މާލޭގައި އުމުރުން 19 އަހަރުގެ އަންހެނަކަށް އަނިޔާކުރި މައްސަލައެއް ފުލުހުން ބަލަން ފަށައިފި އެވެ.
ފުލުހުން ބުނީ، ރޭ މެންދަމު 1:30 ހާއިރު ފުލުހުންނަށް ރިޕޯޓުކުރެވުނު މި މައްސަލައިގައި 19 އަހަރުގެ ފިރިހެނަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އަދި އޭނާގެ ބަންދާމެދު ގޮތެއް ނިންމަން ކޯޓަށް ހާޒިރުނުކުރާ ކަމަށް މައުލޫމާތު ލިބެ އެވެ.
އަންހެނަކަށް އަނިޔާކުރި މައްސަލައެއް ބަލަމުން އަންނަ ކަމަށް ފުލުހުން މި ބުނީ، އިއްޔެ ރޭ ހުޅުމާލެއިން އަންހެން ކުއްޖަކު ރަހީނުކޮށްގެން ދިޔަ މައްސަލައެއް ފެންމަތިވެގެން އުޅެނިކޮށެވެ.
އެކަމަކު ފުލުހުން ބުނީ މިހާރު ބަލަމުންދާ މައްސަލައިގައި ރަހީނުކުރި ކަމުގެ މައުލޫމާތު ލިބިފައި ނުވާ ކަމަށެވެ.
ނަމަވެސް ސޯޝަލް މީޑިއާގައި މި މައްސަލައިގައި ކަންބޮޑުވުން ފާޅުކުރި މީހުން ބުނީ އެ އަންހެން ކުއްޖާ ފެނުނީ މި އަނިޔާކުރި ފިރިހެން މީހާގެ ގެއިން ކަމަށެވެ. އަދި އެތަނުން އޭނާ ހައްޔަރުކުރީ ވެސް އެތަނުގައި ތިބި މީހުން ކަންބޮޑުވުން ފާޅުކުރުމުން ކަމަށް ވެސް ތުހުމަތުކުރެ އެވެ.
