ކޮވިޑުގެ ބަނަ ދުވަސްތަކާ ގުޅިގެން މިދިޔަ އަހަރު ވަޅުޖެހުނު ރާއްޖޭގެ ޓޫރިޒަމް ދާއިރާ އަލުން ހިންދެމިލައި ފެށި މަސައްކަތުން މި އަހަރު އެއް މިލިއަން ޓޫރިސްޓުން ރާއްޖޭން މިއަދު ހަމަކޮށްފި އެވެ.
މި އަހަރު ރާއްޖެ އައި އެއް މިލިއަން ވަނަ ފަތުރުވެރިޔަކީ މިއަދު މެންދުރުފަހު އައި ފްރާންސްގެ ފިރިހެނެކެވެ. މިއީ އޭނާ ރާއްޖެ އައި 20 ވަނަ ފަހަރެވެ. އޭނާ އަށް މަރުހަބާ ކިޔަން އެމްއެމްޕީއާރްސީ އާއި ޓޫރިޒަމް މިނިސްޓްރީ ގުޅިގެން އެއާޕޯޓުގައި ވަނީ ސަގާފީ ހަރަކާތްތަކެއް ބާއްވައިފަ އެވެ.
މިހާރު ދުވާލެއްގެ މައްޗަށް ރާއްޖެއަށް އަންނަ ޓޫރިސްޓުންގެ ނިސްބަތަށް ބަލައި، މި އަހަރު ނިމޭއިރު 1.2 މިލިއަން ޓޫރިސްޓުން އަންނާނެ ކަމަށް ބެލެވެ އެވެ.
އަހަރުގެ މިހާތަނަށް މަހެއްގެ ތެރޭގައި އެންމެ ގިނަ ޓޫރިސްޓުން ރާއްޖެ އައިސްފައި ވަނީ އޯގަސްޓު މަހު އެވެ. އެއީ 143,599 ފަތުރުވެރިންނެވެ. އެއީ ދުވާލެއްގެ މައްޗަށް 4,632 ޓޫރިސްޓުންނެވެ.
އަހަރު ފެށިގެން އައި އިރު އެއް މަހަށްވުރެ އަނެއް މަހު ރާއްޖެއަށް ޒިޔާރަތްކުރާ ޓޫރިސްޓުންގެ އަދަދު ދިޔައީ އިތުރުވަމުންނެވެ. ނަމަވެސް، އަހަރުގެ މެދު ތެރޭގައި ރާއްޖެ އަންނަ ޓޫރިސްޓުންގެ އަދަދު މަދުވެގެން ދިޔަ ނަމަވެސް ޖުލައި މަހުން ފެށިގެން ފަތުރުވެރިން އަންނަ އަދަދު ވަނީ އަނެއްކާވެސް އިތުރުވާން ފަށައިފަ އެވެ.
އަހަރުގެ މިހާތަނަށް ރާއްޖެއަށް އައި ޓޫރިސްޓުންގެ ތެރޭގައި އެންމެ ގިނައީ އިންޑިއާގެ ޓޫރިސްޓުންނެވެ.
މިދިޔަ އަހަރުގެ ކުރީކޮޅު ކޮވިޑުގެ ފުރަތަމަ ރާޅު އައުމާ އެކު އޭޕްރިލް މަހު ރާއްޖެ އަށް ޓޫރިސްޓުން ގެނައުން ހުއްޓާލި އެވެ. ޖުލައި މަހު އަލުން ޓޫރިޒަމް ފަށައިގެން މަޑުމަޑުން ރަނގަޅުވެ އަހަރު ނިމުނުއިރު ހުރީ ރަނގަޅު ރޭޓޭއްގަ އެވެ.
ދުނިޔޭގެ އެންމެ ބޮޑު އަދި އެންމެ އިތުބާރު ހިފޭ އެއް ކްރެޑިޓް ރޭޑިން އޭޖެންސީ ކަމަށްވާ އެމެރިކާގެ ފިޗުން ފާހަގަކުރާ ގޮތުގައި ކޮވިޑް ސަބަބުން ރާއްޖޭގެ ޓޫރިޒަމް ސިނާއަތަށް އައި ލޮޅުމުން އަރައިގަނެވި ބަލިމަޑުކަމުގެ ކުރިން އޮތް މިންވަރުން 70 އިންސައްތައާ ގާތްކުރާ އަދަދަށް މިހާރު ސިނާއަތް އާރާސްތުވެފައިވެ އެވެ.
އަންނަ އަހަރު ރާއްޖެ އަންނަ ޓޫރިސްޓުންގެ އަދަދި ބަލިމަޑުކަމުގެ ކުރިން ހުރި މިންވަރުން 80 އިންސައްތަ ރިކަވާ ވާނެ ކަމަށް ފިޗުން ލަފާކުރާ އިރު 2023 ވަނަ އަހަރު ރާއްޖެ އަންނަ ޓޫރިސްޓުންގެ އަދަދު 100 އިންސައްތަ ރިކަވާ ވާނެ ކަމަށް ވަނީ ލަފާކޮށްފަ އެވެ.
