މިހާރު ރާއްޖެއަށް ފަތުރުވެރިން އަންނަމުންދާ އަދަދަށް ބަލާއިރު މި ހިނގާ އޮކްޓޫބަރު މަހުގެ ނިޔަލަށް އެއް މިލިއަން ފަތުރުވެރިން ރާއްޖެ އަންނާނެ ކަމަށް މިހާތަނަށް ހުރި ތަފާސް ހިސާބުތަކުން ދައްކަ އެވެ.
މިއަހަރު ރާއްޖެއަށް ގެނައުމަށް ސަރުކާރުން އަމާޒުހިފާފައި ވަނީ 1.1 މިލިއަން ފަތުރުވެރިންނެވެ.
އަހަރުގެ ފުރަތަމަ ތިން މަހު ރާއްޖެ އަންނަމުން ދިޔަ ފަތުރުވެރިންގެ އަދަދު ދިޔައީ އެއް މަހަށް ވުރެ އަނެއް މަހު އިތުރުވަމުންނެވެ. ޖެނުއަރީ މަހު 92,103 ފަތުރުވެރިން ރާއްޖެ އައި އިރު، ފެބްރުއަރީ މަހު އައި ފަތުރުވެރިންގެ އަދަދު 96,882 އަށް އިތުރުވި އެވެ.
ރާއްޖެ އައި ފަތުރުވެރިންތަކެއް ވެލާނާ އިންޓަނޭޝަނަލް އެއާޕޯޓުގައި. -- ފޮޓޯ:ހުސައިން ޝަޔާހް
މި އަހަރުގެ ތިން ވަނަ މަސް ވެގެންގޮސްފައި ވަނީ ކޮވިޑް-19 ގެ ސަބަބުން ފަތުރުވެރިކަން މަޑުޖެހިފައު އޮތުމަށްފަހު ރާއްޖެ އައި ފަތުރުވެރިންގެ އަދަދު އެއް ލައްކަ އަށް އެރި މަހަކަށެވެ. އެމަހު 109,585 ފަތުރުވެރިން ރާއްޖެ އައެވެ.
ދެ ވަނަ ކުއާޓާގައި ރާއްޖެއަށް އަންނަމުންދިޔަ ފަތުރުވެރިންގެ އަދަދު ދަށަށްދާން ފެށި އެވެ. އޭޕްރިލް މަހު ރާއްޖެ އައީ 91,200 ފަތުރުވެރިންނެވެ. މެއި މަހު ރާއްޖެ އައި ފަތުރުވެރިންގެ އަދަދު 64,613 އަށް ދަށަށް ދިޔައިރު، ޖޫން މަހު ރާއްޖެ އައީ 56,166 ފަތުރުވެރިންނެވެ.
ނަމަވެސް ތިން ވަނަ ކުއާޓާ ފެށުނު ފަހުން ކޮންމެ މަހަކުވެސް އެއް ލައްކައަށް ވުރެ ގިނަ ފަތުރުވެރިން ވަނީ ރާއްޖެ އައިސްފަ އެވެ.
ޖުލައި މަހު 101,818 ފަތުރުވެރިން ރާއްޖެ އައި އިރު، އޮގަސްޓް މަހު އައި ފަތުރުވެރިންގެ އަދަދު ވަނީ 143,599 އަށް އިތުރުވެފަ އެވެ. މިއީ ކޮވިޑް-19ގެ ކުރިން 2019 ވަނަ އަހަރުގެ އޮގަސްޓަމަހު ރާއްޖެ އައި 139,338 ފަތުރުވެރިންނަށް ވުރެ 4،261 އިތުރު އަދަދެކެވެ.
ސެޕްޓެމްބަރު މަހު 114,896 ފަތުރުވެރިން ރާއްޖެ އައިސްފައިވާ އިރު، އޮކްޓޫބަރު މަހުގެ ފުރަތަމަ 23 ދުވަހުވެސް 102،434 ފަތުރުވެރިން މިވަނީ ރާއްޖެ އައިސްފަ އެވެ.
މި އަދަދުތަކާ އެކު އޮކްޓޫބަރު 23 ގެ ނިޔަލަށް ރާއްޖެއަށް ޖުމުލަ 973,296 ފަތުރުވެރިން ވަނީ އައިސްފަ އެވެ. އެއް މިލިއަން ފަތުރުވެރިން ހަމަކުރަން އިތުރަށް ބޭނުންވަނީ 26,704 ފަތުރުވެރިންނެވެ.
މިހާރު ރާއްޖެއަށް ދުވާލެއްގެ މައްޗަށް އެވްރެޖުކޮށް އަންނަނީ 4,454 ފަތުރުވެރިން ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ. މިއަދަދަށް ކޮންމެ ދުވަހަކުވެސް ފަތުރުވެރިން އަންނަ ކަމަށް ވާނަމަ ހަ ދުވަހުގެ ތެރޭގައި 26,724 ފަތުރުވެރިން އަންނާނެ އެވެ.
ކުރިއަށް އޮތް ހަ ދުވަހުގެ ތެރޭގައި 26,724 ފަތުރުވެރިން ރާއްޖެ އައިސްފި ނަމަ މި މަސް ނިމުމުގެ ކުރިން 1,000,020 ފަތުރުވެރިން ރާއްޖެ އަށް އަންނާނެ އެވެ.
