ޖެންޑާ މިނިސްޓްރީގައި މަސައްކަތް ކުރާ ސިވިލްސާވިސްގެ މުވައްޒަފުންތަކެއް ވަޒީފާއިން ވަކިކުރަން ފޮނުވި ނޯޓިސް ބާތިލްކޮށް އަލުން ވަޒީފާ ދީފި އެވެ.
ނޯޓިސް ދީފައިވަނީ ވިލިމާލޭ ކުޑަކުދިންގެ ހިޔާގައި މަސައްކަތްކުރި 21 މުވައްޒަފަކަށެވެ. އެ މުވައްޒަފުންނަށް ނޯޓިސް ދިނީ ހިޔާގައި ތިބި ކުދިން އަތޮޅު ތެރޭގައި ގާއިމުކޮށްފައިވާ އަމާން ވެއްޓަށް ބަދަލު ކުރުމުން، ހިޔާގައި ކުދިން ބަލަހައްޓަން ގިނަ މުވައްޒަފުން ބޭނުންނުވާތީ އެވެ.
ޖެންޑާ މިނިސްޓްރީގެ ކޮމިއުނިކޭޝަން ޑިރެކްޓަރު ރިޒްނާ ޒަރީރު "އަދަދު"އަށް ވިދާޅުވީ ސިވިލް ސާވީސް ކޮމިޝަނުން ވަޒީފާ ދޫކޮށްލުމަށް ދީފައިވާ ނޯޓިސް އެ ކޮމިޝަނުން ބާތިލް ކޮށްފައިވާ ކަމަށެވެ. އެއާއެކު ނޯޓިސް ފޮނުވި މުވައްޒަފުންނަށް ވަނީ ވަޒީފާ އިއާދަކޮށްދީފަ އެވެ.
މުވައްޒަފުންނަށް ވަޒީފާ އިއާދަކޮށްދީފައި ވަނީ ވަޒީފާއިން ވަކިކުރަން ނޯޓިސް ދިނުމާ ގުޅިގެން އެ މުވައްޒަފުންނަށް ބޭނުންވާ ގާނޫނީ އެހީތެރިކަން ދިނުމަށް އިދިކޮޅު ޕީޕީއެމް އާއި ޕީއެންސީން ނިންމާފައިވާ ދަނޑިވަޅެއްގަ އެވެ.
ކުޑަކުދިންގެ ހިޔާ ހުސްކުރުމަށްފަހު އެތަނުގައި މަސައްކަތް ކުރި 71 މުވައްޒަފުންނަށް ނޯޓިސް ދިނެވެ. އަދި އެމީހުންނަށް ޖެންޑާގައި ހުރި ފުރުސަތުތައް ބުނެދިނުމަށްފަހު ބައެއް މުވައްޒަފުންނަށް އެ މިނިސްޓްރީގެ އެކި އިދާރާތަކުން ވަޒީފާ ހަމަޖައްސައިވެސް ދީފައިވާނެ ކަމަށް މީގެ ކުރިން ޖެންޑާއިން ވަނީ ބުނެފަ އެވެ.
އެގޮތުން ހިޔާގައި މަސައްކަތް ކުރި 43 މުވައްޒަފުން މިހާރު ވެސް ޖެންޑާގެ އެކި ވަޒީފާތަކުގައި މަސައްކަތް ކުރަމުންދާ ކަމަށާއި އިތުރު ތިން މުވައްޒަފަކަށް އަތޮޅުތެރެއިން ވަޒީފާ ދީފައިވާ ކަމަށްވެސް މިނިސްޓްރީން ވަނީ ބުނެފަ އެވެ.
