މިދިޔަ މަހުގެ ތެރޭ ފެންމަތިވި ޑްރަގުގެ ބޮޑު މައްސަލާގައި ހައްޔަރުކުރި ދެ މީހުން ޝަރީއަތް ނިމެންދެން ބަންދުކުރުމަށް އިއްޔެ ކުރިމިނަލް ކޯޓުން އަމުރުކޮށްފި އެވެ.
ރ. އަތޮޅުގައި ފުލުހުން ހިންގި ބޮޑު ޑްރަގު އޮޕަރޭޝަންގައި 215 ކިލޯގެ ހެރޮއިން ހޯދައި ދެ މީހަކު ހައްޔަރުކުރި އެވެ. ރ. މަޑުއްވަރީ ފަޅަށް "ފެށުން 2" ކިޔާ ލޯންޗެއްގައި ވަންތަނާ ހައްޔަރުކުރީ ރ. މަޑުއްވަރީ، ފިނިފަރު އަލީ ޝާކިރާއި މަޑުއްވަރި، ފެހިއަލި ނިމާލް އަބްދުލްހާރިސް އެވެ.
އޭގެފަހުން އެމީހުން ބަންދުގައި ތިބިިއިރު, ބަންދު މުއްދަތު އިތުރު ކުރުމަށް ދެ މީހުން ވެސް ވަނީ އިއްޔެ ކޯޓަށް ހާޒިރުކޮށްފަ އެވެ.
ކުރިމިނަލް ކޯޓުން ވަނީ ދެ މީހުން ވެސް ބަންދުގައި ބަހައްޓަން ޖެހޭ ސަބަބުތައް އޮތް ކަމަށް ކަނޑައަޅައި, ޝަރީއަތް ނިމެންދެން ބަންދުކުރުމަށް އަމުރުކޮށްފަ އެވެ. އެގޮތުން, ބަންދު އަމުރުގައިވާ ގޮތުގައި ދެ މީހުންގެ މައްޗަށް ވެސް ތުހުމަތުވާ މިންވަރަށް އެކަށީގެންވާ ހެކިތައް ފުލުހުން ހުށަހަޅާފައިވެ އެވެ.
އަމުރުގައިވާ ގޮތުން ފުލުހުން ވަނީ ދެ މީހުންގެ މައްޗަށް ވެސް އިންޓެލް ރިޕޯޓަކާއި ލޯންޗުން ފެނުނު ސެޓެލައިޓް ފޯނުގެ އެކްސްޓްރެކްޝަން ރިޕޯޓާއި ދެ މީހުންގެ މޮބައިލް ފޯނުގެ އެކްސްޓްރެކްޝަން ރިޕޯޓެއް ހުށަހަޅާފަ އެވެ.
ދެ މީހުންގެ މައްޗަށް ވެސް ބޮޑެތި ތުހުމަތުތަކެއް
ކުރިމިނަލް ކޯޓުގައި މީގެކުރިން ބޭއްވި ބަންދު މަޖިލީހުގައި ފުލުހުން ބުނި ގޮތުގައި ފަޅު ތެރޭން ދެ މީހުން ހުއްޓުވައި ބަލާ ފާސްކުރުމުގެ ތެރެއިން ލޯންޗުން ސެޓެލައިޓް ފޯނަކާއި ގިނަ އަދަދެއްގެ ޕެޓްރޯލް ހަން ފެނިފައިވެ އެވެ.
ދެ މީހުންގެ ހަށިގަނޑުގެ އެކިތަންތަނުން ވެލީގެ އަސަރު ފެނިފައިވާ ކަމަށާއި ލޯންޗްގެ ގެގަނޑުގެ އަރިމަތިން އިތުރު ބޯޓަކާ ގާތްކޮށްފައިވާކަމުގެ ނިޝާންތައް ހުރި ކަމަށް ވެސް ފުލުހުން ފާހަގަކުރި އެވެ.
ފުލުހުން މިކަން ގުޅުވަނީ ކަނޑުމަތީގައި މަސްތުވާތަކެތީގެ ޑީލެއް ނިންމުމަށްފަހު އެމީހުން އެނބުރި މަޑުއްވަރީއަށް ވަނީ ކަމަށެވެ. ފުލުހުން އެ ދެ މީހުން ހިފެހެއްޓީ ވެސް މަސްތުވާތަކެތީގެ ވިޔަފާރި ކުރާ ކަމުގެ އިންޓެލިޖެންސް ރިޕޯޓެއް ލިބުމާ ގުޅިގެންނެވެ.
އޮޕަރޭޝަންގެ ތެރެއިން ފުލުހުން ވަނީ ރ. އަތޮޅުގެ ގިނަ ފަޅު ރަށްތަކެއް ވެސް ބަލާފަ އެވެ. އެގޮތުން ރ.ބޮޑުފަރު ފިނޮޅުން ފެޓްރޯލް ހުސްކުރި 20 ލީޓަރުގެ 63 ހަން ފެނިގެން އެ ދެ މީހުންނާ ސުވާލުކުރުމުން އެއީ އެމީހުން މަސްތުވާތަކެތި ބަލާދިއުމަށްޓަކައި ޓެސްޓް ދަތުރެއް ކުރަން ބޭނުންކުރި ފެޓްރޯލް ހުސްކުރި ހަންތަކެއްކަމަށް ބުނެފައިވާ ކަމަށް ފުލުހުން ބުންޏެވެ.
އަދި މިދެމީހުން އެތެރެކުރި މަސްތުވާތަކެތި ރ.ރާނބުގަލީގައި ހުންނާނެ ކަމަށް ބުނެ އެތަކެތި ދައްކާފައިވާ ކަމަށް ވެސް ފުލުހުން ބުނެ އެވެ. ނަމަވެސް, މި ވާހަކަތަކަށް އެމީހުން ކޯޓުގައި އިންކާރު ކުރެ އެވެ. ފުލުހުން ގާތު އެފަދަ އެއްވެސް ވާހަކައެއް ދައްކާފައިނުވާނެ ކަމަށް އެމީހުންގެ ވަކީލް އިއްޔެ ކޯޓުގައި ބުނެފައިވެ އެވެ.
ނަމަވެސް, ރ.ރާނބުގަލި ބަލައިފާސްކުރުމުން ތުހުމަތުކުރެވޭ ދެމީހުން މަސްތުވާތަކެތި ހުންނާނެ ކަމަށް ބުނި ކަށިކެޔޮގަހުގެ ތެރެއިން، 11 ގޯނި ފެނިގެން ނަގާ އެގޯނިތައް ބަލައިފާސްކުރި ކުރުމުން މަސްތުވާތަކެތި ކަމަށް ޝައްކުކުރެވޭ އެއްޗެއްހުރި ޖުމްލަ 215 ކަރުދާސްކޮތަޅު (ވަގުތީ ބަރުދަނުގައި 21 ކިލޯ) ފެނިފައިވާކަން ވެސް ކޯޓުގައި ފުލުހުން ހާމަކުރި އެވެ.
ފުލުހުން ބުނި ގޮތުގައި ލޯންޗުން ފެނުނު ސެޓްލައިޓު ފޯނުގެ އެކްސްޓްރެކްޝަން ރިޕޯޓަށް ބެލުމުން މިފޯނުގައި ހުރި މެސެޖުތަކުގައި އެމީހުން ރާއްޖެ ސަރަހައްދުން ބޭރަށް ދިޔަކަމުގެ މެސެޖުތަކަކާއި ބޯޓަކާ ބައްދަލުކުރިކަމުގެ މެސެޖްތަކެއް ފެނިފައިވެ އެވެ.
