މަރުވެފައި އޮތް އަންބަރު މަހެއް (ސްޕާމް ވޭލް) އައްޑޫ ސިޓީ ހިތަދޫ ނޭޗާ ޕާކާ ދިމާލަށް ލައްގައިފި އެވެ.
ދުނިޔެއިން ނެތިދާނެކަމުގެ ބިރުހީވެފައިވާ ބާވަތްތަކުގެ ތެރޭގައި ހިމެނޭ މީގެ މަހެއް ފެނުނީ މިއަދު ހެނދުނު ނޭޗާ ޕާކު ހުންނަ ސަރަހައްދުގެ ފުއްޓަރާ ދިމާލުންނެވެ.
އެ ސަރަހައްދަށް ދިޔަ އާންމުންގެ މީހަކު މި ނޫހަށް ބުނި ގޮތުގައި މި މަހުގެ ބޮޑުމިިނުގައި 45 ވަރަކަށް ފޫޓު ހުންނާނެ އެވެ. ފެނުނު އިރު ވެސް ވަރަށް ބޮޑަށް ކުނިވެ، ހަލާކުވެފައިވާ ކަމަށް ފާހަގަކުރި އެވެ.
"މުޅި ސަރަހައްދުގަ ހުރީ ކުނި ވަސް ހިފާފަ," އައްޑޫ ސިޓީން މައުލޫމާތު ދިން މީހަކު ބުންޏެވެ.
މިހާރު އެ ރަށު ކައުންސިލުން އަންނަނީ އެމްއެންޑީއެފްއާ ގުޅިގެން މި މަސް ނައްތާލުމުގެ މަސައްކަތް ކުރަމުންނެވެ.
މި މަސައްކަތާ ގުޅިގެން އައްޑޫ ސިޓީ ކައުންސިލްގެ ހިތަދޫ ކޮރަވައު ދާއިރާގެ މެމްބަރު އިބްރާހިމް ޝިނާޒު މި ނޫޙަށް ވިދާޅުވީ މަސް އޮތް ތަނުން ނަގައިގެން ވަޅުލުމުގެ މަސައްކަތް ކައުންސިލުން ކުރަމުން އަންނަ ކަމަށެވެ.
ދިވެހިން މާވަހަރު މަހޭ ވެސް ކިޔާ އުޅޭ މި ވައްތަރުގެ މަހަކީ ރާއްޖޭގައި އާންމުކޮށް ދިރިއުޅޭ މަހެއް ނޫނެވެ. ނަމަވެސް, އެއް ތަނުން އަނެއް ތަނަށް ދަތުރުކުރާ އިރު ދޭތެރެއަކުން ރާއްޖޭގެ ކަނޑުގެ ސަރަހައްދަށް، ގިނައިން ދެކުނުގެ އަތޮޅުތަކާ ދިމާލުން ވަދެގެން އުޅޭ މަންޒަރު ފެނެ އެވެ.
