ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން ލިބިވަޑައިގެންނެވި ޒަހަމްތަކަށް ރާއްޖޭން ބޭރުގައި ފަރުވާ ހޯއްދަވަން ހަތަރު މަހަށް ވުރެ ގިނަ ދުވަހު ހުންނެވުމަށްފަހު، އިއްޔެ އެނބުރި ރާއްޖެ ވަޑައިގެންފައިވާއިރު، މަޖިލީހުގެ މިއަދުގެ ޖަލްސާގެ ރިޔާސަތާ ހަވާލުވެވަޑައިގެންފި އެވެ.
ހަރުކަށި ފިކުރުގެ ބަޔަކު ނަޝީދަށް 2019 ވަނަ އަހަރުން ފެށިގެން ފާރަލައި ބޮމެއް ގޮއްވާލައިގެން ދެ ފަހަރަށް ދޭން އުޅުނު ހަމަލާ ނާކާމިޔާބުވުމުން ތިން ވަނަ ހަމަލާ އަމާޒުކުރީ މިދިޔަ މެއި މަހުގެ ހަ ވަނަ ދުވަހުގެ ރެ އެވެ.
އޭރު މަޖިލީހުގެ ފުރަތަމަ ދައުރު ނިންމައި މަޖިލިސް އޮތީ ޗުއްޓީގަ އެވެ.
ސައިކަލެއްގައި ހަރުކޮށްގެން ބޮން ގޮއްވާލީ ކެނެރީގެއިން ނުކުމެވަޑައިގެން މަޖީދީމަގުގައި އޮތް ކާރުކޮޅަށް އަރާވަޑައިގަންނަވަން އުޅުއްވަނިކޮށެވެ.
އެ ހަމަލާ އިން އެމަނިކުފާނުގެ ފުރާނަ ސަލާމަތްވީ ކިރިޔާ ކަމަށް އޭޑީކޭގެ ޑޮކްޓަރުން ވިދާޅުވެފައިވެ އެވެ.
އެމަނިކުފާނުގެ ހަށިކޮޅުގެ އެކި ގުނަވަންތައް ފޫއަޅުވާލައި ވަދެފައި ހުރި ރޭޒާ ފުއްތައް ނަގަން ހޭނައްތައިގެން 16 ގަޑިއިރުގެ އޮޕަރޭޝަންތައް ކުރި އެވެ. އެންމެ ފުރަތަމަ ޖަރުމަނަށް ވަޑައިގެން ފަރުވާ ހޯއްދެވި އެވެ.
އޭގެ ފަހުން އިނގިރޭސިވިލާތަށް ވަޑައިގެންނެވީ ކުރިން ފަރުވާ ހޯއްދެވި ޖަރުމަނުގެ ބާލިން ބުންޑެސްވެއާ ހޮސްޕިޓަލްގެ ޑޮކްޓަރުންގެ ލަފާގެ މަތިން، އިތުރު ފަރުވާ އަށެވެ.
ނަޝީދު 150 ދުވަހަށްފަހު މަޖިލީހުގެ ރިޔާސަތާ މިއަދު އަލުން ހަވާލުވެވަޑައިގަތުމަށްފަހު، ޖަލްސާ ފެއްޓެވުމަށްފަހު މަޖިލީހުން މިހާރު ކުރަމުންދާ އަދި މިއަހަރު ކުރަންހުރި މަސައްކަތްތަކުގެ މައްޗަށް އަލިއަޅުވައިލެއްވި އެވެ.
ހާއްސަ ގޮތެއްގައި މި ހިނގާ އޮކްޓޯބަރު މަހުގެ ނިޔަލަށް އަންނަ އަހަރުގެ ދައުލަތުގެ ބަޖެޓު ސަރުކާރުން ހުށަހަޅާއިރު، މިވަގުތު ރާއްޖޭގެ މާލީ އަދި އިގުތިސޯދީ ހާލަތު އޮތް ގޮތުގެ ހުލާސާއެއް އެމަނިކުފާނު ވަނީ ދެއްވައިފަ އެވެ.
