އުތުރު އިންޑިއާގެ ޖައްވުގައި އުފެދިފައި ހުރި ހިރަފުހާއި ބަންގާޅު ކަނޑުގެ ލޮނު، އިރުވަޔާއެކު ރާއްޖެއާ ހިސާބަށް ދަތުރުކޮށް އުތުރާއި މެދުރާއްޖެތެރެ ފުސްކޮށްލައިފި އެވެ.
މި ހިނގާ ޑިސެމްބަރު 10، ގައި މުލަ ނަކަތުން އިރުވައި މޫސުން ފެށުމާއެކު އުތުރުގެ ބައެއް ރަށްތަކާއި މެދުރާއްޖެ ތެރެ ވަނީ ވަރަށް ބޮޑަށް ފުސްވެފަ އެވެ. މާލެ މަތި ވެސް ފެންނަނީ އާދަޔާ ހިލާފަށް ފުސްކޮށެވެ.
މޯލްޑިވްސް މީޓިއޮރޮލިޖިކަލް ސާވިސްގެ އޮފިޝަކަލު ބުނީ މިއީ ކޮންމެ އަހަރަކު ވެސް ދިމާވާ ކަމެއް ކަމަށާއި ނަމަވެސް މިދުވަސްވަރު އުތުރު އިންޑިއާގެ ޕޮލިއުޝަން ބޮޑުކަމުން އޭގެ އަސަރު ރާއްޖެއަށް ބޮޑަށް ކުރާ ކަމަށެވެ.
"އާންމުކޮށް ވެސް ވާ ކަމެއް މިއީ. އެކަމަކު މިހާރު އުތުރު އިންޑިއާގައި ޕޮލިއުޝަން މައްސަލަ ބޮޑު. އެހެންވީމަ ކުރިއަށްވުރެ [ރާއްޖެއިން ފެންނަ] ފުސްކަން ބޮޑު މިހާރު. މެދުރާއްޖެތެރެއަށް ފުރަތަމަ މިއަހަރު ފުސްކަން އައީ. އެކަމަކު މިހާރު އުތުރުން ވެސް ފާހަގަ ކުރެވޭ،" މޫސުމާ ބެހޭ އޮފީހުގެ އޮފިޝަލަކު ބުންޏެވެ.
މާލެ ކައިރީގައި އޮތް ސިފައިންގެ އުޅަނދެއް: މެދުރާއްޖެތެރެ އަދި އުތުރުގެ ސަރަހައްދުތަކުގައި ހިރަފުސްގަނޑުގެ އަސަރު ބޮޑު -- ފޮޓޯ: މުހައްމަދު ޝާބިން/އަދަދު
ހދ. ވައިކަރަދުއިން މިއަދު ވާހަކަ ދެއްކި މީހަކު ބުނީ ފުސްގަނޑުގެ ސަބަބުން އެ ރަށުގެ އަތިރިމަތިން މިހާރު ކައިރި ރަށްތައް ނުފެންނަ ކަމަށެވެ. އަދި ބުނީ ރޭގަނޑު ރަށު ތެރެއަށް ވެސް ވަރަށް ބޮޑަށް ފުސްގަނޑު އަރާ ކަމަށެވެ.
"މިވަގުތު ވެސް އެހެން ރަށެއް ނުފެނޭ. ދެން ރޭގަނޑަށް ވަރަށް ފިނިވޭ. ގާތްގަނޑަކަށް ބުނާ ނަމަ 200 ފޫޓު ދުރުގަ ހުންނަ މީހާ ވެސް ނުފެނޭ،" އަތިރިމަތީގައި ހުރެ، އެ ރަށުގެ ކުރީގެ ކައުންސިލަރު އަހުމަދު ނަސީމު ވިދާޅުވި އެވެ.
އިންޑިއާގެ ދިއްލީގައި ނަގާފައިވާ ފޮޓޯއެއް: ހިރަފުހުގެ މައްސަލަ ބޮޑުވެގެން މިދިޔަ ނޮވެމްބަރު މަހު ދިއްލީ ލޮކްޑައުން ކުރި -- ފޮޓޯ: ފައިލް
މެޓު އޮފީހުން ބުނީ އާންމުކޮށް އެގޮތަށް އުފެދޭ ފުސްގަނޑު ދަނީ ވާރޭ ވެހިގެން ކަމަށެވެ. ނަމަވެސް ކުރިއަށް އޮތް ދުވަސްތަކުގައި ވާރޭ ވެހުމުގެ ފުރުސަތު ކުޑަކަމުން، ފުސްގަނޑު ރާއްޖެ މަތިން ދާން ދުވަސްކޮޅެއް ނަގާނެ ކަމަށް މެޓު އޮފީހުން ލަފާ ކުރެ އެވެ.
"ހަފްތާ ބަންދާއެކީ ފުސްކޮށް އޮންނާނެ ކަމަށް އަޅުގަނޑުމެން ލަފާ ކުރަނީ މި،" މެޓުން ވާހަކަ ދެއްކި އޮފިޝަލު ބުންޏެވެ.
އުތުރު އިންޑިއާގެ ދިއްލީގެ ވައިނުސާފުވާ މައްސަލަ ބޮޑުވެގެން އެ ސިޓީގެ ބައެއް ހިސާބުތައް މިދިޔަ ނޮވެމްބަރު މަހު ވަނީ ލޮކްޑައުންއަކަށް ގޮސްފަ އެވެ. ދުނިޔޭގެ ސިއްހަތު ޖަމިއްޔާއިން ބުނާ ގޮތުގައި އިންޑިއާއަކީ ދުނިޔޭގެ އެންމެ ވައިނުސާފު ގައުމެވެ. އެ ޖަމިއްޔާއިން ބުނާ ގޮތުގައި އިންޑިއާގެ ވައި ރައްތާކެރި މިންގަނޑަށްވުރެ ހަތް ގުނަ ނުސާފެވެ.
