މިރޭ ދަންވަރު 12:00 އިން ފެށިގެން ވަޒީފާއިން ވަކިވާނެ ކަމަށް އަންގާ ނޯޓިސް ދީފައިވާ ފުލުހުންގެ އިސް ތިން އޮފިސަރެއް، ވަޒީފާއިން ވަކިކުރުން މަޑުޖައްސައިލުމަށް ހައިކޯޓުން އަމުރުކޮށްފި އެވެ.
ފުލުހުންގެ ވަޒީފާއިން ވަކި ކުރަން ނިންމާފައި ވަނީ ގޯސްކޮށް ކަމަށް ބުނެ ކޯޓަށް މައްސަލަ ހުށަހެޅީ ފުލުހުންގެ ހިދުމަތުގެ ގާނޫނުގެ ދަށުން ޕޮލިސް ބޯޑުން އެމީހުންގެ މައްސަލަ ބަލައި ވަކި ކުރަން ނިންމި ހަތް އޮފިސަރުންގެ ތެރެއިން ފަސް މީހެކެވެ.
ސިވިލް ކޯޓަށް މައްސަލަ ހުށަހަޅާފައި ވަނިކޮށް މި މައްސަލައިގައި ހިމެނޭ އެސިސްޓެންޓް ކޮމިޝަނާ އަހްމަދު މުހައްމަދާއި، އެސިސްޓެންޓް ކޮމިޝަނާ މުހައްމަދު ޖަމްޝީދު މަގާމުން ވަކިކޮށްފައިވާއިރު، މާދަމާއިން ފެށިގެން ވަކިކުރަން ނިންމާފައި ވަނީ ޗީފް ސުޕްރިންޓެންޑެންޓް އަބްދުﷲ ޝަރީފާއި، ސުޕްރިންޓެންޑެންޓް އިސްމާއިލް ޝަމީމްގެ އިތުރުން ސުޕްރިންޓެންޑެންޓް މުހައްމަދު ދާއޫދު އެވެ.
މިހާރު މި މައްސަލައިގެ އަޑުއެހުންތައް ސިވިލް ކޯޓުގައި ކުރިއަށް ދާއިރު، އޮފިސަރުންގެ ފަރާތުން މި މައްސަލައިގައި ވަކާލާތު ކުރައްވަނީ ކުރީގެ ޑެޕިއުޓީ ޕްރޮސެކިއުޓާ ޖެނެރަލް މަރިޔަމް ނިހާޔަތު އެވެ.
ސިވިލް ކޯޓުގައި ކުރިއަށްދާ މައްސަލާގައި ގޮތެއް ނިމެންދެން އެ އޮފިސަރުން ވަޒީފާއިން ވަކިކުރުން ފަސްކޮށްދިނުމުގެ ވަގުތީ އަމުރަކަށް އެދުނު ނަމަވެސް އެ އަމުރު ނެރެދެވެން ނެތް ކަމަށް އެ ކޯޓުން ނިންމި އެވެ.
މި ނިންމުން ހައިކޯޓުގައި އިސްތިއުނާފް ކުރުމާ އެކު މިއަދު ވަނީ އިސްތިއުނާފީ އަޑުއެހުންތައް ފަށައިފަ އެވެ.
އޮފިސަރުން ވަކިކުރުމުގެ ވަގުތީ އަމުރެއް ނެރެދީފި ނަމަ ދައުލަތުގެ މަސްލަހަތު ގެއްލޭނެ ކަމަށް ދައުލަތުން މިއަދުގެ އަޑުއެހުމުގައި ބުނެފައި ވަނިކޮށް އޮފިސަރުންގެ ވަޒީފާ ދެމެހެއްޓުމަށް ހައިކޯޓުން އަމުރުކޮށްފައި ވަނީ އެ މައްސަލާގައި ގޮތެއް ނިމެންދެންނެވެ.
ދިފާއީ ވަކީލް ނިހާޔަތު "އަދަދު"އަށް ވިދާޅުވި ގޮތުގައި މި އަމުރު ނެރުއްވީ ހައިކޯޓުން އެ މައްސަލާގައި ގޮތެއް ނިންމުމާ ހަމައަށެވެ.
ފުލުހުންގެ ސީނިއާ އޮފިސަރުންތަކެއް ވަކި ކުރުމަށް ނިންމީ ކޮރަޕްޝަނާއި ލާއިންސާނީ އަނިޔާ ފަދަ ޖަރީމާތަކުގެ ތުހުމަތު ކުރެވޭ އޮފިސަރުންގެ މައްސަލަތައް ބަލައި، ވަކި މުއްދަތެއްގެ ތެރޭގައި އެ މައްސަލަތަކާމެދު ގޮތެއް ނިންމަންޖެހޭނެ ކަމަށް އަލަށް ތައާރަފްކޮށްފައިވާ ފުލުހުންގެ ހިދުމަތުގެ ގާނޫނުން ލާޒިމުކޮށްފައި އޮތުމުންނެވެ.
އޮފިސަރުންގެ މައްޗަށް ކުރެވޭ ތުހުމަތު
އެސިސްޓެންޓް ޕޮލިސް ކޮމިޝަނަރު މުހައްމަދު ޖަމްޝީދު އާއި އެސިސްޓެންޓް ކޮމިޝަނާ އަހުމަދު މުހައްމަދު (ޓޫފޯ) މަގާމުން ވަކިކުރީ، ފުލުހުންގެ ލޯންޗުފަހަރު ރާއްޖޭން ބޭރުން މަރާމާތުކުރުމުގައި މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ތުހުމަތުކުރެވި އެ މައްސަލަ އެންޓި ކޮރަޕްޝަން ކޮމިޝަނުން ބަލަމުންދާތީ އެވެ.
ސުޕްރިންޓެންޑެންޓް އިސްމާއިލް ޝަމީމް މަގާމުން ވަކިކުރަނީ އެމްއެމްޕީއާރުސީގެ ހިޔާނާތުގެ ފައިސާ ލިބިފައިވާ ކަމަށް ތުހަމަތުކުރެވި އެ މައްސަލަ ނެޝަނަލް އިންޓެގްރިޓީ ކޮމިޝަނާއި އެސެޓް ރިކަވަރީ ކޮމިޝަނުން ތަހުގީގުކުރާތީ އެވެ.
އެސިސްޓެންޓް ކޮމިޝަނާ ފަރުހާދު ފިކުރީ މަގާމުން ވަކިކުރަން ނިންމީ ތަހުގީގުކުރަމުން ދިޔަ ސީރިއަސް މައްސަލައެއްގެ ހެކި ނައްތާލި ކަމުގެ ތުހުމަތުގަ އެވެ. އެއީ ފުލުހުންގެ ތަހުގީގަށް އަތުލާފައި އޮތް ފޯނެއްގައި ހުރި ފޮޓޯތަކެއް ނައްތާލުމާ ގުޅިގެންނެވެ. މިކަން އޭނާ ކޮށްފައި ވަނީ މިހާރުގެ ޕޮލިސް ކޮމިޝަނަރު ހަމީދު މަގާމާ ހަވާލުވެވަޑައިގެންނެވުމުގެ ކުރިންނެވެ. މި މައްސަލައިގައި ފަރުހާދާމެދު ފިޔަވަޅު އެޅުމަށް ޕްރޮސިކިއުޓާ ޖެނެރަލްގެ އޮފީހުން އޭރު އަންގާފައި އޮތް ނަމަވެސް، ހަމައެކަނި ނިންމާފައި ވަނީ އޭނާ އަށް ނަސޭހަތް ދިނުމަށެވެ. ނަމަވެސް، އަލަށް އެކުލަވާލި ޕޮލިސް ބޯޑުން މި މައްސަލަ ނިއުޅައި އޭނާ ވަކިކުރަން ޖެހޭ ކަމަށް ނިންމިއެވެ.
ޗީފް ސުޕްރިންޓެންޑެންޓް އަބްދުﷲ ޝަރީފު މަގާމުން ވަކިކުރަން ނިންމީ، ސިޔާސީ ފަރާތެއް ބުނެގެން ކުށްވެރިޔަކު ދޫކޮށްލި ކަމަށް ކުރެވޭ ތުހުމަތުގަ އެވެ. އެ މައްސަލަ ނެޝަނަލް އިންޓެގްރިޓީ ކޮމިޝަނުން އަންނަނީ ބަލަމުންނެވެ.
ޗީފް ސުޕްރިންޓެންޑެންޓް އަހްމަދު ޝުހާދު ވަކިކުރަނީ ވެސް އެމްއެމްޕީއާރުސީގެ ހިޔާނާތުގެ ފައިސާ ލިބިފައިވާ ކަމަށް ތުހަމަތުކުރެވި އެ މައްސަލަ ނެޝަނަލް އިންޓެގްރިޓީ ކޮމިޝަނާއި އެސެޓް ރިކަވަރީ ކޮމިޝަނުން ތަހުގީގުކުރަމުންދާތީ އެވެ.
