ދުނިޔޭގެ ވޮލީބޯޅަ ފެޑެރޭޝަން، އެފްއައިވީބީގެ ރައީސް ބްރެޒިލްގެ އަރީ ގްރާސާ ރާއްޖެ ވަޑައިގެން ދެއްކެވި ވާހަކައިން ލިބުނީ ރާއްޖެ އަށް ކުރިއަށްދެވޭނެ ކަމުގެ އުއްމީދީ މެސެޖެއް ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެ އެވެ.
ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ދިން ދައުވަތަަކަށް ހަތަރު ދުވަހުގެ ރަސްމީ ދަތުރުފުޅެއްގައި ގްރާސާ އިއްޔެ ރާއްޖެ ވަޑައިގެންނެވީ މުހިއްމު މަޝްވަރާތަކެއް ކުރެއްވުމަށެވެ. މަަޝްވަރާ ކުރައްވަން ހަމަޖެހިފައިވަނީ އެފްއައިވީބީ މެދުވެރިކޮށް ރާއްޖެ އަށް ލިބެން އޮތް ފުރުސަތުތައް ފަހިކުރުމަށެެވެ.
އެއާޕޯޓްގައި ހުންނަވައި އިއްޔެ މީޑިއާ އަށް ދެއްވި އިންޓަވިއުގައި މަހުލޫފް ވިދާޅުވީ ގްރާސާގެ މި ދަތުރުފުޅަކީ މީގެ އަހަރެއްގެ ކުރިން އުފެދުނު ގުޅުން ބަދަހިވެގެން އައިސް ވީއޭއެމްގެ ރައީސަކަށް މިހާރު ހުންނެވި މުހައްމަދު ރަނޭޝް (ރަނޭ)ގެ ލީޑަޝިޕުން ކުރެއްވި ރަނގަޅު މަސައްކަތުގެ ނަތީޖާ ކަމަށެވެ.
މަހުލޫފް ވިދާޅުވީ މީގެ ކުރިން ދެކެވެނީ ހުސް ފުޓްބޯޅަ ވާހަކަ ކަމަށާއި މިހާރު މި ގައުމަށް ބޮޑެތި ކުޅިވަރުތަކުގެ ރައީސުން ވަޑައިގަންނަވާ ހިސާބަށް ދިއުމާ އެކު އޭގެއިން ދޭހަވާ ކަމަކީ ކުޅިވަރު އާއިލާ އަށް މަސައްކަތްތަކެއް ކުރެވޭކަން ކަމަށެވެ. އަދި މި ކުޅިވަރު އެސޯސިއޭޝަންތަކަށް ޔޫތު މިނިސްޓްރީން ދޭ ސަޕޯޓް ވެސް ސާފުވާކަން މިިނިސްޓަރު ފާހަަގަކުރެއްވި އެވެ.
"ދެންމެ (އެފްއައިވީބީ ރައީސް ގްރާސާ) އެ ދެއްވީ ވަރަށް ކްލިއާ މެސެޖެއް ހަގީގަތުގައި ތިމަންނަ މި ކުޑަ ގައުމަށް މި ރީތި ގައުމަށް އައިސް މި ހުރީ ބޮޑު ކަމެއް ކޮށްދޭށޭ. ތިމަންނަ އަތުގައި ހުށަހެޅުންތައް އެބަހުއްޓޭ،" މިނިސްޓަރު މަހުލޫފް ވިދާޅުވި އެވެ.
"އިރާދަކުރެއްވިއްޔާ މި ދަތުރުތެރޭގައި ރައީސްއާ އެކީ ބޭއްވޭ ބައްދަލުވުމާއި އެންމެންނާ އެކީ މި ކުރެވޭ މަޝްވަރާތަކުން އަޅުގަނޑު ވެސް އެދެނީ މި ހީކުރާ ވަރަށް ވުރެ ރަނގަޅު ނަތީޖާއެއް ފެނިގެންދާނެ ކަމަށް. ސަރުކާރުން ލިބެން ޖެހޭ ހުރިހާ އެއްބާރުލުމެއް ލިބިގެންދާނެ،"
އެފްއައިވީބީއާ ގުޅިގެން ކުރިއަށްދާނަމަ ރަނގަޅު ފެސިލީޓީސްތަކެއް ހޯދުމާއި އެތުލީޓުން ޑިވެލޮޕްކުރުމުގެ ފުރުސަތު އިތުރު ކުރުމުގެ އިތުރުން ބައިނަލްއަގުވާމީ މުބާރާތްތައް ރާއްޖެ ގެނެވޭތޯ މަސައްކަތް ކުރެވޭނެ ކަމަށް މަހުލޫފް ވިދާޅުވި އެވެ. އަދި މަޝްވަރާތަކުގައި އެ ވާހަކަތައް ދައްކަވާނެ ކަމަށް ވިދާޅުވި އެވެ.
ރާއްޖޭގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެންމެ ޝައުގުވެރިވާ ކުޅިވަރުތަކުގެ ތެރޭގައި ވޮލީ ހިމެނޭ ކަމަށް މަހުލޫފް ވިދާޅުވި އެވެ. އަދި ވޮލީބޯޅައިގެ ކުރިމަގަށާއި ޖުމްލަކޮށް ހުރިހާ ކުޅިވަރެއްގެ ކަންކަމުގައި ސަރުކާރުން ހާއްސަ އަހައްމިއްޔަތު ކަމެއް ދީގެން މަސައްކަތް ކުރާ ކަން މަހުލޫފް ފާހަގަކުރެއްވި އެވެ.
