ކަޅު ބާޒާރުގައި ބޭރު ފައިސާ ގަނެ ވިއްކުމާއި، ސައްހަނޫން ލިޔެކިޔުން ބޭނުންކޮށްގެން ގިނަ އަދަދެއްގެ ފައިސާ ރާއްޖެއިން ބޭރަށް ފޮނުވާކަމަށް ތުހުމަތުކުރެވޭ މައްސަލައަކާ ގުޅިގެން ބަންގްލަދޭޝްއަށް ނިސްބަތްވާ ދެ މީހަކު ހޯދަން ފުލުހުން އިއުލާނުކޮށްފި އެވެ.
މި މައްސަލައާ ގުޅިގެން ފުލުހުން ހޯދަމުންދަނީ ބަންގްލަދޭޝް ރައްޔިތެއްކަމަށްވާ މުހައްމަދު އިގްބާލް ހޮސައިން (ޕާސްޕޯޓް ނަންބަރު EE0669802) އާއި ޝޮހެލް (ޕާސްޕޯޓް ނަންބަރު BC0463544) އެވެ.
މި ދެ މީހުން ހޯދަން އާންމުންގެ އެހީތެރިކަމަށް އެދި ފުލުހުން ކުރި އިއުލާނުގައި ބުނީ މި ދެ މީހުންނަކީ ބޭރު ފައިސާ ވިއްކުމުގެ ގަވާއިދުތަކާ ހިލާފަށް އެ ފައިސާ ގަނެވިއްކާ، ފައިސާ ބޭރުކުރުމުގައި ހަރަކާތްތެރިވާ ދެ މީހުން ކަމަށެވެ. ދެ މީހުން ވެސް ރާއްޖޭގައި އުޅެނީ ވާކް ޕާމިޓެއް ނެތި ގަވާއިދާ ހިލާފަށެވެ.
މި ދެ މީހުންނާ ބެހޭ އެއްވެސް މައުލޫމާތެއް ލިބިފައިވާނަމަ ފުލުހުންގެ އިކޮނޮމިކް ކްރައިމް ޑިޕާޓްމަންޓްގެ ނަންބަރު 9790048 އަށް ގުޅުއްވައި ހިއްސާކުރުމަށް ފުލުހުން އެދެ އެވެ.
މިއީ ކަޅު ބާޒާރުގައި ޑޮލަރު ވިއްކާ މައްސަލައާ ދެކޮޅަށް ފުލުހުން ފަށާފައިވާ ހާއްސަ އޮޕަރޭޝަނުގެ ދަށުން ކުރަމުންދާ މަސައްކަތްތަކެކެވެ. އެގޮތުން ހުސްވި ހަފުތާގެ ތެރޭގައި ވެސް ކަޅު ބާޒާރުގައި އިސްކޮށް ހަރަކާތްތެރިވާ ދެ މީހަކު ވަނީ ހައްޔަރުކޮށްފަ އެވެ.
