ދިވެހިރާއްޖޭގައި މަސައްކަތް ކުރުމުގެ ފުރުސަތު ލިބިފައިވާކަމުގެ ލިޔުން ދޫކޮށް، ފައިސާ ހޯދުމަށްފަހު ލަނޑުދޭ މައްސަލަތައް ގިނަވާން ފަށައިފި އެވެ.
މޯލްޑިވްސް އިމިގްރޭޝަން ޑިޕާޓްމަންޓުން ދޫކުރާ "އެމްޕްލޯއިމަން އެޕްރޫވަލް" ލިޔުމުގެ ފޭކު ހިފައިގެން ރާއްޖެ އަންނަ ބިދޭސީން މިދުވަސްވަރު ގިނަވެފައިވާ ކަމަށް ބިދޭސީންގެ ހައްގުތަކަށް މަސައްކަތް ކުރާ ފަރާތަކުން "އަދަދު" އާ ވާހަކަ ދައްކަމުން ބުންޏެވެ.
ފޭކު ލިޔުން ދޫކުރާ ފަރާތުން އެމީހުންގެ ސްކޭމް ހިންގުމަށްޓަކައި ވެސްބްސައިޓެއް ވެސް ހަދާފައިވެ އެވެ. އަދި ދޫކުރާ ފޭކު ލިޔުމުގައިވާ އެމްޕްލޯއިމަންޓް އެޕްރޫވަލް ނަމްބަރު ޖެހުމުން ވެބްސައިޓުން އެއީ ސައްހަ އެއްޗެއްގެ ގޮތުގައި ދައްކުވައިދެ އެވެ.
ރާއްޖެއިން ވަޒީފާ ލިބިފައިވާ ކަމަށް ބުނެ ބިދޭސީއަކަށް ދޫކޮށްފައިވާ ލިޔުމެއް: މީގެ ލިޔުމެއް ގަންނަނީ 2600 ޑޮލަރު ދީގެން -- ފޮޓޯ: އަދަދު
ނަން ނުޖެހުމަށް އެދި މި ނޫހާ ވާހަކަ ދެއްކި، ކަމުގެ މައުލޫމާތު އެނގޭ އެހެން މީހަކު ބުނީ ފޭކު ލިޔުން ލިބިގެން މި ދުވަސްވަރު ގިނައިން އަންނަނީ އިންޑިއާގެ މީހުން ކަމަށެވެ. އަދި އެމީހުން އެ ލިޔުން ގަންނަނީ ގާތްގަނޑަކަށް 2600 ޑޮލަރު ނުވަތަ 40،600ރ. އަށް ކަމަށް އޭނާ ބުންޏެވެ.
"ވަރަށް ފަގީރު އަވަށްތަކުގެ މީހުންގެ ވާހަކަ މި ދައްކަނީ. އެ މީހުންނަށް މިއީ ވަރަށް ބޮޑު އަދެދެއް. ވަރަށް ގިނަ މީހުންނަށް މި ލަނޑު ލިބޭ އެބަ މިހާރު،" އޭނާ ކިޔައިދިނެވެ.
ފޭކު ލިޔުމުގައި ރާއްޖެ އަންނަ މީހުން އަނބުރާ ގައުމަށް ފޮނުވާލަނީ އެވެ.
ނަމަވެސް އިމިގްރޭޝަން ޑިޕާޓްމަންޓަށް އެ މައްސަލައިގައި ގުޅުމުން ބުނެފައި ވަނީ ފޭކު ލިޔެކިޔުމުގައި ބިދޭސީން ރާއްޖެ ގެންނަކަން ފާހަގަވެފައިނުވާ ކަމަށެވެ.
އެމެރިކާގެ ސްޓޭޓް ޑިޕާޓްމަންޓުން ކޮންމެ އަހަރަކު ނެރޭ ޓްރެފިކިން އިން ޕާސަންގެ 2020 ވަނަ އަހަރުގެ ރިޕޯޓުގައި ރާއްޖެ ހިމަނާފައި އޮތީ ޓިއާ ދޭއްގަ އެވެ. ޓިއާ ދޭއްގައި ހިމަނަނީ ވޮޗްލިސްޓުގައި ހިމެނޭ ނުވަތަ އެ ގައުމަކާމެދު ސަމާލުވާންޖެހޭ ގައުމުތަކެވެ.
ދިވެހިރާއްޖޭގައި މަސައްކަތް ކުރާ ބިދޭސީންގެ ތެރެއިން 234،000 މީހުން ޓްރެފިކިންގެ ޝިކާރައަކަށްވެފައިވާ ކަމަށް ޓްރެފިކިން އިން ޕާސަންސް ރިޕޯޓުގައި ފާހަގަކޮށްފައިވެ އެވެ. އޭގެ ތެރޭގައި ވިސާއާއެކު މަސައްކަތް ކުރާ 169،000 މީހުންނާއި ރަސްމީ ލިޔުމެއް ނެތް 65،000 ހިމެނެ އެވެ.
