ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް މެއި 6، ގައި ދިން ބޮމުގެ ހަމަލާގެ ތަހުގީގު ކުރިއަށްދާ ގޮތް ބެލުމަށް އައްޔަންކޮށްފައި ހުންނެވި އިނގިރޭސިވިލާތުގެ ކުއީންސް ކައުންސެލާ ޖެނިން ކާސްޓީ ބްރިމްލޯ ރައްޔިތުންގެ މަޖިލީހުގެ ނައިބު ރައީސް އިވާ އަބްދުﷲ އާ މިއަދު ބައްދަލުކުރައްވައިފި އެވެ.
ކާސްޓީ ރައްޔިތުންގެ މަޖިލިހށް ވަޑައިގެން އިވާއާ ބައްދަލު ކުރެއްވިއިރު ނަޝީދު މިވަގުތު ހުންނެވީ ސްކޮޓްލެންޑުގައި ކުރިއަށްދާ ކޮޕް-26 އަށް ވަޑައިގެން އެ ގައުމުގެ ގްލާސްގޯގަ އެވެ.
ނަޝީދު އަވަހާރަކޮށްލަން އުޅުނު މައްސަލައިގައި 10 މީހަކު ހައްޔަރުކޮށް، ޖިނާއީ ދައުވާތައް ވެސް ވަނީ އުފުލައިފަ އެވެ. އަދި ގިނަ މީހުންގެ ޝަރީއަތް ފެށިގެން މިހާރު ދަނީ ކުރިއަށެވެ.
ބޮމުގެ ހަމާލެ ފަހަތުގައި އެކަމަށް ފަންޑު ކުރި ބަޔަކު ތިބޭނެ ކަމަށް ނަޝީދު ވިދާޅުވަމުން ގެންދެވި ނަމަވެސް ފުލުހުން ބުނެފައި ވަނީ އެއީ ފައިސާއެއް ދިން ހަމަލާއެއް ނޫން ކަމަށެވެ.
ހަމަލާއާ ގުޅިގެން ޖަރުމަންގައި ފަރުވާ ހޯއްދެވުމަށް ފަހު އިތުރު ފަރުވާއަށް އިނގިރޭސި ވިލާތުގައި ހުންނަވައި ނަޝީދު ވަނީ އެމަނިކުފާނު ވަކީލެއްގެ ގޮތުގައި ކޮއްކޯފުޅު ނާޒިމް އަބްދުއްސައްތާރު ހަމަޖައްސަވައިފަ އެވެ. އަދި މައްސަލައާ ގުޅިގެންއެ އެމަނިކުފާނުގެ ބަޔާން ދެއްވަން ތައްޔާރުކަމަށާއި ތުހުމަތުކުރެވޭ މީހުންގެ ޝަރީއަތްތަކުގެ އިބްތިދާއީ މަރުހަލާ ނިމުމުގެ ކުރިން އެމަނިކުފާނުގެ ބަޔާން ނެންގެވުމަށް ވަނީ އެދިވަޑައިގެންފަ އެވެ.
