މަސްތުވާތަކެއްޗާ ދެކޮޅަށް ފުލުހުން ހިންގި ބޮޑު އޮޕަރޭޝަނެއްގައި އަތުލައިގަތް ގިނަ ބަޔަކު ދޫވެއްޖެ އެވެ.
މިދިޔަ ބުދަ ދުވަހު ފުލުހުން ކުރިއަށް ގެންދިޔަ މި އޮޕަރޭޝަންގައި މާލޭގެ ދެ ގެއަކުން ވަނީ ދެ ކިލޯއަށްވުރެ ގިނަ ކެނަބިސް އާއި 200 ގްރާމަށްވުރެ ގިނަ ހެރޮއިން އަދި ބަނގުރާފުޅިއެއް ހޯދާފަ އެވެ.
މި މައްސަލާގައި މަސްތުވާތަކެތީގެ ވިޔަފާރީ ކުރަމުންދާ ކަމުގެ ތުހުމަތުގައި ހަތަރު ދިވެހި ފިރިހެނުންނާއި ތިން ދިވެހި އަންހެނުން ހައްޔަރު ކުރި އެވެ. ނަމަވެސް, ކޯޓުން ބަންދުގެ މުއްދަތު ޖަހާދިނީ ދެ މީހަކަށެވެ.
ފަނަރަ ދުވަހުގެ ބަންދުގެ މުއްދަތު ޖެހީ 29 އަހަރާއި 33 އަހަރުގެ ދެ ފިރިހެނުންނަށެވެ.
ފުލުހުން ބުނި ގޮތުގައި މި އޮޕަރޭޝަން ހިންގީ މަސްތުވާތަކެތި އެތެރެކޮށް އެތަކެތި ބޭނުންކޮށް ގެންގުޅެ އަދި ވިޔަފާރިކުރަމުންދާކަމާއި، ބަނގުރާ އެތެރެކޮށް ބަނގުރަލުގެ ވިޔަފާރި ކުރަމުން ދާކަމުގެ މައުލޫމާތު ފުލުހުންގެ އިންޓެލިޖެންސަށް ލިބުމާ ގުޅިގެންނެވެ.
