އދ. ދަނގެތީގެ ފަޅު ގެޔެއްގެ ތެރޭ ހުރި ވަޅެއްގެ ތެރެއިން އަނިޔާވެރިކޮށް މަރާލާފައި އޮއްވާ ފެނުނު އެ ރަށުގެ ވިޔަފާރިވެރިޔާ މަހުމޫދު އަބޫބަކުރުގެ މައްސަލައިގައި ހައްޔަރުކޮށްފައިވާ ބިދޭސީ މީހާގެ ބަންދަށް އިތުރު 15 ދުވަސް ކޯޓުން ޖަހައިފި އެވެ.
މަހުމޫދުގެ މަރަށް ދެވަނަ ދުވަހު ހައްޔަރުކުރި ޝާ އަލޮމް މިއާ (ސާލިމް) ގެ ބަންދަށް އެންމެ ފުރަތަމަ ވެސް ދަނގެތީ ކޯޓުން 15 ދުވަސް ޖެހި އެވެ. އެ މުއްދަތު އިއްޔެ ހަމަވުމާއެކު ބަންދު އިތުރުކޮށްދިނުމަށް ސާލިމް ކޯޓަށް ގެންދިޔުމުން އިތުރު 15 ދުވަސް ޖަހައިދީފައިވާ ކަމަށް ފުލުހުންގެ މީޑިއާ އޮފިޝަލް މިއަދު ވިދާޅުވި އެވެ.
ކޯޓުގައި ބަންދު މަޖިލިސް ވަރަށް ދިގުކޮށް ކުރިއަށް ގެންދިޔަ އެވެ.
ފުލުހުންގެ ފަރާތުން ތަހުގީގުގެ އެންމެ ފަހުގެ މައުލޫމާތުގެ ގޮތުގައި ހާމަކުރީ، މަހުމޫދު މަރާލީ އަލޮމް މަހުމޫދުގެ އަތުން ފައިސާތަކެއް ފޭރެން އުޅުމުގެ ތެރޭގައި ކަމަށެވެ. އެވަގުތު މަހުމޫދުގެ އަތުގައި ހުރީ ކިހާ އަދަދެއްގެ ފައިސާއެއްކަމެއް އަދި ފުލުހުން ހާމަކޮށްފައި ނުވި ނަމަވެސް، އާއިލާއިން ވަނީ މަހުމޫދަކީ ގިނަ އަދަދެއްގެ ފައިސާ އަބަދު ވެސް ޖީބުގައި ގެންގުޅޭ މީހެއްކަމަށް މީގެ ކުރިން ބުނެފަ އެވެ.
މަހުމޫދު މަރާލި ރޭ، އޭނާއަށް ފޯނު ކޯލެއް އައިސްގެން ނުކުމެގެން ދިޔަކަމަށް އާއިލާއިން ވަނީ މީގެ ކުރިން ބުނެފަ އެވެ. ފޯނަށް ޖަވާބު ދިނުމަށްފަހު "މިގަޑީގަ؟" ހޭ މަހުމޫދު ފޯނުން ވާހަކަދެއްކި މީހާ ކައިރީ އެހިކަމަށް އާއިލާއިން ބުނެ އެވެ. އެއީ އާއިލާއަށް މަހުމޫދު އެންމެ ފަހުން ދިރިހުއްޓާ ފެނުނު ވަގުތެވެ.
މަހުމޫދު މަރާލުމުގައި ސާލިމް ނޫން އެހެން މީހަކު ހަރަކާތްތެރިވެފައިނުވާ ކަމަށް ތަހުގީގަށް ފާހަގަވެފައިވާކަމަށް އާއިލާ އާއި އެ ރަށު ކައުންސިލާ ބައްދަލުކޮށް ފުލުހުން ވަނީ ބުނެފަ އެވެ.
މަހުމޫދުގެ މަރު؛ އަމާން ދަގެއްޗަށް ސިހުން!
މަހުމޫދު މަރާލުމަށް ފަހު ދަނގެތީގައި މަހުމޫދުގެ އާއިލާއަށް ނިސްބަތްވާ ފަޅު ގެޔެއްގެ ވަޅަކަށް އެއްލާލާފައި އޮއްވާ އޭނާގެ ހަށިގަނޑު ފެނުނީ އޭނާ ގެއްލިގެން ހޯދަމުން ދަނިކޮށެވެ. ހަށިގަނޑު ފެނުނުއިރު އަތާއި ފައި އަދި ބޮލުގައި ގޯނިތަކެއް އައްސާފައި ހުއްޓެވެ.
ހަށިގަނޑު ފުރަތަމަ ފެނުނު މީހުން ބުނީ މަހުމޫދަށް ވަޅިއަކުން ހަމަލާދީ ވަރަށް އަނިޔާކޮށްފައި ހުރި ކަމަށެވެ. އެ ސަރަހައްދުގައި އެ ވަޅި އާއި ދަގަނޑު ބުރިއެއް ވެސް އޮތެވެ.
މަރުގެ ފަހަތުގައި ތިބީ އެ ރަށުގައި މަސްތުވާތަކެތީގެ މައްސަލަތަކެއްގައި ހިމެނޭ ބަޔަކު ކަމަށް ރައްޔިތުން ތުހުމަތުކޮށް އެމީހުން ފުލުހުންނާ ހަވާލުކޮށްފައިވަނިކޮށް މުޅި މައްސަލަ އެނބުރިގެން ދިޔައީ ސާލިމްއާ ދިމާއަށެވެ.
ފުލުހުން އޭނާގެ މައްޗަށް ތުހުމަތު އަމާޒުކުރީ އެންމެ ފުރަތަމަ އަވައްޓެރިއެއްގެ ފަރާތުން ލިބުނު ރިޕޯޓަކާ ގުޅިގެންނެވެ. އެ އަވައްޓެރިޔާ ބުނާ ގޮތުން، މަހުމޫދު އެންމެ ފަހުން ފެނުނު ރޭ ނެދުންގެ ތެރެއިން މީހެއްގެ ހަޅޭކުގެ އަޑު އިވުނެވެ.
އެ ވަގުތު އޭނާ ފާރުމަތިން ބޯދިއްކޮށްލިއިރު، އެ ގޭގައި އުޅޭ ބިދޭސީ މީހާ ކޮންމެވެސް އެއްޗެއް ދަމާފައި ގެންދިޔަހެން އޭނާއަށް ހީވީކަމަށް މި މަންޒަރު ފެނުނު މީހާއާ ހަވާލާދީ މީހުން ބުނެ އެވެ.
