އައްމާން، އުރުދުން (ނޮވެމްބަރު 16) - އިރާނުގެ އަންހެން ފުޓްބޯޅަ ޓީމުގެ ގޯލްކީޕަރުގެ ޖިންސު ޔަގީން ކުރަން އުރުދުން އިން އޭޝިއަން ފުޓްބޯލް ކޮންފެޑެރޭޝަން (އޭއެފްސީ) ގައި އެދެފި އެވެ.
ދެހާސް ބާވީސް ވަނަ އަހަރު އޮންނަ އަންހެނުންގެ އޭޝިއަން ކަޕްގެ ކޮލިފައިން މެޗެއްގައި ސެޕްޓެމްބަރު 25 ވަނަ ދުވަހު އިރާނުން ވަނީ ފުރަތަމަ ފަހަރަށް އުރުދުން ބަލިކޮށްފަ އެވެ. ޕެނަލްޓީ ޖަހައިގެން އުރުދުން ބަލިވީ 2-4 އިންނެވެ.
އުރުދުންގެ ފުޓްބޯޅަ އެސޯސިއޭޝަނުގެ ރައީސް އަމީރު އަލީ ބިން އަލް ހުސެއިން ޓްވީޓު ކުރެއްވި ސިޓީއެއްގައި އެދިފައި ވަނީ "ޖިންސު ޔަގީން ކުރުމުގެ ތަހުގީގެއް" ހިންގައި ދިނުމަށެވެ.
އިރާނުގެ ޓީމުގެ ގޯލްކީޕަރަކީ ފިރިހެނަކަށް ވެއްޖެ ނަމަ އެއީ ވަރަށް ސީރިއަސް މައްސަލައެއް ކަމަށް ހުސެއިން ވިދާޅުވެ، އޭއެފްސީ "ނިދިން ހޭލުމަށް" އޭނާ ވަނީ ގޮވާލާފަ އެވެ.
ނަމަވެސް އިރާނުގެ ޓީމަށް ކުޅުންތެރިން ހޮވާ މަރްޔަމް އިންދްސޫތު އެ ވާހަކަތައް ދޮގު ކުރުމަށް ފަހު ބުނީ ކޮންމެ ކުޅުންތެރިޔަކު ވެސް ހޮވަނީ މެޑިކަލް ޓީމުން ރަނގަޅަށް ބެލުމަށް ފަހު ކަމަށެވެ.
"މެޑިކަލް ޓީމުން ކޮންމެ ކުޅުންތެރިއެއް ވެސް ރަނގަޅަށް ބަލައި ހޯމޯންސް ހުރި މިންވަރު ދެނެގަންނަން. އޭގެ ބޭނުމަކީ މިފަދަ މައްސަލަތައް ކުރިމަތިވެދާނެތީ ތައްޔާރުވުން،" އޭނާ ބުންޏެވެ.
"އޭއެފްސީން ބޭނުންވާ ހުރިހާ ލިޔުމެއް އެއްވެސް ލަސްކުރުމެއް ނެތި އަޅުގަނޑުމެން ފޯރުކޮށްދޭނަން."
އިރާނުގެ ގޯލްކީޕަރު ޒުހްރާ ކުދާއީގެ ޖިންސާ މެދު ސުވާލު އުފައްދާފައި ވާއިރު، އުރުދުން އިން އޭއެފްސީ އަށް ފޮނުވި ސިޓީގައި ބުނީ އިރާނަކީ "ޖިންސު އޮޅުވާލުމާއި މަނާ ބޭސް ބޭނުންކުރުމުގެ" މާޒީއެއް އޮތް ގައުމެއް ކަމަށެވެ.
ނަމަވެސް އިރާނުން ބުނެފައި ވަނީ އުރުދުން އިން އެފަދަ ވާހަކައެއް ދައްކަނީ އެ ގައުމުގެ އަތުން ބަލިވުމުގެ ލަދާ ހެދި ކަމަށާއި އޭޝިއަން ކަޕްގެ ޗެމްޕިއަނުންނަށް ވުމުގެ ބޮޑު އުއްމީދެއް އުރުދުން އިން ގެންގުޅޭ ކަމަށެވެ.
އޭއެފްސީ އަންހެނުންގެ އޭޝިއަން ކަޕް ފަށަން ހަމަޖެހިފައި ވަނީ އަންނަ ޖެނުއަރީ މަހު އިންޑިއާގަ އެވެ.
