އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ކައިރިން ބޮޑުތަކުރުފާނު މަގުގައި ފެންބޮޑު ވަނީ އެ ހޮސްޕިޓަލުގެ ކޫލިން ޓަވަރުތަކުން ބޭރުކުރާ ފެނުގެ ސަބަބުންކަން ފާހަގަވެފައިވާ ކަމަށާއި، އަދި އެ މައްސަލަ ހައްލުކުރުމަށްޓަކައި އެ ހޮސްޕިޓަލާ މާލެ ސިޓީ ކައުންސިލާ ދެމެދު މިހާރު މަޝްވަރާކުރަމުންދާ ކަމަށް ސިޓީ ކައުންސިލުން ބުނެފި އެވެ.
ސިޓީ ކައުންސިލުން އިއްޔެ ނެރުނު ބަޔާނެއްގައި ބުނެފައިވަނީ އައިޖީއެމްއެޗް ކައިރިން ބޮޑުތަކުރުފާނު މަގުގައި ފެންބޮޑުވާ މައްސަލައިގައި އާއްމުންގެ ޝަކުވާ ކައުންސިލަށް ލިބެމުންދާ ކަމަށެވެ. އެހެންކަމުން އެ ޝަކުވާތަކާއެކު، އެ ސަރަހައްދުގައި ފެންބޮޑުވަނީ ކޮން ސަބަބަކާހުރެތޯ ކައުންސިލުން ބަލާފައިވާ ކަމަށް އެ ބަޔާނުގައި ވެ އެވެ.
"އެ ފެންގަނޑު ހެދެނީ ކޮން ގޮތަކުންތޯ ބެލިއިރު، އެތަނުގައި ފެންގަނޑު ހެދެނީ އައިޖީއެމްއެޗުގެ ކޫލިން ޓަވަރުތަކަކުން ބޭރުކުރާ ފެންތަކެއްގެ ސަބަބުންކަމުގައި މި ކައުންސިލަށް ވަނީ ފާހަގަކުރެވިފަ އެވެ،" ކައުންސިލްގެ ބަޔާނުގައިވެ އެވެ.
ކައުންސިލުން ބުނި ގޮތުގައި އައިޖީއެމްއެޗުން މަގުމައްޗަށް ފެން ދޫކުރަމުން ދަނީ ކައުންސިލަށް އެނގިގެން އަދި ކައުންސިލްގެ ހުއްދައެއް އެކަމަށް އޮވެގެންނެއް ނޫނެވެ.
އަދި އެ މައްސަލަ ހައްލުކުރުމަށްޓަކައި ހޮސްޕިޓަލުން އެމްޑަބްލިއުއެސްސީއާއެކު ވާހަކަދެއްކި ނަމަވެސް އެކަމަށް ހައްލެއް ލިބިފައިނުވާ ކަމަށް އައިޖީއެމްއެޗުން ކައުންސިލަށް މައުލޫމާތު ދިންކަމަށް ސިޓީ ކައުންސިލްގެ ބަޔާނުގައި ވެ އެވެ.
"އެހެންކަމުން އެ ފެންގަނޑު އެތަނުގައި ނުހެދޭނެ ގޮތަށް ހެދުމަށްޓަކައި، މި ކައުންސިލުން އިސްވެ އައިޖީއެމްއެޗާއި ވާހަކަދައްކައި އެ މަސައްކަތް ކުރުމަށް ބޭނުންވާ ތަކެތި އައިޖީއެމްއެޗުން ފޯރުކޮށްދީގެން މި ކައުންސިލުން މަސައްކަތްކުރާ އައިޖީއެމްއެޗުން ވަނީ މި ކައުންސިލަށް ހުށަހަޅައިފަ އެވެ،" ސިޓީ ކައުންސިލްގެ ބަޔާނުގައި ބުނެ އެވެ.
އެ މަސައްކަތާ ގުޅިގެން ސިޓީ ކައުންސިލްގެ މީޑިއާ އޮފިޝަލް ވިދާޅުވީ، އެ މަސައްކަތް ހައްލުކުރުމަށްޓަކައި މާލެ ސިޓީ ކައުންސިލާ އައިޖިއެމްއެޗާ މަޝްވަރާ ކުރަމުންދާ ކަމަށެވެ. އެހެންނަމަވެސް އަދި އެއްވެސް އަމަލީ މަސައްކަތެއް ފަށާފައިނުވާ ކަމަށެވެ.
އައިޖީއެމްއެޗް ކައިރިން ފެންބޮޑުވާ މައްސަލައިގައި، އެ ފެން އުފެދެނީ ކީއްވެގެންކަމެއް މީގެ ކުރިން އާންމުކޮށް ހާމަވެފައި ނުވިނަމަވެސް، އެ ސަރަހައްދަކީ ވިއްްސާރައިގައި މާލެއަށް އުދަ އަރާ ސަރަހައްދެއްކަމުން އެ ފެންގަނޑަކީ އުދައިގެ އަސަރު ކަމަށް އޮންނަނީ ބެލެވިފަ އެވެ. އެ ސަރަހައްދަކީ ވާރޭގެ ސަބަބުން ވެސް މާލޭގައި އެންމެ ބޮޑަށް ފެންބޮޑުވާ އެއް ސަރަހައްދެވެ.
