ސިޔާސީ އެއްވެސް މަޝްވަރާއެއްގައި ބައިވެރިވާނީ ކުރީގެ ރައީސް އަބްދުﷲ ޔާމީން މިނިވަންކުރުމުން ކަމަށް އިދިކޮޅަށް ނިސްބަތްވާ ރައްޔިތުންގެ މަޖިލިސް މެމްބަރުން، މަޖިލީހުގެ ރައީސް މުހައްމަދު ނަޝީދަށް ދަންނަވައިފި އެވެ.
މިއަދު މަޖިލީހުގައި ހިމެނޭ އިދިކޮޅަށް ނިސްބަތްވާ މެމްބަރުންނާ އެކު ރައީސް ނަޝީދު ބޭއްވި ބައްދަލުވުމަށްފަހު، މަޑުއްވަރީ ދާއިރާގެ މެމްބަރު އަދި އިދިކޮޅު ޕީއެންސީގެ ނައިބު ރައީސް އާދަމް ޝަރީފް އުމަރު ކުރެއްވި ޓްވީޓެއްގައި ވިދާޅުވީ، ރައީސް ޔާމީނާއި ނުލާ އެއްވެސް މަޝްވަރާގެ ބައްދަލުވުމަކަށް އިދިކޮޅުން ނުދާނެ ވާހަކަ ރައީސް ނަޝީދަށް އިދިކޮޅުން ދެންނެވި ކަމަށެވެ.
"މިއަދު މަޖިލީހުގައި ރައީސް ނަޝީދާއި މީޓް ކުރެއްވުމުން، ސިޔާސީ އެއްވެސް މަޝްވަރާއެއް ކުރަން މީޓް ކުރާނީ އޮޕޮޒިޝަން ލީޑަރު އަދި 2023 ގައި އިދިކޮޅު ކެންޑިޑޭޓް ރައީސް ޔާމީން މިނިވަންވުމުން ކަމަށާއި ރައީސް ޔާމީނާ ނުލާ އެއްވެސް މަޝްވަރާއަކަށް ނުވަތަ މީޓިން އަކަށް ނުދާނެ ވާހަކަ ދެންނެވިން،" މެމްބަރު އާދަމް ޝަރީފް ކުރެއްވި ޓްވީޓުގައިވެ އެވެ.
ރައީސް ނަޝީދު މިއަދު އިދިކޮޅު މެމްބަރުންނާ ބައްދަލުކުރެއްވީ ކޮން ސަބަބަކާ ހުރެ ކަމެއް އަދި ސާފެއް ނުވެ އެވެ.
އެ ބައްދަލުވުމުގައި އިދިކޮޅުގެ ފަރާތުން ބައިވެރިވެވަޑައިގަތީ މެމްބަރު ޝަރީފުގެ އިތުރުން ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަހުމަދު ޝިޔާމް، ގުރައިދޫ ދާއިރާގެ މެމްބަރު އަދި ޕީޕީއެމްގެ ނައިބު ރައީސް ގައްސާން މައުމޫން އެވެ.
މީގެ ކުރިން ވެސް ނިޒާމު ބަދަލުކުރުމުގެ މަޝްވަރާތަކާ ގުޅިގެން އިދިކޮޅުން ވަނީ ރައީސް ޔާމީން މިނިވަން ނުކުރަނީސް މަޝްވަރާ ނުކުރާނެކަމަށް ބުނެފަ އެވެ.
އެމްއެމްޕީއާރުސީ މައްސަލައިގައި މަނީ ލޯންޑަރިން ދައުވާ ސާބިތުވެ، ރައީސް ޔާމީން މިވަގުތު ދަނީ ފަސް އަހަރު ދުވަހުގެ ޖަލު ހުކުމެއް ތަންފީޒު ކުރައްވަމުންނެވެ. އެހެން ނަމަވެސް ޖަލުތަކުގައި ކޮވިޑުގެ ހާލަތު ގޯސްވުމުން ގުޅިގެން އެމަނިކުފާނު ވަނީ މިދިޔަ އޭޕްރިލް މަސްތެރޭ ގޭބަންދަށް ބަދަލުކޮށްފަ އެވެ.
