އއ. ދަނގެތީގެ މަޝްހޫރު ވިޔަފާރީވެރިޔާ މަހުމޫދު އަބޫބަކުރު ރަހުމުކުޑަ ގޮތަކަށް މަރާލުމާއެކު އެ ރަށުގެ ރައްޔިތުން ނުކުމެ ދެ މީހުން އަތުލައިގަތެވެ. ރައްޔިތުން ތުހުމަތު ކުރާ ގޮތުގައި މަހުމޫދުގެ ގާތިލުންނަކީ އއ. ތޮއްޑޫއަށް ނިސްބަތްވާ އެ ދެ މީހުންނެވެ.
އެ ދެ މީހުން މިހާރު ތިބީ ފުލުހުންގެ ހިމާޔަތުގަ އެވެ. މިހާތަނަށް މަހުމޫދުގެ މަރުގެ ތުހުމަތުގައި އެ ދެ މީހުން ހައްޔަރުކޮށްފައެއް ނުވެ އެވެ.
މުޅި ދަނގެތި ސިއްސުވާލި އަނިޔާވެރި އަމަލުގެ ފަހަތުގައި ތިބި ކަމަށް ތުހުމަތު އެޅިފައިވާ ދެ މީހުންނާ ގުޅޭ ގޮތުން އެ ރަށުން ވެސް ތޮއްޑޫއިން ވެސް އިވުނީ ހަމަ އެއް ވާހަކަތަކެވެެ.
ތޮއްޑޫ ކައުންސިލް މެމްބަރަކު ވިދާޅުވި ގޮތުން އެ ދެމީހުންނަކީ އެ ރަށުން 2019 ވަނަ އަހަރު އެ ރަށު ރައްޔިތުން ނުކުމެ ބޭރުކޮށްފައިވާ ބައެކެވެ. އެއީ ވައްކަމާއި، ފޭރުމުގެ އިތުރުން މަސްތުވާތަކެތީގެ ވިޔަފާރީ ފުޅާކުރުމުގެ މަސައްކަތް ކުރަމުންދާތީ, އެކަން ބޮޑުވެގެންނެވެ.
އޭނާ ކިޔައިދެއްވި ގޮތުގައި އެމީހުން ރަށުން ބޭރުކުރި ދުވަހު ވެސް ބޮޑު މާރާމާރީއެއް ހިނގާފައިވެ އެވެ. މި ހަމަނުޖެހުމުގައި އެތަނުން އެކަކަށް އަނިޔާވި ކަމާއި އޭގެ ފަހުން ފަރުވާ ހޯދަން ދިޔައީ މާލޭ ކަމަށް އޭނާ ވިދާޅުވި އެވެ.
ފަރުވާ ހޯދުމަށްފަހު އެނބުރި ތޮއްޑޫއަށް އަޔަސް ރަށަށް ނާރުވާނެތީ, އެމީހުންގެ މިސްރާބު ދަނގެއްޗަށް ޖެހީ ކަމަށް ކައުންސިލް މެންބަރު ވިދާޅުވި އެވެ. އޭގެފަހުން އެމީހުން އުޅެމުން ދިޔައީ ދަނގެތީގަ އެވެ.
ތޮއްޑޫން އޭނާ ބޭރުކުރީ ރަށު ރައްޔިތުންނަށް ކެތްނުވުމުން، އޭނާއާއި ހެދި ނޫޅެވޭ ދަރަޖައަށް ދިއުމުން
އެރަށު އިތުރު މީހެއް މި ނޫހަށް ކިޔައިދިން ގޮތުގައި އެމީހުން ތޮއްޑޫން ބޭރުކުރީ ދެތިން ހަތަރު ކުއްޖަކަށް މަރުގެ އިންޒާރު ވެސް ދީފައި ވަނިކޮށެވެ. އަދި އެރަށު ގެސްޓު ހައުސްއެއް ހިންގާ އޯނަރެއް ގައިގައި ތަޅައިގަނެ، ގެސްޓުން ތިއްބާ މާރާމާރީވެސް ހިންގާފައިވަނިކޮށެވެ.
އޭނާ ވަނީ އެތަނުން އެކަކު އެރަށު ފިހާރައެއް ފަޅާލައިގެން ވައްކަން ކުރަން ހުރި ކަމަށް ބުނާ ފޮޓޯތަކެއް ވެސް މި ނޫހަށް ހިއްސާކޮށްފަ އެވެ.
ފިހާރައެއް ފަޅާލައިގެން ވައްކަން ކުރަނިކޮށް، ފޮޓޯ: ސީސީޓީ ފޫޓްއޭޖް
ތޮއްޑޫގެ އިތުރު މީހަކު ބުނި ގޮތުގައި އެތަނުން އެކެއްގެ މައްޗަށް ޖިންސީ ގޯނާ އާއި ރޭޕްގެ ތުހުމަތު ވެސް ކުރެވެ އެވެ.
ދަނގެތިން ވާހަކަ ދެއްކި މީހަކު ބުނި ގޮތުގައި އެ ދެ މީހުންނަކީ ވެސް މަސްތުވާތަކެތީގެ ކަންކަމުގައި އެ ރަށުގައި އުޅޭ ދެ މީހުންނެވެ.
އޭނާ ކިޔައިދިން ގޮތުގައި ކޮވިޑްގެ ތެރޭގައި ޕީޕީއީ އަޅައިގެން އެރަށު ފިހާރައަކުން ވައްކަން ކުރަން ވެސް އެމީހުން މަސައްކަތް ކޮށްފައިވެ އެވެ. އެހެންނަމަވެސް, އެއްވެސް ފިޔަވަޅެއް ނޭޅި، އޭނާ މުޖްތަމައުއަށް ދޫވެފައި ހުރީކަން ފާހަގަކުރި އެވެ.
އަޅުގަނޑުމެންގެ ކަންބޮޑުވުމަކީ ވައްކަން ކުރަމުން ފޭރަމުން ދުވާ މީހެއް މިނިވަންކޮށް މުޖްތަމައުއަށް ދޫވެފައި ހުރުން. ބޮޑު ކުށަކަށް އަރައި ގަތީ ފިޔަވަޅު ނޭޅުމުން
ހައުސިން މިނިސްޓްރީގެ އެގްޒެކެޓިވް ޑިރެކްޓަރު އަހުމަދު މައިމޫން ކޮށްފައިވާ ފޭސްބުކް ޕޯސްޓެއްގައި އެމީހުން ފުލުހުންގެ އިދާރާއަށް ގެންދާ ވީޑިއޯ ހިއްސާކޮށް، ވިދާޅުވީ "އއ. ތޮއްޑޫ ހަލާކުކޮށްފަ، އަނެއްކާ އދ. ދަގެއްޗަށް އަރާ، އެރަށް ހަލާކުކޮށްފަ މިއަދު މީހަކު މަރާލިކަމުގެ ތުހުމަތުގައި ހައްޔަރަށް ލީ." ކަމަށެވެ.
ބެލެވެނީ ވައްކަމުގެ އަމަލެއް ކަމަށް
ދަނގެތީ ކައުންސިލްގެ ރައީސް މުއާވިޔަތު ރަޝީދު "އަދަދު"އަށް ކިޔައިދިން ގޮތުގައި އެ ރަށުގައި ކެފޭއެއް ވެސް ހިންގާ މަހުމޫދަކީ އަބަދުވެސް ޖީބުގައި ގިނަ އަދަދެއްގެ ފައިސާ ގެންގުޅޭ މީހެކެވެ.
އެގޮތުން ރޭ ގެއަށް ދިޔުމަށް ކެފޭއިން ނުކުތީ އިއްޔެ ކެފޭއަށް ލިބުނު ފައިސާ ޖީބަށް ލައިގެން ކަމަށެވެ.
"އެހެންވީމާ ބޮޑަށް ބެލެވެނީ ބަޔަކު ފައިސާގެ ދަހިވެތި ކަމުގައި ކޮށްފައިވާ ކަމެއް ކަމަށް،" މުއާވިޔަތު ވިދާޅުވި އެވެ.
އެރަށު އިތުރު ޒުވާނެއްވެސް މި ނޫހާ ވާހަކަދައްކަމުން ބުނީ ބޮޑަށް ބެލެވެނީ "ލާރިކޮޅު ފޭރިގަތުމަށް ހިންގި" އަމެލެއް ކަމަށެވެ.
މަހުމޫދު ގެއްލިގެން ހޯދަމުން ދަނިކޮށް މިއަދު ހެނދުނު އޭނާގެ ހަށިގަނޑު ފެނުނީ ދަނގެތީގައި ހުރި އޭނާގެ އާއިލާއަށް ނިސްބަތްވާ ފަޅު ގެޔެއްގެ ވަޅެއް ތެރެއިންނެވެ. އެއީ, އޭނާ އެންމެ ފަހުން ފެނުނު ކެފޭއާ ގާތްގަނޑަކަށް 200 މީޓަރު ދުރުގައި ހުރި ގޯއްޗެކެވެ.
ހަށިގަނޑު ފުރަތަމަ ފެނުނު މީހުން ބުނާ ގޮތުގައި, މަހުމޫދުގެ ފަޔާއި ބޮލުގައި ގޯނިތަކެއް އައްސާފައި ހުއްޓެވެ. އަދި ވަޅިއަކުން ހަމަލާދީ ވަރަށް އަނިޔާކޮށްފައި ވެސް ހުއްޓެވެ. އެ ސަރަހައްދުގައި އެ ވަޅި އާއި ދަގަނޑު ބުރިއެއް ވެސް އޮތެވެ.
މިހާރު ފުލުހުންގެ ފޮރެންސިކް ޓީމުން އެ ސަރަހައްދުގައި ހަރަކާތްތެރިވަމުން ދާއިރު، މަހުމޫދުގެ ހަށިގަނޑު ވަޅުން ނަގައި ބައެއް ޓެސްޓްތައް ދަނީ ކުރަމުންނެވެ. އޭނާގެ ޖަނާޒާގެ ކަންކަން އަދި ނުފަށަ އެވެ.
އާއިލާއަށް ވެސް އެ ސަރަހައްދަށް ނުވަދެވޭ ކަމަށާއި ތަހުގީގު ނިމުމުން ވަޅުލުމުގެ ކަންކަން ކުރިއަށް ދާނެ ކަމަށް ކައުންސިލުން ބުނެ އެވެ.
