އެމްޑީޕީގެ އެތެރޭގެ ހިންގުން ހަރުދަނާކޮށް، ކުރިއަށް އޮތް ރިޔާސީ އިންތިހާބު ކާމިޔާބު ކުރެވޭނީ ޕާޓީގެ އެތެރޭގައި ހުރިހާ ސިޔާސީ ލީޑަރުންނަށް ހަމަހަމަ ފުރުސަތުތަކެއް ދީގެން ކަމަށާއި، އެ ޔަގީންކަން އޮތް ހަމައެކަނި ކެންޑިޑޭޓަކީ މީކާއީލް ނަސީމް ކަމަށް ކުރީގެ ރައީސް އިބްރާހީމް މުޙައްމަދު ސޯލިހު ރޭ ވިދާޅުވެއްޖެ އެވެ.
އެމްޑީޕީގެ ޗެއާޕާސަންގެ އިންތިހާބުގައި ވާދަކުރައްވާ މީކާއީލް ނަސީމަށް ތާއިދު ހޯދަން ގދ. ތިނަދޫގައި ބޭއްވި ޖަލްސާގައި ސޯލިހު ވިދާޅުވީ އިންތިހާބެއް ކާމިޔާބުކުރުމަށް އެންމެ މުހިންމު ކަމަކީ އެމްޑީޕީ އެކަތިގަނޑެއްގެ ގޮތުގައި ތިބުން ކަމަށާއި އެކަން މިވަގުތު ޕާޓީ ހިންގުމާ ހަވާލުވެ ހުންނެވި އަބްދުލް ޣަފޫރު މޫސާ އެކަން ދައްކާފައިވާ ކަމަށެވެ.
"އެންމެން ގޮވައިގެން ކުރި މަސައްކަތުން ކޮންމެ އިންތިހާބެއް ކާމިޔާބުވަމުންދިޔައީ. މިއީ ޗެއާޕާސަންގެ އެންމެ މުހިއްމު ޒިންމާ،" ސޯލިހު ވިދާޅުވި އެވެ.
ވޭތުވެދިޔަ އިންތިހާބުތަކަށްވުރެ 2028 ގެ ރިޔާސީ އިންތިހާބު މުހިއްމު ކަމަށާއި 2023 ގެ އިންތިހާބު އެމްޑީޕީއަށް ގެންލިގެންދިޔަ ސަބަބުތަކަށް ވިސްނާއިރު އެފަދަ ފުރުސަތެއް ނުދެއްވުމަށް އަދި އެފަދަ ގޮތަކަށް އަމަލު ނުކުރެއްވުމަށް ސޯލިހު އެދިވަޑައިގެންނެވި އެވެ.
އެންމެ ފަހުގެ ރިޔާސީ އިންތިހާބު ގެއްލިގެން ދިޔުމުން ބިކަވެގެން ދިޔައީ ހަމައެކަނި އެމްޑީޕީ އާއި އެމްޑީޕީގެ މެންބަރުން ނޫން ކަމަށާއި އެކަމުގެ ސަބަބުން "ހިތަށް ވެސް ނާރާވަރުގެ ދަތި އުނދަގޫތައް ރާއްޖެއަށް މިވަނީ ކުރިމަތިވެފައި" ކަމަށް ސޯލިހު ވިދާޅުވި އެވެ.
ކުރިއަށް އޮތް ރިޔާސީ އިންތިހާބުގައި ވާދަކުރައްވަން ބޭނުންވާ ގިނަ ބަޔަކު އެމްޑީޕީގައި ތިބިއިރު، މީކާއީލް ހުންނެވީ އެ އެންމެންނަށް ހަމަހަމަ ފުރުސަތެއް ދޭނެ ކަމުގެ ސިޔާސަތަކާއެކު ކަމަށް ސޯލިހު ވިދާޅުވި އެވެ.
"އެއީ މި ޕާޓީ ގެންދާންވީ މިސްރާބު. އަނެއްކާ އަނެއް ފަސް އަހަރު މަގުމަތީގައި ނުބޭތިއްބޭނެ. ތިބޭފުޅުންގެ ނިންމުމަކަށް ވާނީ މި ޕާޓީއަށް، ރައްޔިތުންނަށް އެންމެ ފައިދާ ހުރި ގޮތް،" ސޯލިހު ވިދާޅުވި އެވެ.
"އެގޮތަކީ އެމްޑީޕީގެ ޗެއާޕާސަންކަމަށް ވަކި ފަރާތަކަށް ނުޖެހި އެންމެންނަށް ހަމަހަމަ ފުރުސަތުދީ މި ޕާޓީ މިރާއްޖޭގެ ހިންގޭނެ ގޮތަކަށާއި ސިޔާސީ ލީޑަރުންނަށް ހަމަހަމަ ފުރުސަތު ދޭނެ ބޭފުޅަކު ޗެއާޕާސަން ކަމަށް މިވަގުތު އިންތިހާބުކޮށްގެން."
2018 ވަނަ އަހަރު އުފެދުނު ސަރުކާރަކީ އެމްޑީޕީގެ ސަރުކާރެއް ނޫން ކަމަށް ބުނެ ދެކެވޭ ވާހަކަތަކަށް ވެސް ސޯލިހު ރޭ ރައްދު ދެއްވި އެވެ. އެމަނިކުފާނު ވިދާޅުވީ އެ ސަރުކާރަކީ އެމްޑީޕީގެ ރައީސް މުހައްމަދު ނަޝީދާއި، ޖުމްހޫރީ ޕާޓީގެ ލީޑަރު ގާސިމް އިބްރާހިމް، އަދި އަދާލަތު ޕާޓީގެ ރައީސް ޝައިޚް އިމްރާން އަދި ރައީސް މައުމޫން ސޮއިކުރެއްވި އެއްބަސްވުމެއްގެ ދަށުން އުފެދުނު ސަރުކާރެއް ކަމަށެވެ.
"އެ އެގްރީމެންޓު ލިޔަމުން ދިޔައިރު ގާސިމް ވިދާޅުވި މިތިއްބެވި ހުރިހާ ލީޑަރުން ސޮއިކުރެއްވިޔަސް އިތުބާރު ކުރެއްވޭނީ އިބޫ ސޮއި ކުރައްވައިގެންނޭ. އެހެންވީމަ ކެންޑިޑޭޓެއްގެ ހައިސިއްޔަތުން އަޅުގަނޑު ސޮއިކުރިން. އަދި އަޅުގަނޑު ވެރިކަން ކުރީ އެ އެގްރީމެންޓާ އެއްގޮތަށް،" ސޯލިހު ވިދާޅުވިއެވެ.
އެމަނިކުފާނު އިތުރަށް ވިދާޅުވީ، މަޖިލިސް އިންތިހާބުގައި އެއްބަސްވުމަށް އަމަލުނުކޮށް ހުރިހާ ދާއިރާއަކަށް ކުރިމަތިލާން ޕާޓީގެ ގައުމީ މަޖިލީހުން ފާސްކުރުމުން ވެސް، ޕާޓީގެ ނިންމުމަށް އިހުތިރާމްކޮށް 2019 ގެ މަޖިލިސް އިންތިހާބު ކާމިޔާބު ކޮށްދިނުމަށް ބޮޑު ދައުރެއް އަދާކުރެއްވި ކަމަށެވެ.
ސޯލިހު ވިދާޅުވީ، ކުރިއަށް އޮތް ތަނުގައި ޕާޓީގެ ފަރާތުން ހޮވަންވާނީ އިތުބާރު ހިފޭ، ވަކި ފަރާތަކަށް ނުޖެހި އެންމެންނަށް ހަމަހަމަ ފުރުސަތުދޭނެ ބޭފުޅެއް ކަމަށާއި އެ ބޭފުޅަކީ މީކާއީލް ނަސީމް ކަމަށެވެ.
އެމްޑީޕީ އަނެއްކާވެސް އިތުރު ފަސް އަހަރު މަގުމަތީގައި ބާއްވަން ބޭނުންނުވާ ނަމަ، ޕާޓީއަށާއި ގައުމުގެ ސުލުހަވެރިކަމަށްޓަކައި ހުރިހާ މެންބަރުންވެސް މީކާއީލް ނަސީމަށް ވޯޓު ދެއްވުމަށް ސޯލިހު އެދިވަޑައިގަތެވެ.
ޖޫން 12 ވަނަ ދުވަހު ބާއްވާ އެމްޑީޕީގެ ޗެއާޕާސަންގެ އިންތިހާބުގައި މީކާއީލްއަ ވާދަ ކުރައްވަނީ ކުރިން އެމްޑީޕީގެ ޗެއާޕާސަން ކަމާއި ޕާޓީގެ ރައީސް ކަމާއި ރައީސުލްޖުމްހޫރިއްޔާގެ މަގާމުގެ އިތުރުން ރައްޔިތުންގެ މަޖިލީހުގެ ރައީސްކަން ކުރެއްވި މުހައްމަދު ނަޝީދެވެ.
ކުރިއަށް އޮތް ރިޔާސީ އިންތިހާބުގައި ވާދަ ނުކުރައްވާނެ ކަމަށް ނަޝީދު ވިދާޅުވެފައި ވާއިރު، އޭނާގެ ތާއިދު އޮތީ ކުރީގެ ޗެއާޕަސަން ފައްޔާޒު އިސްމާއީލްއަށް ކަމަށް ވިދާޅުވެ، އެ ދެބޭފުޅުން އެކުގައި "ބޮޑު ބަދަލު"ގެ ނަމުގައި ވަނީ ކެމްޕޭން ފަށްޓަވައިފަ އެވެ.
