އައިޖީއެމްްއެޗްގައި މަސައްކަތް ކުރަމުން ދިޔަ ފިލިޕީންސްގެ ނަރުސް، މޭރީ ގްރޭސް ޕިނޭޑާ މަރާލީ، ފިރިމީހާ އާއި އޭނާ ދިވެހި ލޯބިވެރިޔާ ރާވައިގެން ކަމަށް ފުލުހުން ތުހުމަތު ކޮށްފި އެވެ.
ސުވާލު އުފެދޭ ފަދަ ގޮތަކަށް ގްރޭސް މަރުވެފައި އޮއްވާ ފެނިފައި ވަނީ އޮކްޓޯބަރު 19، 2021 ގަ އެވެ.
އެ މައްސަލައިގައި ގްރޭސްގެ ފިރިމީހާ މާވިން އެސްވައި، 29، ވަނީ ހައްޔަރުކޮށްފަ އެވެ. އޭނާގެ ލޯބިވެރިޔާ ކަމަށް ބުނާ ޅ. ހިންވަރު މާފިނި، ހާލީމަތު ލަމްހާ އަބްދުއްރަހުމާން، 24، ކޯޓު އަމުރެއްގެ ދަށުން ހައްޔަރު ކުރީ މިއަދެވެ.
ގްރޭސްގެ މަރުގެ މައްސަލައާ ގުޅިގެން މިއަދު ހައްޔަރުކުރި މީހާގެ ވަނަވަރެއް ފުލުހުން ހާމައެއް ނުކުރެ އެވެ.
"އަދަދަ"ށް އެނގިފައިވާ ގޮތުގައި، މާވިން އާއި ލަމްހާގެ މައްޗަށް ތުހްމަތު ކުރަނީ ގްރޭސް މަރާލުމުގައި އެ ދެ މީހުން ބައިވެރިވާ ކަމާއި މާރާލީ ދުރާލާ ރާވައިގެން ކަމަށެވެ.
ގްރޭސް މަރާލާފައި ވަނީ އޭނާ ދިރިއުޅެމުން ދިޔަ މއ. އުދުހޭކޮކާ ގޭގެ ފުރަތަމަ ފަންގިފިލާގެ ކޮޓަރިއެއްގެ ތެރޭ ކަމާއި، މަރާލާފައި ވަނީ އަނިޔާވެރި ކަމާއެކު ރަހުމު ކުޑަ ގޮތަކަށް ކަން ވެސް "އަދަދަ" ށް ވަނީ އެނގިފަ އެވެ.
ގްރޭސް މަރުވެފައި ވަނީ ލިބުނު ޒަހަމްތަކުގެ ސަބަބުން ކަމަށް، ހަށިގަނޑު އިންޑިއާ އަށް ފޮނުވައިގެން ހެދި ޕޯސްޓް މޯޓަމްގެ ރިޕޯޓާ ހަވާލާދީ ފުލުހުން ބުނެފައިވެ އެވެ.
މަރުވެފައި އޮއްވައި ފެނިގެން އޭނާގެ ހަށިގަނޑު ހޮސްޕިޓަލަށް ގެންދިޔައީ ދަން ޖެހިފައި ހުއްޓާ ކަމަށް ބުނެ އޭނާގެ ފިރިމީހާ އެވެ. އެފަދަ ކަމެއްގެ ނިޝާނެއް ނެތް ކަމަށް ވެސް ރިޕޯޓާ ހަވާލާދީ ފުލުހުން ބުނެފައިވެ އެވެ.
މާވިން އާއި ގްރޭސް
ލަމްހާގެ މައްޗަށް ގިނަ ކުށްތަކެއްގެ ތުހުމަތު ފުލުހުން ކުރެ އެވެ. އެ ކުށްތަކުގެ ތެރޭގައި، ގާނޫނުލްއުގޫބާތުގެ 80 ވަނަ މާއްދާގެ ހ. ގެ 1، 2 ނަންބަރުގައި ބަޔާންކުރާ ކުށް، 81، 82، އަދި 87 ގެ ހ. ގައި ބަޔާންކުރާ ކުށް، 110 ވަނަ މާއްދާގެ ހ، ށ، ނ، ގެ ވަނަ މާއްދާގައި ބަޔާންކުރާ ކުށް، 114 ވަނަ މާއްދާގެ ހ. ގައި ބަޔާންކުރާ ކުށް އަދި ގާނޫނުލްއުގޫބާތުގެ 521 ވަނަ މާއްދާގެ ށ. ގައި ބަޔާންކުރާ ކުށް ހިމެނެ އެވެ.
ގާނޫނުލްއުގޫބާތުގެ 87 ވަނަ މާއްދާ އަކީ ކުށްކުރުމުގެ އާލާތްތައް އަތުގައި ހުރުން ބަޔާންކުރާ މާއްދާ އެވެ. ގާނޫނުލްއުގޫބާތުގެ 110 ވަނަ މާއްދާގެ ހ. ގައި ބުނެފައި ވަނީ އެނގިހުރެ މީހަކު މަރައިފި މީހާ އެކުރަނީ ކުށެއް ކަމެވެ. ގާނޫނުލްއުގޫބާތުގެ 521 ވަނަ މާއްދާ ބަޔާން ކޮށްފައި ވަނީ ދޮގު ބަޔާން ދިނުމުގެ ކުށެވެ.
ގްރޭސްގެ މަރާ ގުޅިގެން، ޕޯސްޓް މޯޓަމް ހެދުމަށް ފަހު ހަށިގަނޑު ވަނީ ތައިލެންޑަށް ފޮނުވާލައިފަ އެވެ.
ގްރޭސްއަކީ އައިޖީއެމްއެޗްގެ ޑައިލެސިސް ޑިޕާޓްމެންޓްގެ ނަރުހެކެވެ. އޭނާގެ ފިރިމީހާ މާވިން އާއި ލަމްހާ އަކީ ކެޝުއަލްޓީގައި މަސައްކަތް ނަރުހުންނެވެ.
ގްރޭސް އާއި މާވިން ކައިވެނިކޮށްފައި ވަނީ މީގެ ފަސް އަހަރު ކުރިން 2016 ވަނަ އަހަރުގެ މެއި މަހުގެ ތެރޭގަ އެވެ. ގްރޭސް ކުރިން މަސައްކަތްކޮށްފައި ވަނީ ފްރެސިނިއަސް މެޑިކަލް ކެއާގަ އެވެ. އެއީ ޑަޔަލަސިސް ހެދުމާއި ކިޑްނީގެ ބަލިތަކަށް ހާއްސަ ފަރުވާދޭ ސެންޓަރެކެވެ.
