މާޒިޔާ ނޫނީ ޕްރެޒިޑެންޓްސް ކަޕްގެ ކުރިން އެކަށީގެންވާ ވަރަށް ޕްރެކްޓިސް ކުރި އެއްވެސް ޓީމެއް ނެތެެވެ. އޭގެ ސަބަބުން ގިނަ ޓީމުތަކުން މެޗުތަކުގެ ކުރިން އޮތް ނޫސްވެރިންގެ ބައްދަލުވުންތަކުގައި ފާހަގަކުރަނީ ސީޒަނަށް އަދި ރަނގަޅަށް ތައްޔާރުނުވެވޭ ވާހަކަ އެވެ. އެ ވާހަކަތައް މީޑިއާ އިން ގެނެސްދޭއިރު، އެ އަށް ބަލައިގެން މާޒިޔާ ކުޅުންތެރިން މެޗުތައް ފަސޭހަކޮށްލުން ރަނގަޅެއް ނޫން ކަމަށް އެ ޓީމުގެ ކޯޗު މުހައްމަދު ޝިޔާޒް (މޯހަން) ވަނީ ބުނެފަ އެެވެ.
މިދިޔަ ހަފްތާގެ ބުދަ ދުވަހުގެރޭ ޗެރިޓީ ޝީލްޑް މެޗުގައި މާޒިޔާ އިން ވަނީ 5-0 އިން ކްލަބް ވެެލެންސިއާ ބަލިކޮށްފަ އެެވެ. އިއްޔެ ހަވީރު ޕްރެޒިޑެންޓްސް ކަޕްގައި މާޒިޔާ އަށް ސުޕަ ޔުނައިޓެޑް ސްޕޯޓްސް (ސަސް) އަތުން 2-0 އިން މޮޅުވެވުނީ އުނދަގުލުންނެވެ. މެޗުގައި މާޒިޔާ އިން ގޯލު ޖެހީ ދެ ކޯނަރުންނެވެ. މެޗުގެ 28 ވަނަ މިނިޓްގައި މާޒިޔާގެ ފަހަތަށް ކުޅޭ ސަމޫހު އަލީ (ސަމުއްޓެ) އެ ޓީމަށް ލީޑުނަގައިދިނެވެ. އަދި ދެ ވަނަ ގޯލު ޖެހީ މެޗުގެ 88 ވަނަ މިނިޓްގައި އަކުރަމް އަބްދުލް ގަނީ (އަކޫ) އެވެ.
މެޗަށް ފަހު އޮތް ނޫސްވެެރިންގެ ބައްދަލުވުމުގައި މޯހަން ބުނީ އިއްޔެގެ މެޗުން މޮޅުވެވުނީ އުނދަގުލުން ކަމަށާއި މޮޅުވުމުން ލިބޭ އެ ތިން ޕޮއިންޓްގެ ހިތްހަމަޖެހުން އޮތް ކަމުގައި ވިޔަސް ކުޅުމަށް ބަލާއިރު، އެންމެ ރަނގަޅެއް ނޫން ކަމަށެވެ. އަދި ފުރުސަތު ތަނަވަސް ނުކުރެވުނުއިރު، ކޮމްބިނޭޝަންގެ މައްސަލަ އާއި ރަނގަޅު ގޭމެއް ނުކުޅެވުނުކަން މޯހަން ފާހަގަކުރި އެެވެ.
ހަތް މަސް ކޮށްފައި ހަވީރު ފުރަތަމަ މެޗު ކުޅުމުން އެ މައްސަލަތައް ދިމާވެދާނެނޫންތޯ ނޫސްވެރިއަކު އެހުމުން މޯހަން ބުނީ އުނދަގޫތައް ކުރިމަތިވީ ހަވީރު ކުޅެން ޖެހުމުން ފިޒިކަލް ފިޓްނަސް ދަށްވެގެން ނޫން ކަމަށެވެ. މައްސަލަ އަކީ މާ ބޮޑަށް މެޗު ފަސޭހަކޮށްލެވެނީ ކަމަށް މޯހަން ބުންޏެވެ.
"އިދިކޮޅު ޓީމަށް ބަލާފައި ފަސޭހަކޮށްލެވޭ ކަންތައް މިއީ. މީޑިއާތަކުގައި މި ދެކެވޭ ވާހަކަ އާއި އެ ޓީމު ތައްޔާރު ނުވާ ވާހަކައާ އެ ކަންކަން. މި ކަންތައްތައް އައީމަ ކުޅުންތެރިން ވެސް ކިޔާނެ (މީޑިއާގައި ހުންނަ) ހުރިހާ އެއްޗެއް. އެއަށް މާ ބޮޑަށް ރިލެކްސް ވެވެނީ ހަގީގަތުގައި،" މޯހަން ބުންޏެވެ.
"އެކަން ޖެހޭނީ ބަދަލުކުރަން. އެޓިޓިއުޑް ބަދަލުކުރަން ޖެހޭނީ އެކަން ބަދަލުނުކޮށެއް އުނދަގޫވާނެ މީގެ ޓީމުތަކާ އެކީގައި ކޮންމެ މެޗެއް ވެސް މިހާ އުނދަގޫކޮށް ދާނީ،"
ޕްރެޒިޑެންޓްސް ކަޕްގެ ޗެމްޕިއަންކަން 2015 ވަަނަ އަހަރު ހޯދި މާޒިޔާ އިން ދެން އެންމެ އަވަަހަށް ކުޅޭ މެޗުގައި އަންނަ ހުކުރު ދުވަހުގެރޭ ކުޅޭނީ އީގަލްސްއާ އެވެ. އީގަލްސް ވަނީ ރޭ 1-0 އިން ޓީސީ ސްޕޯޓްސް ކްލަބް އަތުން ބަލިވެފަ އެވެ.
