މާލޭގެ މަގުމަތިން ރޭ މީހަކު ވަގަށް ނެގި ކަމަށް އަޑުފެތުރިފައިވި ނަމަވެސް އެފަދަ ކަމެއް ހިނގާފައިނުވާ ކަމަށް ފުލުހުން މިރޭ ބުނެފި އެވެ.
ކޯސްޓު ގާޑުގައި މަސައްކަތް ކުރާ ހަސަން ފަހީމް، 37، ރޭ ވަގަށްނަގައި، ބަޔަކު އޭނާއަށް އަނިޔާކޮށްފައިވާ ކަމަށް ރަހުމަތްތެރިންނާއި އާއިލާގެ މީހުންގެ ކައިރި އޭނާގެ ބުނެފައިވެ އެވެ. އަދި މަގުމަތިން ވަގަށް ނެގި ކަމަށް ބުނާ ގޮތާއި އަނިޔާ ކުރި ކަމަށް ބުނާ ގޮތް ތަފްސީލުކޮށް ފަހީމް ކިޔައިދީފައިވެ އެވެ.
ނަމަވެސް އެ މައްސަލައިގައި ފުލުހުން މިރޭ ބުނެފައި ވަނީ ފަހީމުގެ މައްސަލައިގައި މިހާތަނަށް ހޯދިފައިވާ ކަންކަމަށް ބަލާއިރު "ރަހީނުކޮށްފައިވަނީ މާލެއިންކަމަށް ނުބެލެވޭ" ކަމަށެވެ.
"މިކަން ހިނގާފައިވަނީ އޭނާގެ އަމިއްލަ ދިރިއުޅުމާ ގުޅުންހުރި ޒާތީ ކަމެއްގެ ތެރެއިންކަމަށް މިހާތަނާށް ލިބިފައިވާ މައުލޫމާތުން ބެލެވޭ،" ފުލުހުން ބުނެފައިވެ އެވެ.
ފަހީމު ކިޑްނެޕްކޮށް ހައެއްކަ ގަޑިއިރު ވަންދެން އަނިޔާ ކުރި ކަމަށް އޭނާ ބުނުމުން ސިފައިންގެ ވަރަށް އިސް ވަދުފެއް ވަނީ އޭނާ ކައިރިއަށް ހޮސްޕިޓަލަށް ޒިޔާރަތްކޮށްފަ އެވެ. އަދި ފަހީމު ވަގަށް ނެގި ކަމަށް ބުނާ މައްސަލަ ކުށްވެރިކޮށް އެމްއެންޑީއެފުން މިއަދު ބަޔާނެއް ވެސް ނެރުނެވެ.
އޭގެ އިތުރުން، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ޑިފެންސް މިނިސްޓަރު މާރިޔާ އަހުމަދު ދީދީ ވަނީ ފަހީމުގެ ހާލު ބައްލަވައިފަ އެވެ. އަދި އޭނާގެ އާއިލާއަށް ވެސް މި ދަނޑިވަޅުގައި އެހީތެރިވެދެއްވާނެ ކަމަށް ސަރުކާރުން އޮތީ ބުނެފަ އެވެ.
