ޓީމުގެ އެވްރެޖް އުމުރަކީ 21 އެވެ. ފުރަތަމަ ދެ މެޗަށް ބަލާއިރު، ގައުމީ އަންހެން ޓީމުގެ ކޯޗު މުންތާޒް އަލީ (މުންތޭ) އަންނަނީ ހުރިހާ ކުޅުންތެރިންނަށް މެޗުތަކުގައި ފުރުސަތު ދީ ޓީމު އެކުލަވާލުމުގައި މުހިއްމު ބަދަލުތަކެއް ގެންނަމުންނެވެ.
ނޭޕާލް މެޗާ ބެހޭގޮތުން މިއަދު މުންތޭ ބުނީ މެޗަށް ނުކުތްއިރު ކުޅުންތެރިންނަށް ވިސްނައިދިނީ މި މެޗު އެހާ ބޮޑު ޕްރެޝަރެއްގެ ގޮތުގައި ނުނެގުމަށް ކަމަށާއި މިއީ ލިބޭ ވަރަށް ރަނގަޅު ޕްރެކްޓިސް މެޗެއްގެ ގޮތުގައި ބަލައިގެން ކުޅުމަށެވެ.
"ދެން ފެށިއިރު ފުރަަތަމަ ސެޓުގައި ރަނގަޅަށް ކުޅެވުނީމަ ދެން ފަހު ދެ ސެޓު (ކުޅުންތެރިން) މި ހިފީ މާ ބޮޑަށް މެޗު ގެންނަ ކަހަލަ ވިސްނުމުގައި ޕޮއިންޓަކަށް ފަހު ޕޮއިންޓެއް އަޅުވަން މާ ބޮޑަށް ހިފީ. ނޭޕާލް ޓީމު ކައިރީގައި މި އޮތް ރާއްޖޭގެ ޖޫނިއާ ޓީމަކަށް މާ ބޮޑު ކަމެއް ނުވާނެ އަދި،" މުންތޭ ބުންޏެވެ.
"އެކަމަކު، ވެސް ކުޅެން އަރާނީ ކޮންމެ ކުއްޖަކު ވެސް ކަމެއް ވޭތޯ. ހަގީގަތަށް ބުނާއިރު ޓީމުގައި މި ފަހަރު މަދު، އެކަމަކު ޖޫނިއާ ކުޅުންތެރިންނަށް ބަލާއިރު، (ނޭޕާލް ކައިރީގައި) ފުރަތަމަ ދެ ސެޓުގައި ރަނގަޅު،"
ރާއްޖެ އަށް މި ފަހަރުގެ މުބާރާތުގެ ލީގު ބުރުގައި ދެން އިން ތިން މެޗަކީ މުބާރާތުގެ ފޭވަރިޓެއް ކަމަށްވާ ލަންކާގެ އިތުރުން ކިރްގިސްތާން އަދި ބަންގްލަދޭޝް މެެޗެވެ. ރާއްޖޭން ވަނީ 2019 ވަނަ އަހަރުގެ މުބާރާތުގައި ކިރްގިސްތާނާއި ބަންގްލަދޭޝް ބަލިކޮށްފަ އެވެ.
މުންތޭ ބުނީ ލަންކާއާ ކުޅޭއިރު ވެސް މެޗު ދާނީ ނޭޕާލް މެޗުގައި ދިޔަ ކަހަލަ ގޮތަކަށް ވަރުގަދަ ކޮށް ކަމަށާއި މޮޅުވާން ޓާގެޓް ކުރަނީ ކިރްގިސްތާނާއި ބަންގްލަދޭޝް މެޗު ކަމަށެވެ. މާދަމާ ލަންކާ އާއި ރާއްޖެ ކުޅޭ މެޗު ފަށާނީ ރާއްޖެ ގަޑިން ހެނދުނު 10:30 ގަ އެވެ.
