މާލޭގައި މީހަކު ބްލެކްމެއިލްކޮށް ގަދަކަމުން ބަރަހަނާކުރުމަށްފަހު ވީޑިއޯކޮށް, ފައިސާ ފޭރެެން އުޅުނު މައްސަލައެއް ފުލުހުން ތަހުގީގުކުރަން ފަށައިފި އެވެ.
ފުލުހުން މިރޭ ބުނީ، މާލޭގައި އުމުރުން 27 އަހަރުގެ ދިވެހި ފިރިހެނަކު ބްލެކްމެއިލްކޮށް ބިރުދައްކައި ބަރަހަނާކުރުމަށްފަހު ވީޑިއޯކޮށް، އެމީހާގެ އަތުން ފައިސާ ހޯދަން މަސައްކަތްކުރި މައްސަލައެއް ރޭ ދަންވަރު 3:49 ހާއިރު ރިޕޯޓުކޮށްފައިވާ ކަމަށެވެ.
އެ މައްސަލައާ ގުޅިގެން ތިން މީހަކު ފުލުހުންގެ ބެލުމުގެ ދަށަށް ގެނައިއިރު، އެ އެންމެންނަކީ ވެސް ދިވެހި ފިރިހެނުން ކަމަށް ފުލުހުން ބުނެ އެވެ.
އެ މައްސަލައިގައި ހައްޔަރުކޮށްފައިވަނީ އުމުރުން 24، 27 އަދި 31 އަހަރުގެ ތިން މީހުންނެވެ. އެމީހުން ހައްޔަރުކޮށްފައިވަނީ ރޭގެ ވަގުތެއްގައި ކަމަށް ފުލުހުން ބުނެ އެވެ.
އަދި އެ މައްސަލަ އިތުރަށް ތަހުގީގުކުރަމުންދާ ކަމަށް ވެސް ފުލުހުން ބުނެ އެވެ.
