ކުއްޔަށް ދޫކޮށްފައިވާ ދައުލަތުގެ ބިންތަކުގެ އެގްރީމެންޓް އާ ކުރުމުގެ ބާރު ހަމައެކަނި ހައުސިން މިނިސްޓްރީގެ އަތުގައި އޮތް އޮތުން ބަދަލުކޮށް، ސިޓީ އަދި ރަށު ކައުންސިލްތަކަށް ވެސް ކުލީގެ މުއްދަތު އިތުރު ކުރުމުގެ ބާރު ސަރުކާރުން ދީފި އެވެ.
މީގެ ތިން އަހަރު ކުރިން ތައާރަފް ކުރި "ދިރިއުޅުމުގެ ބޭނުމަށް ނޫން އެހެނިހެން ބޭނުންތަކަށް ބިން ދޫކުރުމުގެ ގަވާއިދު" އަށް ހައުސިން މިނިސްޓްރީން ވަނީ އިއްޔެ ޖުމްލަ އަށް އިސްލާހެއް ގެނެސްފަ އެވެ.
ކުއްޔަށް ދޫކޮށްފައިވާ ދައުލަތުގެ ބިންތަކުގެ ކުލީގެ މުއްދަތު އިތުރު ކުރުމަށް ކުއްޔަށް ނަގާފައިވާ ފަރާތުން ހުށަހަޅައިފި ނަމަ، ރިވިއު ކުރުމަށްފަހު ކުލި އިތުރު ކުރުމުގެ ބާރު ކުރިން ވެސް އެ ގަވާއިދުގެ ދަށުން ދީފައި އިވެ އެވެ. ނަމަވެސް ކައުންސިލްތަކުން ދޫކޮށްފައިވާ ބިންތަކުގެ ކުލީގެ މުއްދަތު ވެސް ކުރިން އޮތް ގޮތުން އިތުރު ކުރެވޭނީ ހަމައެކަނި ހައުސިން މިނިސްޓްރީއަށެވެ.
އެގޮތަށް ބިމުގެ ކުލީގެ މުއްދަތު އިތުރު ކުރާ ނަމަ، މުއްދަތު އިތުރު ކުރުމަށް ބޭނުންވާ ސަބަބުތަކުގެ އެސެސްމަންޓެއް ހަދަންޖެހެ އެވެ. އަދި މާކެޓުގެ ރޭޓުތަކަށް ބެލުމަށްފަހު، އަގަށް ބަދަލު ގެނައުމުގެ އިހްތިޔާރު ވެސް ގަވާއިދުގެ ދަށުން ލިބެ އެވެ.
ލާމަރުކަޒީ ގާނޫނަށް ގެނައި އިސްލާހުތަކާއެކު މިދިޔަ އޭޕްރީލް މަހު ބޭއްވި ލޯކަލް ކައުންސިލްތަކުގެ އިންތިހާބަށްފަހު ސިޓީ އަދި ރަށު ކައުންސިލްތަކަށް ވަނީ ބޮޑެތި ބާރުތަކެއް ލިބިފަ އެވެ. އެ އިންތިހާބަށްފަހު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެފައި ވަނީ ލާމަރުކަޒީކޮށް ރާއްޖެ ހިންގަން ފެށުނީ އަދިކިރިޔާ ކަމަށެވެ.
"މިއަދަކީ ރާއްޖޭގެ ލާމަރުކަޒީ ނިޒާމުގެ ތާރީހުގައި ރަން އަކުރުން ފެވިގެންދާނެ ދުވަހެއް. ސަބަބަކީ މިއަދަކީ ހަގީގީ ލާމަރުކަޒީ ނިޒާމުން އަތޮޅުތަކާއި ސިޓީތަކާއި ރަށްތައް ހިންގަން ފެށުނު ދުވަސް ކަމަށް ވާތީ،" ކައުންސިލަރުން މަގާމުތަކާ ހަވާލުވުމުން މެއި 17، ގައި ރައީސް ވިދާޅުވެފައިވެ އެވެ.
