މާލެ ސަރަހައްދުގެ ކޮންމެ އަކަ ކިލޯމީޓަރަކަށް 10،000 ވެހިކަލް އެބަހުރި ކަމަށް އެންވަޔަރަމަންޓް މިނިސްޓަރު އައިޝަތު ޝައުނާ މިއަދު ވިދާޅުވެއްޖެ އެވެ.
ޖަޕާނުން އިސްނަގައިގެން ވާޗުއަލްކޮށް ކުރިޔަށް ގެންދާ އެންވަޔަރަމެންޓަލީ ސަސްޓެއިނަބަލް ފޯރަމް އިން އޭޝިއާގައި ޝައުނާ ވަނީ ރާއްޖޭގައި ވެހިކަލް އިތުރުވާ ރޭޓާ މެދު ކަންބޮޑުވާ ކަން ހާމަކުރައްވާފަ އެވެ. އަދި ވިދާޅުވީ ރާއްޖޭގައި އަހަރެއްގެ މައްޗަށް ވެހިކަލް އިތުރުވާ ރޭޓު 7،953 ގައި ހުރި އިރު، އެހެން ސަރަހައްދުތަކަށް ވުރެ މާލެ ސަރަހައްދުގައި ވެހިކަލް ހުރި އަދަދާ މެދު ހާއްސަކޮށް ކަންބޮޑުވާ ކަމަށެވެ.
ވެހިކަލްތައް ހުރި އަދަދާ މެދު ޝައުނާ ކަންބޮޑުވުން ފާޅުކުރެއްވީ ދެމެހެއްޓެނިވި ދަތުރުފަތުރުގެ މައުލޫއަށް ވާހަކަދައްކަވަމުންނެވެ. މި އަހަރުގެ ފޯރަމް ހާއްސަކުރީ އެންވަޔަރަމެންޓަލީ ސަސްޓެއިނަބަލް ޓްރާންސްޕޯޓް (ތިމާވެށީގެ ގޮތުން ދެމެހެއްޓެނިވި ދަތުރުފަތުރު) އަށެވެ.
ޝައުނާ ވިދާޅުވީ ދަތުރުފަތުރަކީ ރާއްޖޭގައި ދެވަނައަށް އެންމެ ގިނައިން ޖައްވަށް ވިހަ ގޭސް ބޭރުކުރާ ދާއިރާ ކަމަށެވެ. އެގޮތުން ދަތުރުފަތުރުގެ ސަބަބުން ޖައްވަށް ބޭރުވާ ވިހަ ގޭސްތަކާއި ވައި ނުސާފުވުން ގައުމީ ފެންވަރެއްގައި މަދުކުރަން ދަތުރުފަތުރުގެ ސިނާއަތް އެއްކޮށް ބަދަލުކުރަން ޖެހޭ ކަމަށް ވިދާޅުވި އެވެ.
"މޫސުމަށް އަންނަ ބަދަލުތަކުގެ ސަބަބުން އެންމެ ބޮޑަށް ނުރައްކަލަށް ހުށަހެޅިފައިވާ ގައުމެއްގެ ގޮތުން، ރާއްޖޭގެ މަސްލަހަތު އޮތީ ދަތުރުފަތުރުގެ ދާއިރާގައި ކްލީން ޓެކްނޮލޮޖީތައް ބޭނުންކުރަން ފެށުން." ޝައުނާ ވިދާޅުވި އެވެ.
ދަތުރުފަތުރުގައި ހުރި މައްސަލަތައް ހައްލުކުރަން ބިޔަ މަޝްރޫއެއް
މި ފޯރަމްގައި ޝައުނާ ވިދާޅުވީ ދެމެހެއްޓެނިވި ދަތުރުފަތުރަކީ ސަރުކާރުގެ މުހިންމު ސިޔާސަތެއް ކަމަށެވެ. އަދި ސަރުކާރުން އެ މަގަށް މަސައްކަތްތައް ކުރަމުންދާ ކަމަށް ވިދާޅުވި އެވެ.
އެގޮތުން ރާއްޖޭގެ ދަތުރުފަތުރުގެ ދާއިރާގައި ހުރި މައްސަލަތައް ހައްލުކުރަން ގްލޯބަލް އެންވަޔަރަމަންޓް ފެސިލިޓީން ފަންޑުކޮށްގެން ޕްރޮޖެކްޓެއް ހިންގަމުން އަންނަ ކަމަށް ޝައުނާ ވިދާޅުވި އެވެ.
މި ޕްރޮޖެކްޓުގެ ބޭނުމަކީ ދެމެހެއްޓެނިވި ތިމާވެއްޓާ ރައްޓެހި ދަތުރުފަތުރުގެ ނިޒާމެއް ކުރިއެރުވުމަށާއި، ޖައްވަށް ބޭރުވާ ވިހާ ގޭސްތައް މަދުކުރުމަށާއި، ހަކަތައިގެ ރައްކާތެރިކަން އިތުރުކުރުމުގެ ގޮތުން އިޔާދަ ނުކުރެވޭ ހަކަތައިގެ ބާވަތްތަކަށް (ފޮސިލް ފިއުލްސް) އަށް ބަރޯސާވުން ކުޑަކުރުމެވެ.
އެގޮތުން އެންވަޔަރަމަންޓް މިނިސްޓްރީން ހިންގާ ޕްރޮޖެކްޓުގެ ދަށުން ގައުމީ މޮބިލިޓީ ޕްލޭނަކާއި، އިލެކްޓްރިކް މޮބިލިޓީ މަގުޗާޓަށް ބޭނުންވާ ސްޓްރެޓެޖިކް އޮނިގަނޑު ތައްޔާރުކުރާނެ އެވެ. އަދި ކަރަންޓުން ދުވާ ބަހާއި، ޕެޑަލް އެހީގައި ދުވާ ކަރަންޓު ބައިސްކަލު ވެސް ގެންނާނެ އެވެ.
މިނިސްޓްރީގެ މަސައްކަތަށް އަލިއަޅުވާލާ ޝައުނާ ވިދާޅުވީ އޭނާ ގަބޫލުކުރައްވާ ގޮތުގައި ދެމެހެއްޓެނިވި ދަތުރުފަތުރުގެ ޒަރިއްޔާއިން ރަށްތަކުގެ ވިލުންވެރިކަމަށް ފަހިކޮށްދިނުމަށާއި އިތުރުކުރުމަށް ސިޔާސަތު މުހިންމު ރޯލެއް އަދާކުރާ ކަމަށެވެ.
އޭގެ އިތުރުން ޝައުނާ ވަނީ ދެމެހެއްޓެނިވި ދަތުރުފަތުރުގެ ބޭނުމަށް "ސްމާޓް އިންޓެގްރޭޓަޑް" ހައްލުތަކެއް ތަރައްގީކުރަން ފޯރަމްގެ ބައިވެރިންނަށް ގޮވާލާފަ އެވެ.
