ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު އއ. މަތިވެރިއަށް ވަޑައިގަތުމުން އަނެއްކާ ވެސް އެ ރަށުގައި ހަމަނުޖެހުމެއް ހިނގައިފި އެވެ.
މަތިވެރި ކައުންސިލް މެމްބަރަކު ވިދާޅުވި ގޮތުގައި, މިއަދު ހަވީރު އެ ރަށަށް މެމްބަރު ޖާބިރު ވަޑައިގަތް ފަހުން އޭނާއާއެކު ރަށަށް އައި ބަޔަކާއި ރަށުގެ މީހަކާ ދެމެދު ހަމަނުޖެހުމެއް ހިނގި އެވެ.
"އެއީ އެމީހާ ގެންދިޔަކަމަށް ވަނީ ކާސާ މިއާ ގެސްޓްހައުސްގައި ކޮންމެވެސް މަސައްކަތެއް ކުރަން، ގެންގޮއްސަ އެތަނުން ހިނގައިދިޔަ އަރާރުމެއްގައި އެމީހާއާ މާރާމާރީ ހިންގީ. ދެން ގެންދިޔައީ ސީދާ މާރާމާރީ ހިންގަން ކަމެއް ނޭނގެ، އެކަމަކު ޖާބިރުއާ އެއްކޮށް ރަށަށް އައި ފަސް ވަރަކަށް މީހުން ހަމަލާދިނީ، އެއީ ވެސް ރަށުން ބޭރު ބައެއް،" އެ ކައުންސިލަރު ވިދާޅުވި އެވެ.
ކާސާ މިއާއަކީ މެމްބަރު ޖާބިރު މަތިވެެރީގައި ހިންގާ ގެސްޓްހައުސްއެކެވެ. އެ ގެސްޓްހަސްއަކީ ރަށުގައި ހުންނަ އެންމެ ބޮޑު އެއް ގެސްޓްހައުސްވެސްމެ އެވެ. މީގެ ކުރިން އެ ގެސްޓްހައުސްގައި މަސައްކަތްކުރާ މީހާކަށް މެމްބަރު ޖާބިރު މުސާރަ ނުދީގެން ވެސް މައްސަލަތަކެއް ފެންމަތިވި އެވެ. އަދި އެ ގެސްޓްހައުސްގައި 2019 ވަނަ އަހަރު ހިނގައިދިޔަ އަލިފާނުގެ ހާދިސާއަކީ ގަސްތުގައި ބަޔަކު ކުރި ކަމެއް ކަމަށް ވެސް ޖާބިރު ތުހުމަތު ކުރައްވާފަ އެވެ.
މިއަދު ރަށުގައި ހިނގި މާރާމާރީގައި މާ ބޮޑު އަނިޔާއެއް ރަށު މީހާއަށް ނުލިބޭ ކަމަށް އެ ކައުންސިލް މެމްބަރު ވިދާޅުވި އެވެ. އޭނާ އިތުރަށް ވިދާޅުވި ގޮތުގައި މެމްބަރު ޖާބިރު ރަށަށް ވަޑައިގެން އުޅުއްވާތާ ދެ ދުވަސްވަރު ވެއްޖެ އެވެ. އަދި އެ ދެ ދުވަސްތެރޭ އާންމުންނާ ދިމާލަށް ވެސް މެމްބަރު ޖާބިރު ރުޅި އިސްކުރައްވައި ވާހަކަ ދައްކަވާފައިވާ ކަމަށް އެ ކައުންސިލަރު ވިދާޅުވި އެވެ.
އެ މައްސަލައާ ގުޅިގެން ފުލުހުން ބުނީ މަތިވެރީގެ ހޮޓަލަކަށް ދިޔަ މީހަކަށް އެ ހޮޓަލުގެ ތެރޭގައި ތިބި ބަޔަކު ހަމަލާދީ މާރާމާރީ ހިންގި ކަމުގެ މައުލޫމާތުގެ ރިޕޯޓެއް މިއަދު 4:50 ހާއިރު ލިބިފައިވާ ކަމަށެވެ. އަދި އެ މައްސަލަ ފުލުހުން މިހާރު ތަހުގީގުކުރަމުންދާ ކަމަށެވެ.
އެ މައްސަލައާ ގުޅިގެން މެމްބަރު ޖާބިރުގެ ބަހެއް އޭނާ ފޯނަށް ޖަވާބުނުދެއްވާތީ، ލިބޭ ގޮތެއް ނުވި އެވެ. ނަމަވެސް, ހަމަނުޖެހުން ހިނގުމާއެކު ޖާބިރު ވަނީ މައިވެރިން ވ. ފެލިދޫއަށް ވަޑައިގެންފަ އެވެ.
