ޔޮޓް ޓުއާސް ކުންފުނީގައި މަސައްކަތް ކުރި މުވައްޒަފަކަށް މުސާރަ ނުދިން މައްސަލައެއްގައި އެ ކުންފުނީގެ ވެރިޔާ، އަދި ރައްޔިތުން މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު މިއަދު ކޯޓު އަމުރެއްގެ ދަށުން ހައްޔަރުކުރުމަށްފަހު ދޫކޮށްލައިފި އެވެ.
ގދ. ތިނަދޫގައި ހުންނަވަނިކޮށް ފުލުހުން ޖާބިރު ހައްޔަރު ކުރީ ކޯޓު އަމުރެއްގެ ދަށުން މިއަދު ހެނދުނު 7:40 ގަ އެވެ. އެއީ މިއަދު ހެނދުނު 10 ޖަހާއިރަށް ސިވިލް ކޯޓުގައި ތާވަލްކޮށްފައިވާ އަޑުއެހުމަކަށް ހާޒިރުކުރުމުގެ ގޮތުންނެވެ.
ޖާބިރު ދޫކޮށްލީ ސިވިލް ކޯޓުގެ މީޑިއ އޮފިޝަލް ވިދާޅުވި ގޮތުގައި ފައިސާ ދައްކާނެ ކަމުގެ ޔަގީންކަން މިއަދުގެ އަޑުއެހުމުގައި ޖާބިރު ދެއްވުމުން އިތުރު 10 ދުވަހުގެ މުއްދަތެއް އެކަމަށް ދިނުމަށްފަހު އެވެ.
ސިވިލް ކޯޓަށް ޖާބިރު ހައްޔަރުކޮށްގެން ހާޒިރު ކުރުމަށް ނިންމީ، ކޯޓަށާއި ޓްރައިބިއުނަލްއަށް އޭނާގެ ކުންފުނި ހާޒިރު ނުކުރެވުމުންނެވެ.
މި ނޫހާ ވާހަކަ ދައްކަވަމުން ޖާބިރު ވިދާޅުވީ ފުލުހުން އޭނާ ހައްޔަރު ކުރީ ހެނދުނު ޖޮގިންއަށް ގޮސް އުޅެނިކޮށް ކަމަށެވެ.
"ކޯޓު އަމުރެއް ހިފައިގެން އައިސް އަޅުގަނޑު ދުވަން ހުއްޓަ ހައްޔަރު ކުރީ. ހައްޔަރުން ދޫކޮށްލީ އޮޅުމަކުންނޭ ކިޔާފައި، ބުނީ އަމުރު ބާތިލްވެއްޖެއޯ," ޖާބިރު ވިދާޅުވި އެވެ.
އިމްތިޔާޒުގެ ގާނޫނުގައި ބުނެފައިވާ ގޮތުން މެމްބަރަކު ހައްޔަރުކުރުމަށްފަހު މަޖިލީހުގެ ރައީސަށް އެކަން ފުލުހުން އަންގަންވާނެ އެވެ. އަދި އެ އެންގުން ލިބުމާއެކު އެ މައްސަލަ ބެލުމަށް ރައްޔިތުންގެ މަޖިލީހުގެ އިމްތިޔާޒު ކޮމެޓީ އެއްވާންޖެހެ އެވެ. ޖާބިރު މިއަދު ހައްޔަރުކުރުމަށްފަހު ފުލުހުން ވަނީ އެކަން ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަންގަވައިފަ އެވެ.
