މަސްތުވާތަކެތީގެ ވިޔަފާރި ފުޅާ ދާއިރާއެއްގައި ކުރަމުންދާ ފަރާތްތައް ހައްޔަރުކުރެވުނު ނަމަވެސް، ތަހުގީގު އަދި ކޯޓު މަރުހަލާއިން ދޫވަމުންދާކަމަށް ބުނެ އިދިކޮޅުން މިއަދު ހުށަހެޅި ކުއްލި މައްސަލަ ރައްޔިތުންގެ މަޖިލީހުން ބަލައިގެންފި އެވެ.
މަޑުއްވަރީ ދާއިރާގެ އިދިކޮޅު މެމްބަރު އާދަމް ޝަރީފް ހުށަހެޅުއްވި ކުއްލި މައްސަލައިގައި ބުނެފައިވަނީ، މަސްތުވާތަކެތީގެ ވިޔަފާރި ފުޅާ ދާއިރާއެއްގައި ކުރަމުންދާ ކަމުގެ ތުހުމަތުތައް ހައްޔަރުކުރެވޭ ފަރާތްތަކާމެދު ފިޔަވަޅެއް ވެސް އަދި އަދަބެއް ވެސް ނުދެވޭ ކަމަށެވެ.
އެގޮތުން، ތަހުގީގުގެ މަރުހަލާގައި ހެދޭ ގޯސްތަކުގެ ސަބަބުންނާއި ޝަރީއަތަށް އެ މައްސަލަތައް ސާބިތުނުވެގެން އެފަދަ ފަރާތްތައް މުޖުތަމައުއަށް ދޫވެގެންދިޔުމަކީ އިންތިހާއަށް ކަންބޮޑުވާކަމެއް ކަމަށް ވިދާޅުވި އެވެ.
އެ ކުއްލި މައްސަލަ ބަހުސް ކުރުމަށް މަޖިލީހަށް މިއަދު ބަލައިގެންފައިވަނީ އެކަމަށް ނެގުނު ވޯޓުގައި ބައިވެރިވެވަޑައިގެންނެވި 23 މެމްބަރުންގެ އަގުލަބިއްޔަތުންނެވެ.
ޑްރަގުގެ ބޮޑުން ދޫވާ މައްސަލަ ބޮޑު
އާދަމް ޝަރީފް އެ މައްސަލަ ހުށަހަޅުއްވާފައިވަނީ މިދިޔަ ބުރަސްފަތި ދުވަހު 100 ކިލޯ އަށް ވުރެ ގިނަ މަސްތުވާތަކެއްޗާއެކު ފުލުހުން ހައްޔަރުކުރި މީހުންގެ ތެރެއިން ދެ މީހަކު ކޯޓުން ދޫކޮށްލި މައްސަލަ ފެންމަތިވެފައިވަނިކޮށެވެ.
ފުލުހުންގެ އޮޕަރޭޝަނުގައި މަސްތުވާތަކެތ ހޯދާއިފައި ވަނީ އދ. ބޮޑުކާށިހުރާ ނަމަކަށް ކިޔާ ރަށެއްގައި ފޮރުވާފައި ހުއްޓާކަމަށް ފުލުހުން ބުނެ އެވެ. އަދި އެ އޮޕަރޭޝަނުގައި މާލޭގެ ބައެއް ގޭގޭގެ އިތުރުން ސަފާރީއަކާއި ލޯންޗެއް ބަލާފާސްކުރިކަމަށް ފުލުހުން ބުނެ އެވެ.
ފުލުހުން ބުނާގޮތުގައި އެ މައްސަލައިގަ ކޯޓުން ދޫކޮށްލާފައިވަނީ އެ މައްސަލައިގަ އިސްކޮށް ހިމެނޭ ދެ މީހުންނެވެ. އެ ދެ މީހުން ދޫކޮށްލި ނިންމުން އިސްތިއުނާފްކުރުމަށް ފުލުހުން ވަނީ ޕީޖީގައި އެދިފަ އެވެ.
ނަމަވެސް، އަދި މިހާތަނަށް އެ މައްސަލަ އިސްތިއުނާފުކުރި ކަމެއް ނޭނގެ އެވެ.
ދޫވަނީ ގަސްތުގައި ކަންކުރާ ގޮތުން؟
ހެކި ހޯދުމުގައި ކަނޑައެޅިފައިވާ އިޖުރާއަތާ ހިލާފަށް ގަސްތުގައި ފުލުހުން އަމަލުކުރަމުންދާކަމުގެ ނުސީދާ ތުހުމަތެއް ޕްރޮސެކިޔުޓާ ޖެނެރަލް (ޕީޖީ) ހުސެއިން ޝަމީމް ދާދި ފަހުން ވަނީ ވިދާޅުވެފަ އެވެ.
އެގޮތުން، ފާއިތުވި ހަ މަސް ދުވަހުގެ ތެރޭގައި އިޖުރާއަތާ ހިލާފުވެފައިވާ 10 ފުލުހެއްގެ މައްސަލަ ފާހަގަކުރެވިގެން، އެކަން ފުލުހުންނާ ހިއްސާކުރެވިފައިވާކަން ޕީޖީ ވަނީ ހާމަކުރައްވައިފަ އެވެ.
ނަމަވެސް، އެ ތުހުމަތު ޕޮލިސް ކޮމިޝަނަރު މުހައްމަދު ހަމީދު ވަނީ ދޮގުކުރައްވައިފަ އެވެ.
ގިނަ ފަހަރު އިޖުރާއަތާ ހިލާފަށް އަމަލުކުރެވެނީ ލިބޭ މައުލޫމާތެއްގެ ދަށުން ހަގީގީ އިހުތިސޯސް އޮންނަ ކޯޓަކުން އަމުރު ހޯދުމުގައި ކަމަށް އޭނާ ވިދާޅުވި އެވެ. އަދި އެކަން އެގޮތަށް ކުރަންޖެހެނީ ވަގުތު ފާއިތުވުމުގެ ކުރިން މަސްތުވާތަކެތި އަތުލައިގަތުމުގެ ބޭނުމުގައިކަން ސީޕީ ފާހަގަކުރެއްވި އެވެ.
"އަޅުގަނޑުމެން އިސްކޮށްފައި ހުންނާނީ ރައްޔިތުންގެ މަސްލަހަތު. އަޅުގަނޑުމެންގެ އިޖުރާއަތެއް ގޯސްވެގެން ހަ މީހަކު ދޫވެގެން ދިޔުންތޯ ނޫނީ 170 ކިލޯގެ މަސްތުވާތަކެތި އެތެރެވެގެން އޭގެ ސަބަބުން މުޖުތަމައުގެ ތެރޭގައި ބަޔަކު ހަލާކުވެގެން ދިޔުންތޯ (ރަނގަޅީ)؟،" އިޖުރާއަތްތަކާ ހިލާފުވާއިރު ފުލުހުންގެ ގެންގުޅޭ ވިސްނުން ސާފުކޮށް ދެއްވަމުން ހަމީދު ވިދާޅުވި އެވެ.
