ދިވެހި ބަހުގެ ރަދީފުގައި ބުނާ ގޮތުން ކޮށާރަކީ "ހަ ބިތް ނިރޮޅުން ނުވަތަ ގަސްވަކަރުން ހަދައިފައި ހުންނަ ބަނޑަހަގެ އެކެވެ". މިއީ އިހު ޒަމާނުގައި ކާޑުގެ ބާވަތްތަކާއި އާއްމުކޮށް ގެއަށް ބޭނުންވާ އެފަދަ އެހެން ތަކެތި ފަހަށް ރައްކާ ކުރުމަށް ބޭނުން ކުރަމުން އައި ތަންތަނެވެ. ކުރީގެ ބައެއް އާއިލާތަކުން ބޭނުންކުރި މިފަދަ ބައެެއް ކޮށާރުތައް މިހާރު ވެސް ފެންނަން އެބަހުއްޓެވެ. ނަމަވެސް މި ލިޔުމުގައި މި ބަލާލަނީ ޕެންޝަން އޮފީހުން އިފްތިތާހު ކުރި އެ އޮފީހުގެ ޕެންޝަން ސާވިސަސް ޕޯޓަލް ކޮށާރަށެވެ.
ޕެންޝަން އޮފީހުގެ ކޮށާރަކީ އެ އޮފީހުގެ ހުރިހާ ހިދުމަތްތައް ދުނިޔޭގެ ކޮންމެ ތަނަކުން، މެދުނުކެނޑި 24 ގަޑިއިރު ހޯދޭ ގޮތަށް ތައްޔާރުކޮށް ހިދުމަތް ދޭ އޮންލައިން ޕޯޓަލް އެކެވެ. މި ސިސްޓަމް ފަރުމާކޮށްފައި ވަނީ، ބޭނުން ކުރަން ފަސޭހަ، އެއަށް ބަރޯސާވެ ކޮންމެ ވަގުތަކު ވެސް ހިދުމަތް ހޯދޭނެ ފަދަ ސިސްޓަމަކަށް ވުމުގެ އިތުރުން ޑޭޓާގެ ރައްކާތެރިކަމަށް ވެސް އިސްކަން ދީގެންނެވެ.
ޕެންޝަން އޮފީހުގެ ހިދުމަތްތައް ހޯދާ ފަރާތްތަކުގެ ތެރެއިން ރިޓަޔާމަންޓް ޕެންޝަން ސްކީމުގެ މެންބަރުންނާއި، ޕެންޝަނަރުން އަދި ވަޒީފާ ދޭ ފަރާތްތަކަށް ހާއްސަ ހިދުމަތްތައް، މި ޕޯޓަލްގައި ހިމެނިފައިވުމުގެ އިތުރުން ޕޯޓަލް ބޭނުންކުރާ ފަރާތްތަކަށް އެހީތެރިކަން ހޯދޭނެ ލައިވް ޗެޓް ފީޗާއެއް ވެސް ހިމެނިފައިވެ އެވެ.
މި ޕޯޓަލް އިން ލިބެން ހުރި ވަކިވަކި ހިދުމަތްތަކަށް ބަލާއިރު، ވަޒީފާއަދާކުރާ ފަރާތެއް ނަމަ މޯލްޑިވްސް ރިޓަޔާމަންޓް ޕެންޝަން ސްކީމުގައި ރަޖިސްޓްރީ ވުމާ ހަމަ އިން، އެ މީހަކަށް ބޭނުންވާ ހިދުމަތްތައް ކަމަށްވާ ޕެންޝަން އެކައުންޓުގެ ތަފްސީލު ބެލުމާއި، ޕޯޓްފޯލިއޯ ބަދަލު ކުރުމާއި، ސްކީމުން ލިބޭ ފައިދާތަކުގެ ތަފްސީލު ބެލުމާއި، ޕެންޝަން ޕްލޭން ކުރުމަށް ބޭނުން ކުރާނެ ކަލްކިއުލޭޓަރު ފަަދަ ޓޫލްސްތައް ބޭނުންކުރެވޭނެ އެވެ.
ޕެންޝަނަރެއް ނަމަ ކަރުދާސް ފޯމު ޕްރިންޓްކޮށް އިނގިލީގެ ނިޝާން ޖަހައި، ސްކޭންކޮށް ކިއުގައިޖެހި ފޯމު ހުށަހެޅުމުގެ ބަދަލުގައި ފަސޭހައިން އޮންލައިންކޮށް ޕެންޝަނަށް އެދި ހުށަހެޅުމުގެ އިތުރުން އެމީހެއްގެ ޕެންޝަން ޖަމާވާ ބޭންކު އެކައުންޓާއި އެނޫންވެސް މަޢުލޫމާތު ވަގުތުން ވަގުތަށް ބަދަލު ކުރެވޭނެ އެވެ.
މީގެ އިތުރުން، މި ސިސްޓަމުގެ މުހިންމު އެއްބައި ހާއްސަ ކުރެވިފައި ވަނީ ޕެންޝަނާ ބެހޭ ގާނޫނުގެ ދަށުން ވަޒީފާދޭ ފަރާތްތަކަށް ލާޒިމްވާ ޕެންޝަން ކޮންޓްރިބިއުޝަންގެ މަސައްކަތްތައް ކުރުމަށެވެ. އެ ގޮތުން ވަޒީފާދޭ ފަރާތުން މުވައްޒަފުންގެ ޕެންޝަން ކޮންޓްރިބިއުޝަން ދެއްކުމާއި ގުޅޭ ސްޓޭޓްމަންޓްތައް ހުށަހެޅުމާއި ރެކޯޑް ބެލެހެއްޓުމުގެ އެންމެހާ މަސައްކަތެއް މި ސިސްޓަމް މެދުވެރިކޮށް ކުރެވޭނެ އެވެ.
ގިނަބަޔަކު އަބަދުމެ އަަވަދިނެތި އުޅެންޖެހިފައިވާ މި ޒަމާނުގައި ޕެންޝަން އޮފީހުގެ ހިދުމަތް ހޯދާ ފަރާތްތަކަށް ހޯދައި ދެވުނު މި ފަސޭހައިގެ ސަބަބުން އެތައް ބައެއްގެ ފައިސާ އާއި ވަގުތު ސަލާމަތްވެ، އަގު ނުކުރެވޭހާ ފައިދާ މުޅި މުޖުތަމަ އަށް ލިބިގެންދާނެ އެވެ.
