މި ސަރުކާރުން މާލެ ސަރަހައްދުގައި ކުރިޔަށް ގެންދަން ނިންމި ފުރަތަމަ ހައުސިން މަޝްރޫއު، ހުޅުމާލޭގައި އިމާރާތްކުރަން ނިންމި 1،700 ހައުސިން ޔުނިޓު އަޅަން ހަވާލުކުރި ކޮންޓްރެކްޓަރަށް ފައިސާ ދޭން ބުނި ބޭންކް އޮފް ޗައިނާއިން ފައިނޭންސިން އޮފާ އަނބުރާ ގެންގޮސްފި އެވެ.
މިދިިޔަ އަހަރުގެ މާޗުގައި ބިންގާ އެޅި މި ޕްރޮޖެކްޓަކީ ކުރީ ސަރުކާރުން ހިންގަން ފެށި ހިޔާ މަޝްރޫއުއަށް ބައެއް ބަދަލުތައް ގެނެސްގެން ފަހި ދިރިއުޅުން ކޯޕަރޭޝަނާ ހަވާލުކުރި މަޝްރޫއެކެވެ. މަޝްރޫއުގެ ކޮންޓްރެކްޓަރަކީ ރާއްޖޭގައި ގިނަ ޕްރޮޖެކްޓުތައް ކާމިޔާބުކަމާއެކީ ނިންމާލާފައިވާ ޗައިނާގެ ސައިނޯ ހައިޑްރޯ ކުންފުންޏެވެ.
ސައިނޯ ހައިޑްރޯއާ ހަވާލުކުރީ 15 އަދި 16 ބުރީގެ 11 ޓަވަރުގައި، 900 އަކަފޫޓުގެ ތިން ކޮޓަރީގެ 1،020 އެޕާޓްމަންޓާއި 650 އަކަފޫޓުގެ ދެ ކޮޓަރީގެ 680 އެޕާޓްމަންޓު އަޅާށެވެ.
ޖުމްލަ 308.1 މިލިއަން ރުފިޔާ ހަރަދުވާނެ ކަމަަށް ބެލެވޭ މި މަޝްރޫއަކީ ކޮންޓްރެކްޓާ ފައިނޭންސިންގެ ދަށުން ހިންގަން ހަމަޖެހިފައިވާ ޕްރޮޖެކްޓެއް ކަމުން މަޝްރޫއު ހިންގަން ބޭނުންވާ 85 ޕަސެންޓު ފައިސާ ހަމަޖައްސަން ޖެހެނީ ކޮންޓްރެކްޓަރެވެ.
އަދި، އެ ފަންޑިން ދޭން ބޭންކް އޮފް ޗައިނާ، ލަންޑަން ބްރާންޗާއެކު ސައިނޯ ހައިޑްރޯއިން އެއްބަސްވުމަކަށް އައެވެ. އެކަމަކު މިހާތަނަށް ސާފުނުވާ ސަބަބުތަކަކާ ގުޅިގެން، އެ ބޭންކުން ވަނީ ފައިނޭންސިން އޮފާ ވިތުޑްރޯކޮށްފަ އެވެ.
އެގޮތުން ސަރުކާރުން ހިންގާ އުމްރާނީ މަޝްރޫއުތަކުގެ މައުލޫމާތު ހުންނަ އައިލްސް ވެބްސައިޓުގައި ހުރި މައުލޫމާތު ދައްކާ ގޮތުން، ބޭންކް އޮފް ޗައިނާއިން ފައިނޭންސިން އޮފާ ވިތުޑްރޯ ކުރުމާ ގުޅިގެން، އެ ފައިސާ ހޯދަން އެހެން ބޭންކުތަކާ މަޝްވަރާކުރަމުންދާ ކަމަށެވެ.
ދެ އަހަރުގެ މުއްދަތު ހިނގާނެ ކަމަށް ބެލެވޭ މި މަޝްރޫއު އަންނަ އަހަރު ޖެނުއަރީގައި ފަށައިގެން ވެސް، މި ސަރުކާރުގެ ދައުރު ނިމެންވާއިރަށް މަސައްކަތް ނުނިމޭނެ އެވެ.
