މަދުން އާމްދަނީ ލިބޭ ގައުމުތަކާއި މެދު މިނުގެ އާމްދަނީ ލިބޭ ގައުމުތަކުން އެންމެ ގިނައިން ދަރަނި ނަގާފައި ވަނީ ޗައިނާއިން ކަމަށް ވޯލްޑް ބޭންކުން ބުނެފި އެވެ.
އެ ބޭންކުން އަހަރަކު އެއް ފަހަރު ނެރޭ ގައުމުތަކުގެ ދަރަނީގެ ތަފާސްހިސާބުތައް ދައްކާ ގޮތުން، މަދު އަދި މެދު މިނުގެ އާމްދަނީ ލިބޭ ގައުމުތަކުން ޗައިނާއަށް އަދާކުރަންޖެހޭ ދަރަނި މިދިޔަ އަހަރުގެ ނިޔަލަށް ހުރީ 170 ބިލިއަން ޑޮލަރު (2.6 ޓްރިލިއަން ރުފިޔާ) ގަ އެވެ. މިއީ 2011 ވަނަ އަހަރާ އަޅާ ބަލާއިރު ތިން ގުނަ އިތުރު އަދަދެކެވެ.
ޗައިނާއަށް ދަރާފައިވާ ފައިސާގެ ތެރޭގައި ގިނައީ އުމްރާނީ ތަރައްގީގެ މަޝްރޫތައް ހިންގުމަށް ނަގާފައި ހުރި ލޯނާއި ބިމުން ތެލާއި، ގޭހާއި، ޖަވާހިރާއި ރަން ފަދަ ތަފާތު އެކި މައުދަންތައް ނެގުމުގެ ސިނާއަތްތަކަށް ނަގާފައި ހުރި ލޯނެވެ. މި ބޭނުންތަކަށް އެންމެ ގިނައިން ލޯނު ނަގާފައި ހުރީ އެފްރިކާ އަދި ދެކުނު އޭޝިއާ ގައުމުތަކުންނެވެ.
ވޯލްޑް ބޭންކުން އިތުރަށް ފާހަގަކުރި ގޮތުގައި އެ ބޭންކާއި، އެހެނިހެން ބައިނަލްއަގުވާމީ މާލީ އިދާރާތައް ހިމެނޭ ގޮތަށް މި ގައުމުތަކުގެ ބޭރު ދަރަނީގެ ސްޓޮކް (އެކްސްޓާނަލް ޑެޓް ސްޓޮކް) ގެ ހަތަރު ބައި ކުޅަ އެއް ބަޔަކީ ވެސް ޗައިނާއަށް އަދާކުރަން ޖެހޭ ދަރަނި ކަމަށެވެ.
ރާއްޖެ ހިމެނޭ ގޮތަށް ދެކުނު އޭޝިއާގެ ދަރަނި 36.3 ބިލިއަން ޑޮލަރަށް އަރައިފި
ދެކުނު އޭޝިއާ ގައުމުތަކުގެ ތެރެއިން ރާއްޖެ އާއި ޕާކިސްތާނާއި ސްރީލަންކާގެ ބޭރުގެ ދަރަނި އެންމެ ބޮޑީ ޗައިނާއަށެވެ.
އެގޮތުން މިދިޔަ އަހަރުގެ ނިޔަލަށް އެ އަދަދު ހުރީ 36.3 ބިލިއަން ޑޮލަރު (559 ބިލިއަން ރުފިޔާ) ގަ އެވެ. މި އަދަދު 2011 ވަނަ އަހަރު ހުރީ 4.7 ބިލިއަން ޑޮލަރު (72 ބިލިއަން ރުފިޔާ) ގަ އެވެ. އެހެންކަމުން ނުވަ އަހަރު ދުވަހުގެ ތެރޭގައި ދެކުނު އޭޝިއާ ގައުމުތަކުން ޗައިނާއަށް ދަރާފައިވާ ފައިސާގެ އަދަދު ވަނީ ހަތް ގުނަ އިތުރުވެފަ އެވެ.
މި ލޯނުތަކުގެ ތެރޭގައި ހިމެނެނީ ޗައިނާ ސަރުކާރާއި ޗައިނާ އެކްސްޕޯޓް އިމްޕޯޓް ބޭންކާއި ޗައިނާ ޑިވެލޮޕްމަންޓް ބޭންކާއި އެގްރިކަލްޗަރަލް ޑިވެލޮޕްމަންޓް ބޭންކް އޮފް ޗައިނާ އާއި ޗައިނާ ސަރުކާރުން ހިންގާ ބޭންކް އޮފް ޗައިނާ ފަދަ ސިނާއީ ބޭންކުތަކުން ނަގާފައިވާ ލޯނުތަކެވެ.
ވޯލްޑް ބޭންކުން ދަރަނީގެ އަދަދު ހިސާބުކުރީ މިދިޔަ އަހަރުގެ ނިޔަލަށް އަނބުރާ ދައްކާފައިވާ ޕްރިންސިޕަލް އަދި އިންޓްރެސްޓް އުނިކުރުމަށް ފަހު އެވެ.
