ދުނިޔޭގެ ވޮލީބޯޅަ ފެޑެރޭޝަން، އެފްއައިވީބީގެ ރައީސް ބްރެޒިލްގެ އަރީ ގްރާސާ ރާއްޖެ އަށް ކުރައްވާ ދަތުރުފުޅުގެ ތެރެއިން ރާއްޖޭގައި ބީޗްވޮލީބޯޅަ ކުރިއަރުވަން ދެ އަހަރު ދުވަހުގެ ކޯޗިން ތަމްރީން ކުރުމުގެ ޕްރޮގްރާމެއް ކުރިއަށް ގެންދަން ނިންމަވައިފި އެވެ.
މިއީ ދުނިޔޭގެ ވޮލީބޯޅައިގެ މައި ޖަމިއްޔާގެ ފަރާތުން ވޮލީބޯލް އެމްޕަވާމަންޓް ޑިވެލޮޕްމަންޓް ޕްރޮގްރާމްގެ ތެެރެއިން ހިންގޭނެ ޕްރޮޖެކްޓް އެކެވެ. މީގެ ތެރެއިން ގައުމީ އަންހެން އަދި ފިރިހެން ޓީމުގެ ކުޅުމުގެ ލެވަލް މަތިކުރުމާއި ގްރާސްރޫޓުން ފެށިގެން މަތީ ލެވަލާ ހަމައަށް ބީޗް ވޮލީން ކުޅުންތެރިން ތަމްރީން ކުރުމުގެ މަސައްކަތްތަކަށް ކުރިއެރުން ހޯދޭނެ އެވެ.
ވޮލީބޯލް އެމްޕަވާމަންޓް ޑިވެލޮޕްމަންޓް ޕްރޮގްރާމަކީ ވޮލީގެ ތެެރެއިން ލިބޭ ފައިސާ މެދުވެރިކޮށް ވޮލީ ތަރައްގީގެ ތަންތަަނަށް އިންވެސްޓްކުރަން ދުނިޔޭގެ ޖަމިއްޔާ އިން ފަށާފައިވާ ޕްރޮގްރާމް އެކެވެ.
އެފްއައިވީބީގެ ރައީސް ގްރާސާ ވިދާޅުވީ ރާއްޖޭގައި ހުރި ވޮލީބޯޅައިގެ ހުނަރުތަކުގެ ބޭނުން އެންމެ ރަނގަޅުގޮތުގައި ހިފައި، ވޮލީބޯޅަ އަކީ ރާއްޖޭގައި ވެސް އެކި ގޮތްގޮތުން ފައިދާކުރާނެ ކުޅިވަރަކަށް ހަދަން ކުރާ މަސައްކަތުގައި އެފްއައިވީބީން ބައިވެރިއެއްގެ ގޮތުގައި އޮންނަން ބޭނުންވާ ކަމަށެވެ.
"އަހަރެން ބޭނުން ބީޗްވޮލީބޯޅަ މި ގައުމުގެ އެންމެ މަގުބޫލު ކުޅިވަރުތަކުގެ ތެރޭގައިވާން. ވަރުގަދަ ގައުމީ ޓީމެއް އޮވެ، އެ ކުޅުންތެރިންނަށް އަރަމުން އަންނަ ޖީލުތަކުގައި ތިބި ޒުވާން ކުޅުންތެރިންނަށް ރަނގަޅު ނަމުނާއެއް ދައްކައިދެވިއްޖިއްޔާ މިކަން ނުވާންވީ ސަބަބެއް ނެތް،" ގްރާސާ ވިދާޅުވި އެވެ.
ރާއްޖޭގެ ވޮލީބޯޅަ އެސޯސިއޭޝަން، ވީއޭއެމްގެ ރައީސް މުހައްމަދު ރަނޭޝް (ރަނޭ) ވެސް ވަނީ އެފްއައިވީބީގެ މި ދަތުރުގައި ރާއްޖޭގެ ވޮލީބޯޅަ އަށް މުހިއްމު ފުރުސަތުތަކެއް ފަހިވެގެންދާނެ ކަމުގެ ޔަގީންކަން އެބައޮތް ކަމަށް ވިދާޅުވެފަ އެވެ.
އެފްއައިވީބީގެ ރައީސް ގްރާސާގެ ޝަަރަފްގައި ބޭއްވި އިވެންޓްގެ ތެރެއިން.
އެފްއައިވީބީގެ ރައީސް ގްރާސާ ވިދާޅުވީ ވީއޭއެމްގައި މިހާރު އޮތް ލީޑަޝިޕްގެ ޕްލޭންތަކެއް އެބައޮތް ކަމަށާއި އެއީ ހަަމައެކަނި ގައުމީ ޓީމުތައް ވަރުގަދަކުރުމާއި ގްރާސްރޫޓް ލެވަލުން ކުޅުންތެރިން ތަރައްގީ ކުރުން ނޫން ކަމަށެވެ. އޭގެ ބަދަލުގައި ރާއްޖެ އަކީ ބީޗް ވޮލީބޯޅައިގެ ދުނިޔޭގެ ފެންވަރު މުބާރާތްތައް ބޭއްވޭނެ ތަނަކަށް ހެދުމަށް ކަމަށް ގްރާސާ ވިދާޅުވި އެވެ.
ގްރާސާ ރާއްޖެ އަށް ކުރައްވާ ހަތަރު ދުވަހުގެ ދަތުރުފުޅުގެ ތެރެއިން ވަނީ ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއާ ވެސް ބައްދަލުކުރައްވައިފަ އެވެ.
މި ބައްދަލުކުރެއްވުމުގައި ރައީސް ދެއްކެވި ވާހަކަފުޅުގައި ވަނީ ޒުވާން ކުޅުންތެރިން އެ މީހުންގެ ހުނަރު ކުރިއަރުވައި ބައިނަލްއަގުވާމީ ކުޅިވަރުގެ ހަރަކާތްތަކުގައި ރާއްޖޭގެ ކުޅުންތެރިންގެ ބައިވެރިވުން އިތުރުކުރުމަށް ސަރުކާރުން ކުރާ މަސައްކަތް ފާހަގަކުރައްވައިފަ އެވެ.
އަދި ރާއްޖޭގައި ވޮލީބޯލް ކުރިއެރުވުމަށްޓަކައި ވަސީލަތުގެ ގޮތުންނާއި އެނޫން ވެސް އެކި ގޮތުްގޮތުން އެހީތެރިކަން ބޭނުންވާކަން ފާހަގަކުރެއްވި އެވެ. ހާއްސަކޮށް ކުޅުންތެރިން ބިނާކުރުމުގެ މަސައްކަތް ދެމެހެއްޓެނިވި ގޮތެއްގައި ރޭވިގެން ކުރިޔަށް ގެންދިއުމުގައި ހައި ޕާފޯމަންސް ޓްރެއިނިންސް ސެންޓަރެއް ރާއްޖޭގައި ގާއިމްވެފައި ހުރުމުގެ މުހިއްމުކަން ރައީސް ވަނީ ފާހަގަކުރައްވައިފަ އެވެ.
