ގައުމީ ބާސްކެޓްބޯޅަ ޓީމުގެ ތަރި ރިޝްފާން ރަޝީދު (ކޮކީ)ގެ ކަކުލަށް ސީރިއަސް އަނިޔާއެއް ކުރިމަތިވެ، އޭނާ އަށް ސައުތު އޭޝިއަން ބާސްކެޓްބޯލް އެސޯސިއޭޝަން ޗެމްޕިއަންޝިޕް (ސާބާ) ބާސްކެޓްބޯޅަ މުބާރާތް ގެއްލިއްޖެ އެވެ.
ކޮކީ ކަކުލަށް އަނިޔާވީ ދުބާއީގައި ގައުމީ ބާސްކެޓް ޓީމުން ކުރި ކޭމްޕްގެ ތެރެއިން އެޓީމުން ކުޅުނު ފުރަތަމަ މެޗުގަ އެވެ. އެގޮތުން ފުރަތަމަ މެޗުގައި ގައުމީ ބާސްކެޓް ޓީމުން ވާދަކުރީ ދުބާއީގައި ދިރިއުޅޭ ސީރިއާ ކުޅުންތެރިންނާ އެކު އެކުލަވާލާފައިވާ ޓީމަކާ އެވެ. މެޗުގެ ދެ ވަނަ ކުއާޓާރުގެ ކުޅުން ކުރިއަށް ދަނިކޮށް ކޮކީގެ ކަކުލުގެ ލިގަމަންޓަށް ވަނީ އަނިޔާވެފަ އެވެ.
ކަކުލުގެ މި ފަދަ ސީރިއަސް އަނިޔާތަކުގައި އާންމުކޮށް އޮޕަރޭޝަން ކުރުމަށް ފަހު ކުުޅުމަށް އެނބުރި އާދެވޭނީ އެންމެ އަވަސް ވެގެން ވެސް ހަ މަސް ދުވަސް ފަހުންނެވެ. މާނަ އަކީ ސާބާ ޗެމްޕިއަންޝިޕްގެ އިތުރުން ބާސްކެޓްގެ ކުރިއަށް އޮތް ސީޒަނުގައި ވެސް ކޮކީ އަށް ކުޅެވޭނީ މަސްތަކެއް ފަހުންނެވެ. ކޮކީ ކުޅެމުން އަންނަނީ ކިންގްސް އަށެވެ.
ކިންގްސްގެ މެޗެއްގެ ތެރެއިން ކޮކީ ބޯޅަ ހިފައިގެން.-- ފޮޓޯ: އަބްދުﷲ އަބީދު
މި ފަހަރުގެ ސާބާގައި ވާދަކުރާ ގައުމީ ސްކޮޑުގައި ހިމެނުނު ހުނަރުވެރި ކުޅުންތެރިޔާ އިބްރާހިމް ރަޝްވާން (ޗިކު) ވެސް ވަނީ ދާދި ފަހުން ކަކުލަށް ލިބުނު ސީރިއަސް އަނިޔާ އަކަށް ފަރުވާ ހޯދައިފަ އެވެ. އެ ގޮތުން 2018 ވަނަ އަހަރު ލިބުނު އަނިޔާއިން އެއްކޮށް ރިކަވާވެގެން އެނބުރި އައިސް ޗިކު ގައުމީ ޓީމަށް ކުޅެދޭ ފުރަަތަމަ މުބާރާތަކަށް ވާނީ މި ފަހަރުގެ ސާބާ ޗެމްޕިއަންޝިޕް އެވެ.
ގައުމީ ބާސްކެޓް ޓީމުން މިހާރު ތައްޔާރު ވަމުންދަނީ އަންނަ މަހުގައި ބާއްވާ ސާބާ މުބާރާތަަށެވެ. ދުބާއީގައި ކުރިއަށްދިޔަ ޓްރެއިނިން ކޭމްޕް ނިންމާލުމަށް ފަހު ދެން ބާސްކެޓް ޓީމު ތައްޔާރީތައް މާލޭގައި ކުރިއަށް ގެންދާނީ އަންނަ މަހު ފަށާ ސާބާ މުބާރާތާ ހަމައަށެވެ.
ސާބާ މުބާރާތަށް ގައުމީ ޓީމުގެ ކޯޗިން ސްޓާފުން ހަމަޖެއްސިއިރު، ގައުމީ ބާސްކެޓްބޯޅަ ޓީމުގެ ހެޑް ކޯޗުގެ ޒިންމާ ހަވާލުކުރީ ކުރިން ގައުމީ ޓީމަށް ކުޅުނު އަދި ބާސްކެޓްގައި ވިދަމުން އަންނަ ކޯޗު އިލްޔާސް އިބްރާހިމް (އިއްލެ)އާ އެވެ. އިއްލެގެ އެސިސްޓަންޓް ކޯޗުންނަށް ހަމަޖެއްސި ބައެއް ކޯޗުންނަކީ އޭނާއާ އެކު ގައުމީ ޓީމަށް ކުޅުނު ކުޅުންތެރިންނެވެ. އޭގެ ތެރޭގައި 2019 ވަނަ އަހަރު ގައުމީ ޓީމަށް ކުޅުން ހުއްޓާލި މުހައްމަދު ޒިލާލް (ޒިލާ) އާއި އަލީ ފަޒްލީ ހިމެނެ އެވެ. އަދި އޭގެ އިތުރުން މި ފަހަރު އެސިސްޓަންޓް ކޯޗަކަށް މުހައްމަދު ނަސީރު (މޮއްޑެ) ވެސް ވަނީ ހިމަނައިފަ އެވެ.
