އެމްއެމްޕީއާރްސީ ހިޔާނާތުގައި ހިމެނޭ ގއ. ވޮޑަމުލާ މައްސަލައިގައި ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ މައްޗަށް އިއްވި މަނީ ލޯންޑްރިން މައްސަލައިގެ ހުކުމް ސުޕްރީމް ކޯޓުން ބާތިލުކުރުމާއެކު، ސިޔާސީ ހަރަކާތްތަކުގައި ބައިވެރިވުން މަނާކުރެވިފައި އޮތް އޮތުން މިއަދު ނިމުމަކަށް އައިސްފި އެވެ.
ވޮޑަމުލާ މައްސަލައިގައި ޔާމީންއަށް ދައުވާ ސާބިތުވާ ކަމަށް ކްރިމިނަލް ކޯޓުން ހުކުމް ކުރުމާއި ސުޕްރީމް ކޯޓުން މިއަދު އެ ހުކުމް ބާތިލުކުރުމާ ދެމެދު މި ހިނގި ދެ އަހަރާ ދެ ދުވަހުގެ (732 ދުވަހުގެ) ތެރޭގައި ޕީޕީއެމްގެ ލީޑަރުގެ ހައިސިއްޔަތުން ސިޔާސީ އެއްވެސް ހަރަކާތެއްގައި ބައިވެރިވުން އޮތީ މަނާކުރެވިފަ އެވެ.
މާފުށީ ޖަލުގައި ހުކުމް ތަންފީޒުކުރަމުން ދަނިކޮށް މި އަހަރުގެ ތެރޭގައި އެ މަނިކުފާނު ގެޔަށް ބަދަލުކުރީ ވެސް މިގޮތަށް ޝަރުތުކޮށްފަ އެވެ.
ޕާޓީގެ ލީޑަރުގެ މަގާމު އަދާކުރުން ޔާމީނަށް މަނާވީ، ޖަލުތަކާއި ޕެރޯލްގެ ގާނޫނުގެ ދަށުން ހުކުމް ތަންފީޒުކުރަމުންދާ ގައިދީއަކު ޕާޓީއެއްގެ މެމްބަރަކަށް ވުން ނޫން އެހެން ހުރިހާ ހައްގެއް ހިފެހެއްޓިފައި އޮންނާތީ އެވެ.
މިގޮތަށް ގާނޫނު އިސްލާހުކުރީ އެ މަނިކުފާނުގެ ވެރިކަމުގައި 2015 ވަނަ އަހަރު އެވެ.
titledesc
އެކަމަކު ޔާމީންގެ މައްޗަށް އިއްވާފައިވާ ފަސް އަހަރު ދުވަހުގެ ޖަލު ހުކުމް މިއަދު ސުޕްރީމް ކޯޓުން ބާތިލުކުރުމާއެކު، މި ހުރަސްތައް ވަނީ ނެތިގެން ގޮސްފަ އެވެ. އަދި މިއަދުން ފެށިގެން އިދިކޮޅު މައި ޕާޓީ ޕީޕީއެމްގެ އިސްލީޑަރުގެ މަގާމު އެ މަނިކުފާނަަށް އަދާކުރެވޭނެ އެވެ.
ރިޔާސީ އިންތިހާބުގައި ވެސް ވާދަކުރެވޭނެ އެވެ.
އިދިކޮޅު ލީޑަރުގެ ހައިސިއްޔަތުން ސިޔާސީ ހަރަކާތްތަކުގައި ބައިވެރިނުވެވުމަކީ އިސްތިއުނާފު މަރުހަލާގައި ވެސް ޔާމީން އުފުއްލެވި ކަންބޮޑުވުމެކެވެ.
