ޒުވާނުންގެ ދުވަހުގެ ހަރަކާތްތަކުގައި ބައިވެރިވަޑައިގަތުމަށް ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ކުޅުދުއްފުށި ސިޓީއަށް ވަޑައިގަތުމަށް ހަމަޖެހިއްޖެ އެވެ.
އެއަށް ފަހު ޔޫއޭއީގައި މިހާރު ކުރިއަށްދާ "އެކްސްޕޯ 2020" ގައި ބައިވެރިވެވަޑައިގަތުމަށް މާދަމާ ދުބާއީ އަށް ފުރާވަޑައިގަންނަވާނެ އެވެ.
ރައީސްގެ ދަތުރުގެ އިތުރު ތަފްސީލެއް ރައީސް އޮފީހުން ހާމައެއް ނުކުރެ އެވެ.
އެނގިފައިވާ ގޮތުގައި ކުޅުދުއްފުށީގައި އަލަށް އެޅި ޓާފް ދަނޑު ހުޅުވުމުގެ ރަސްމިއްޔާތުގައި މިއަދު ހަވީރު ރައީސް ބައިވެރިވެވަޑައިގަންނަވާނެ އެވެ. އަދި އެކަމުގެ މުނާސަބަތުގައި ގައުމީ ފުޓްބޯޅަ ޓީމާއި ކުޅުދުއްފުށީ ޓީމަކާ ކުޅޭ އެކުވެރިކަމުގެ މެޗު ވެސް ރައީސް ބައްލަވާލައްވާނެ އެވެ.
މީގެ އިތުރުން ކުޅުދުއްފުށީގައި މިރޭ ބާއްވާ ޒުވާނުންގެ ދުވަހުގެ ރަސްމީ ޖަލްސާގައި ރައީސް ބައިވެރިވެވަޑައިގަންނަވާނެ އެވެ. މި ޖަލްސާގައި ޒުވާނުންގެ ގައުމީ އިނާމް ދޭނެ އެވެ.
ރައީސް މާދަމާ ދުބާއީ އަށް ވަޑައިގެން ބައިވެރިވެވަޑައިގަންނަވާ "އެކްސްޕޯ 2020" އަކީ ދުނިޔޭގައި ބާއްވާ އެންމެ ބޮޑު އެއް އެކްސްޕޯޝާ އިވެންޓެވެ. މި ހަރަކާތުގައި ދުނިޔޭގެ 191 ގައުމަކުން ބައިވެރިވެ އެވެ.
އިކޮނޮމިކް މިނިސްޓްރީން ވަނީ މި އެކްސްޕޯގައި ރާއްޖެ އިސްތިހާރުކުރުމަށް ހާއްސަ ޕެވީލިއަންއެއް ބަހައްޓައިގަ އެވެ. މިތަނުން ރާއްޖޭގެ ރީތި ގުދުރަތީ މަންޒަރުތަކުގެ ދައްކުވައިދޭނެ އެވެ. އަދި ރާއްޖެ މިއަދާއި ހަމަޔަށް ކޮށްފައިވާ ތަރައްގީގެ ދަތުރުގައި އަބަދުވެސް ބޭނުންކޮށްފައިވާ ދެމެހެއްޓެނިވި ތަރައްގީގެ ވިސްނުމާއި ސިޔާސަތުތަކާއި، ރާއްޖޭގެ ތާރީހާއި ސަގާފަތް، މުޅި ދުނިޔެއަށް ދައްކާލެވިގެންދާނެ ކަމަށް އެ މިނިސްޓްރީން ބުނެ އެވެ.
