މުހައްމަދު މުއިއްޒު ކައުންސިލްތައް ކުށްވެރިކުރަނީ ސަރުކާރުގެ ނާގާބިލުކަން ފޮރުވަން ކަމަށް އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މިއަދު ބުނެފި އެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެ ޕާޓީން ކައުންސިލް އިންތިހާބަށް ކަނޑައަޅާފައިވާ ތަރުޖަމާން ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވީ 57 ރަށެއްގެ ކައުންސިލަކުން މަޝްރޫއުތައް ކުރިއަށް ގެންދަން ހުރަސްއަޅާފައިވާ ކަމަށް މުއިއްޒު ފާހަގަކުރައްވާފައިވާތީ އެ ކައުންސިލުތަކުގެ މައުލޫމާތު ހޯދުމަށް އާރްޓީއައި ހުށަހަޅާފައިވާ ކަމަށެވެ.
ނަމަވެސް އޭނާ ވިދާޅުވީ މިއަދާ ހަމައަށް ވެސް ސަރުކާރުން މުއިއްޒު ފާހަގަކުރައްވާ ކައުންސިލްތަކުގެ މައުލޫމާތު ފޯރުކޮށްދީފައި ނުވާ ކަމަށާއި އެކަން ނުވެސް ކުރެވޭނެ ކަމަށް ޗެލެންޖު ކުރައްވާ ކަމަށެވެ.
"އަޅުގަނޑުމެންނަށް ފާހަގަވެގެންދިޔަ އެންމެ ފަހުން ރައީސުލްޖުމްހޫރިއްޔާ ފާހަގަކުރެއްވި ރާއްޖޭގެ 57 ރަށެއްގެ މަޝްރޫއު ކައުންސިލްގެ ހުރަސްއެޅުމާއެކު ހުއްޓާލާފައިވާ ކަމަށް. މި ދެންނެވި ރަށްތަކުގެ މައުލޫމާތު ހޯދުމަށްޓަކައި އަޅުގަނޑުމެންވާނީ އާރްޓީއައި އިން ތަފްސީލް ހޯދުމަށްޓަކައި ހުށަހަޅާފައި. މިއަދާ ހަމައަށް އައިއިރުގައި އަޅުގަނޑުމެންނަށް އެ މައުލޫމާތެއް ނުލިބޭ،" ވަހީދު ވިދާޅުވި އެވެ.
ކައުންސިލްތައް ބަދުނާމުވާ ގޮތަށް މުއިއްޒު ވާހަކަތައް ދައްކަވަނީ ކައުންސިލްތަކަށް ޖެއްސުން ކުރުމުގެ ނިޔަތުގައި ކަމަށް ވަހީދު ވިދާޅުވި އެވެ.
"ސީދާ ކައުންސިލްތަކަށް ފުރައްސާރަ ކުރުމަށްޓަކައި ކައުންސިލްތަކަށް ޖެއްސުން ކުރުމަށްޓަކައި ރައީސުލްޖުމްހޫރިއްޔާ ދައްކާ ވާހަކަ. މި ސަރުކާރުގެ ނާގާބިލުކަން ފޮރުވަންވެގެން ރައީސުލްޖުމްހޫރިއްޔާ ދައްކާ ވާހަކަ. އެހެންވީމަ އަޅުގަނޑު މި ބަލަނީ މި މައުލޫމާތު ސަރުކާރުން ހާމަކުރުން އަވަސް ކުރާނެ ކަމަށް،" އޭނާ ވިދާޅުވި އެވެ.
އޭނާ ވިދާޅުވީ ސަރުކާރުން ދަނީ އިންތިހާބާ ދިމާކޮށް ވަޒީފާ ބަހައި، އިންތިހާބަށް އެކި އެކި ނުފޫޒުތައް ފޯރުވަމުން ކަމަށެވެ. އެގޮތުން އެކަމާ ގުޅޭ ބައެއް ހެކިތައް ވެސް ލިބިފައިވާ ކަމަށް އޭނާ ވިދާޅުވި އެވެ.
ސަރުކާރާ އިދިކޮޅު ފިކުރުގެ ކައުންސިލްތަކުން ތަރައްގީގެ މަޝްރޫއުތަކަށް ހުރަސް އަޅާ ކަމަށް މުއިއްޒު ތުހުމަތު ކުރެއްވި ނަމަވެސް، ކައުންސިލްތައް އެއްފަރާތް ކުރުމަށް ފަހު ސަރުކާރުން ބޭނުންވާ މަޝްރޫއުއެއް ހިންގޭ ގޮތަށް ލާމަރުކަޒީ ގާނޫނު މި ސަރުކާރުން ވަނީ ބަދަލުކޮށްފަ އެވެ.
އެލްޖީއޭ ހިންގަނީ މި ސަރުކާރުން ކައުންސިލްތަކުގެ މައްޗަށް ބާރު ފޯރުވުމަށް އުފެއްދި ކައުންސިލް މިނިސްޓްރީގެ ދަށުންނެވެ. އެލްޖީއޭއިން އަމަލުކުރަނީ މުއިއްޒުގެ ސަރުކާރުން އަންގާ ގޮތަށް ކަމަށްވާއިރު ކައުންސިލްތަކުން ހުއްދަ ނުދީގެން އެއްވެސް މަޝްރޫއުއެއް ހުއްޓިފައި އޮތްނަމަ ކައުންސިލްތައް ބައިޕާސް ކުރުމަށް ފަހު އެ މަޝްރޫއުއެއް ސަރުކާރަށް ހިންގޭނެ އެވެ.
އަންނަ އެޕްރީލް 4، ގައި ލޯކަލް ކައުންސިލް އިންތިހާބު ބާއްވާއިރު، އެ އިންތިހާބާއެކު ރައްޔިތުންގެ މެދުގައި ފެންނަ ނުފެންނަ ވޯޓު (ރިފަރެންޑަމް) އެއް ވެސް ނެގުމަށް ވަނީ ހަމަޖެހިފަ އެވެ. އެ ރިފަރެންޑަމްއަކީ ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމާމެދު އާންމުން ދެކޭ ގޮތެއް ބެލުމަށް ނަގާ ވޯޓެކެވެ.
