ކްރިމިނަލް ކޯޓުގެ ފަނޑިޔާރުންގެ އޯޑިއޯ ރެކޯޑިންތަކެއް ކަމަށް ބުނެ ދައުރުވި އޯޑިއޯގައި ހިމެނޭ އަޑާމެދު އިންކާރުކުރެއްވި ނަމަވެސް، ގާޒީ ހުސައިން ފާއިޒު ރަޝާދުގެ އަޑު ދިމާވާ ކަމަށް ފޮރިންސިކް ތަހުލީލުން ކަށަވަރުވެފައިވާތީ، އޭނާގެ މައްސަލަ ބެލުމަށް ނިންމައި، ތަހުގީގު ކޮމިޓީއެއް ޖުޑީޝަލް ސާވިސް ކޮމިޝަނުން އެކުލަވާލައިފި އެވެ.
އޯޑިއޯތަކުގެ ފޮރިންސިކް ތަހުލީލުގެ ނަތީޖާ ފުލުހުން ޖޭއެސްސީ އަށް އިއްޔެ ލިބުމާއެކު، ކޮމިޝަނުން ނެރުނު ބަޔާނެއްގައި ބުނެފައި ވަނީ ބައެއް މީޑިއާތަކުން ތުހުމަތު ރައްދުކުރި ތިން ފަނޑިޔާރުންގެ ތެރެއިން، ކްރިމިނަލް ކޯޓުގެ ގާޒީ އަލީ އާދަމް އާއި ޑްރަގް ކޯޓުގެ ގާޒީ މުހައްމަދު ސަމީރުގެ އަޑާ، އެ އޯޑިއޯތަކުގައި ވާހަކަ ދައްކާފައިވާ މީހާގެ އަޑު ދިމާ ނުވާކަން ކަށަވަރު ވެފައިވާ ކަމަށެވެ.
އެ ދެ ފަނޑިޔާރުންގެ މައްޗަށް އުފައްދާފައިވަނީ ދޮގު ތުހުމަތުތަކެއް ކަން ފާހަގަކޮށް އެ ދެ ފަނޑިޔާރުންގެ މައްޗަށް ތުހުމަތުކުރެވޭ މައްސަލައެއް ނެތް ކަމަށް ކޮމިޝަނުން ވަނީ ނިންމާފައެވެ.
ފޮރެންސިކް ތަހުލީލަށް ފޮނުވި ތިން އޯޑިއޯއަކީވެސް ޓެމްޕަކޮށް ރެކޯޑިންގައިވާ ވަކި ބައެއް ޑިލީޓްކޮށް ނުވަތަ ވަކި ވަކި ކްލިޕްތަކަކުން ގުޅުވައިފައިވާ އޯޑިއޯތަކެއްކަން ފޮރެންސިކް އެނާލިސިސްއިން އެނގެއެވެ،" ޖޭއެސްސީގެ ބަޔާނުގައިވެ އެވެ.
އޯޑިއޯތަކުގެ މައްސަލަ ރައްދުވި ތިން ފަނޑިޔާރުންނަކީ ކުރީ ރައީސް އަބްދުﷲ ޔާމީނަށް ފަސް އަހަރުގެ ޖަލު ހުކުމެއް އިއްވި ކްރިމިނަލް ކޯޓުގެ ބެންޗުގައި ހިމެނިވަޑައިގަންނެވި ގާޒީންނެވެ.
އޯޑިއޯތަކުގެ މައްސަލައިގައި ތިން ފަނޑިޔާރުން ޖޭއެސްސީއަށް ހާޒިރުކޮށް ސުވާލުކުރުމުން، ލީކްކޮށްލާފައި ވަނީ ފޭކު އޯޑިއޯތަކެއް ކަމަށް ވިދާޅުވި ކަމަށް އޯގަސްޓް މަހު ކޮމިޝަނުން ބުނެފައިވެ އެވެ.
ކޮމިޝަނުގެ ބަޔާނުގައި ބުނެފައި ވަނީ، ގާޒީ ފާއިޒުގެ އަޑާ ދިމާވާ އޯޑިއޯގައި ދައްކާފައި ހުރި ވާހަކަތަކަށް ބާލައިރު، ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުގައި ހިންގި ޝަރީއަތާ ގުޅިގެން އެއްވެސް ފަރާތަކުން އެއްވެސް ފަނޑިޔާރަކާ ބައްދަލުކޮށްފައިވާ ކަމަށް، ނުވަތަ ބައްދަލު ކުރަން އެދިފައިވާކަމަށް ނުވަތަ އެ ޝަރީއަތަށް ނުފޫޒު ހިންގުމަށް އެއްވެސް މަސައްކަތެއް ކޮށްފައިވާ ކަމަށް ވިދާޅުވެފައި ނެތް ކަމަށެވެ.
ނަމަވެސް، އެ އޯޑިއޯގައި ކޯޓުގެ ޝަރީޢަތަކާ ގުޅޭ ގޮތުން ކޯޓުން ބޭރުގައި ގިނަ ވާހަކަތަކެއް ދައްކާފައިވާކަމާއި، އެގޮތަށް ފަނޑިޔާރު އަމަލު ބެހެއްޓެވުމުގެ ސަބަބުން، ބަޔަކަށް އޭގެ ނާޖާއީޒު ފައިދާ ނެގުމުގެ ފުރުސަތު ފަހިވެ، އެހެން ފަނޑިޔާރުންގެ އިތުބާރު ގެއްލޭ ގޮތަށް، އޯޑިއޯތަކެއް ހަދައިގެން ދައުރުކުރުމުގެ އަމަލު ހިންގުމަށް މަގު ފަހިވެގެން ދިޔަކަން ކޮމިޝަނުން ފާހަގަކޮށްފައިވެ އެވެ.
"ކޯޓުގެ ފަނޑިޔާރުންގެ އޯޑިއޯތަކެއް ކަމަށް ބުނެ، ބަޔަކު ހަދައިގެން ފަނޑިޔާރުންގެ މައްޗަށް ތުހުމަތުކޮށް ދައުރުކުރި ޞައްޙަ ނޫން އޯޑިއޯތަކާއި، އެމައްޗަށް ބިނާކޮށް ފަނޑިޔާރުންގެ މައްޗަށް މަތިކުރި ދޮގު ތުހުމަތުތައް މިކޮމިޝަނުން ކުށްވެރިކުރަމެވެ،" ބަޔާނުގައި ބުނެފައިވެ އެވެ.
ކޯޓުތަކާއި ފަނޑިޔާރުންނާ ގުޅޭ ގޮތުން މީޑިއާތަކުން ހަބަރު ލިޔާއިރު މީޑިއާއަށް ލިބޭ މައުލޫމާތު އާންމުކުރުމުގެ ކުރިން އެ މަޢުލޫމާތަކީ އިތުބާރު ކުރެވޭ މަސްދަރުން ލިބޭ މައުލޫމާތުކަން ޒިންމާދާރުކަމާއެކު ކަށަވަރުކުރުމަށް ޖޭއެސްސީންގެ ބުނެފައިވެ އެވެ.
